།སྐྱེས་བུ་དམ་པ་དག་ནི་ཆོས་ཀྱི་དགའ་བས་དགའ་ཞིང་མགུ་བས་ཆོས་འདོད་པ་ཡིན་ནོ། །སྐྱེས་བུ་དམ་པ་དག་ནི་ལུས་དང་སྲོག་གཏོང་བས་དམ་པའི་ཆོས་ཡོངས་སུ་འཛིན་པ་ཡིན་ནོ། །སྐྱེས་བུ་དམ་པ་དག་ནི་སེམས་ཅན་ཐམས་ཅད་དང་འབྲེལ་བས་མི་གཏོང་བ་ཡིན་ནོ། །སྐྱེས་བུ་དམ་པ་དག་ནི་དོན་དམ་པའི་རྗེས་སུ་འཇུག་པས་ཉེས་པ་མཐོང་བ་ཡིན་ནོ། །སྐྱེས་བུ་དམ་པ་དག་ནི་སྡིག་པའི་ཆོས་རྣམ་པར་སྤངས་པས་དགེ་བའི་ཆོས་ལ་ཞུགས་པ་ཡིན་ནོ། །སྐྱེས་བུ་དམ་པ་དག་ནི་དབུལ་པོ་རྣམས་ཀྱི་གཏེར་ཡིན་ནོ། །སྐྱེས་བུ་དམ་པ་དག་ནི་ནད་པ་རྣམས་ཀྱི་སྨན་པ་ཡིན་ནོ། །སྐྱེས་བུ་དམ་པ་དག་ནི་འཇིགས་པ་རྣམས་ཀྱི་མགོན་ཡིན་ནོ། །སྐྱེས་བུ་དམ་པ་དག་ནི་དཔུང་གཉེན་མེད་པ་རྣམས་ཀྱི་སྐྱབས་ཡིན་ནོ། །སྐྱེས་བུ་དམ་པ་དག་ནི་འཁོར་བའི་རྒྱ་མཚོར་ཞུགས་པ་རྣམས་ཀྱི་གནས་ཡིན་ནོ། །སྐྱེས་བུ་དམ་པ་དག་ནི་རྟེན་མེད་པ་རྣམས་ཀྱི་རྟེན་ཡིན་ནོ། །སྐྱེས་བུ་དམ་པ་དག་ནི་མུན་པ་མུན་ནག་ཏུ་ཞུགས་པ་རྣམས་ཀྱི་སྣང་བར་བྱེད་པ་ཡིན་ནོ། །སྐྱེས་བུ་དམ་པ་དག་ནི་ལམ་ངན་པར་ཞུགས་པ་རྣམས་ཀྱི་འདྲེན་པ་ཡིན་ནོ། །སྐྱེས་བུ་དམ་པ་དག་ནི་ཆོས་སྨྲ་བ་རྣམས་ཀྱི་ཡོངས་སུ་འདྲེན་པ་ཡིན་ནོ། །སྐྱེས་བུ་དམ་པ་དག་ནི་བཟོད་པ་དང་དུལ་བའི་རྣལ་འབྱོར་དང་ལྡན་པས་ཐ་བའི་ཉེས་པ་དང་། གནོད་སེམས་དང་། གནོང་བ་འཆབ་པ་དང་། ཁྲོ་བའི་ཡོངས་སུ་གདུང་བ་ཐམས་ཅད་དང་བྲལ་བ་ཡིན་ཏེ། དེ་ལྟ་བས་ན་སྐྱེས་བུ་དམ་པ་དག་དེ་འདྲ་བའི་ཆོས་ལ་གནས་པས་ནི་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ནམ་མཁའ་མཛོད་ཀྱིས་སྨྲས་པ། ནམ་མཁའ་དཔག་ཏུ་མེད་པ་བཞིན་དུ་བྱམས་པ་སྒོམ་པའི་རྣལ་འབྱོར་དང་ལྡན་པ། སྙིང་རྗེ་ཆེན་པོ་ལ་གནས་པ་རྒྱུན་མི་འཆད་པ། དབང་པོ་རྟག་ཏུ་དགའ་ཞིང་དགོད་པ། འདོད་པའི་དགའ་བ་ཐམས་ཅད་ལ་བཏང་སྙོམས་སུ་གཏོང་བ། སྦྱིན་པ་ནམ་མཁའ་དང་མཚུངས་པ། ཚུལ་ཁྲིམས་ནམ་མཁའ་དང་མཚུངས་པ། བཟོད་པ་ནམ་མཁའ་དང་མཚུངས་པ། བརྩོན་འགྲུས་ནམ་མཁའ་དང་མཚུངས་པ། བསམ་གཏན་ནམ་མཁའ་དང་མཚུངས་པ། ཤེས་རབ་ནམ་མཁའ་དང་མཚུངས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོས་སྒྱུར་བས་སྨྲས་པ།