།ཤཱ་རིའི་བུ་དགེ་སློང་གང་པོ་ཆོས་སྟོན་པ་ནི་ཉོན་མོངས་པ་མེད་པ་དང་། ཟང་ཟིང་ལ་མི་ལྟ་བ་དང་། རྙེད་པ་དང་། བཀུར་སྟི་ལ་མ་ཞེན་པར་ཆོས་སྟོན་པ་ཡིན་ནོ། །ཤཱ་རིའི་བུ་དགེ་སློང་གང་པོ་ནི་སོ་སོ་ཡང་དག་པར་རིག་པ་ཐོབ་པའི་ཆོས་སྨྲ་བ་ཡིན་པས་སྟོན་པ་མ་གཏོགས་པར་གང་པོ་ལ་ལྷ་དང་བཅས་པའི་འཇིག་རྟེན་གྱིས་དོན་ཏམ། ཚིག་མཐར་གཏུག་པར་མི་ནུས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་དེ་ལྟ་བས་ན། ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་རྗེས་སུ་འཐུན་པའི་ཆོས་སྟོན་པ་དེ་ནི་སྐྱེ་བོ་མང་པོའི་དོན་བྱེད་པ་ཡིན་པས་དགེ་བའི་རྩ་བ་དཔག་ཏུ་མེད་པ་མངོན་པར་འདུ་བྱེད་པ་ཡིན་ནོ། །ཤཱ་རིའི་བུ་གང་ཞིག་སངས་རྒྱས་ཀྱི་བྱང་ཆུབ་ལ་སྨོད་པར་བྱེད་པ་དེ་ནི་སྐྱེ་བོ་མང་པོ་ལ་ཡང་གནོད་པ་བྱེད་པ་ཡིན་པས་མི་དགེ་བའི་རྩ་བ་མང་དུ་མངོན་པར་འདུ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སྡིག་པའི་རྣམ་པར་སྨིན་པ་ནི་སྡིག་པ་ཡིན་ལ། ཟག་པ་དང་བཅས་པའི་མི་དགེ་བའི་རྣམ་པར་སྨིན་པ་ཡང་ཟག་པ་དང་བཅས་པ་ཡིན་ཞིང་། ཟག་པ་མེད་པའི་རྣམ་པར་སྨིན་པ་ནི་ཟག་པ་མེད་པ་ཡིན་ནོ། །ཤཱ་རིའི་བུ་དེ་ལྟ་བས་ན་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་དག་འཁོར་བཞི་ལ་རྒྱས་པར་བཤད་ཅིང་རབ་ཏུ་བསྟན་པ་ན། ཤཱ་རིའི་བུ་གང་དག་གིས་ཆོས་ཀྱི་རྣམ་གྲངས་འདི་ཐོས་ནས་དེ་དག་དགའ་བ་དང་མགུ་བ་ཐོབ་པར་གྱུར་ན་ཤཱ་རིའི་བུ་དེ་དག་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །གང་དག་ཡང་དེ་བཞིན་གཤེགས་པས་གསུངས་པའི་ཆོས་ཀྱི་རྣམ་གྲངས་འདི་ལྟ་བུ་འདི་ཐོས་ནས་དགའ་བ་དང་མགུ་བ་མ་ཐོབ་ཅིང་ལྷག་པར་ཡང་མ་དད་པ་ཉེ་བར་སྟོན་པར་འགྱུར་ན། གདོན་མི་ཟ་བར་དེ་དག་ནི་ཚུལ་ཁྲིམས་རལ་བའམ། མངོན་པའི་ང་རྒྱལ་ཅན་ནམ། ཡོངས་སུ་མ་དག་པའི་ཆོས་སྟོན་པ་ཡིན་ནོ། །ཡང་གང་ཞིག་སྨོད་པར་བྱེད་ན་དེ་དེ་ཉིད་ནས་དམུས་ལོང་དུ་འགྱུར་རོ། །ཤཱ་རིའི་བུ་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །ཤཱ་རིའི་བུ་ང་ནི་ཇི་ལྟར་རྫ་མཁན་གྱིས་སོ་མ་བཏང་བའི་སྣོད་རྣམས་ལ་ཁྱད་དུ་གསོད་པར་བྱེད་པ་དེ་ལྟར་ཕ་རོལ་གནོན་པར་མི་མཛད་ཀྱི། ཤཱ་རིའི་བུ་ང་ནི་སངས་རྒྱས་ཀྱི་བྱང་ཆུབ་དམིགས་སུ་མེད་པ་དོན་དམ་པ་སྟོང་པ་ཉིད་ཀྱིས་ཟིལ་གྱིས་མནན་ཅིང་ཟིལ་གྱིས་མནན་ནས་གཞན་ལ་ཆོས་སྟོན་པ་ན་སྙིང་པོར་འགྱུར་བ་གང་ཡིན་པ་དེ་ན་འདུག་ལ་སྦུན་པར་འགྱུར་བ་གང་ཡིན་པ་དེ་ནི་འདོར་བར་འགྱུར་རོ།