ཀྱེ་མའོ་གྲོགས་པོ་དག་འདི་ནི་མི་འཇིགས་པའི་གོ་ཆའོ། །འདི་ནི་མི་སྐྲག་པའི་གོ་ཆའོ། །འདི་ནི་མ་ཞུམ་པའི་གོ་ཆའོ། །འདི་ནི་ལེ་ལོ་མེད་པའི་གོ་ཆའོ། །ཀྱེ་གྲོགས་པོ་དག་དེ་བས་ན་མི་འཇིགས་པ་དང་། སེམས་མི་སྐྲག་པ་དང་། མ་ཞུམ་པ་དང་། ལེ་ལོ་མེད་པ་དང་། འཇིགས་ཤིང་སྐྲག་པ་སྐྱི་བུང་ཞེས་བྱེད་པ་དང་བྲལ་བ་དང་། འཁོར་བའི་ཉེས་པ་མི་སྐྱེད་པ་དང་། མྱ་ངན་ལས་འདའ་བའི་ཡོན་ཏན་ཡང་དག་པར་མཐོང་བ་དང་། བདེ་བ་དང་སྡུག་བསྔལ་བའི་ཆོས་ལ་སྙོམས་པར་གནས་པ་དང་། མི་གཉིས་པ་ལ་གནས་པ་དང་ལྡན་པས་ཐམས་ཅད་མཁྱེན་པ་རྟོགས་པར་སླའོ། །བྱང་ཆུབ་སེམས་དཔའ་སེང་གེའི་འགྲོས་བསྒྲགས་དབྱངས་ཀྱིས་སྨྲས་པ། ཀྱེ་གྲོགས་པོ་དག་འགྲོས་དེ་ནི་སྐྱེས་བུ་ངན་པའི་མ་ཡིན་གྱི། དེ་ནི་སྐྱེས་བུ་དམ་པའི་འགྲོས་ཡིན་ནོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་དག་ནི་སྡིག་པའི་ལྟ་བ་དང་བྲལ་བས་ཡང་དག་པ་ལ་ཞུགས་པ་ཡིན་ནོ། །སྐྱེས་བུ་དམ་པ་དག་ནི་རྟག་པར་དྲང་བའི་རང་བཞིན་དང་ལྡན་པས་གཡོ་མེད་པ་ཡིན་ནོ། །སྐྱེས་བུ་དམ་པ་དག་ནི་བླ་མ་ལ་རིམ་གྲོ་སྐྱེས་པས་ང་རྒྱལ་བཅོམ་པ་ཡིན་ནོ། །སྐྱེས་བུ་དམ་པ་དག་ནི་བསྟན་ན་འཐུན་པར་ལེན་པས་ཚིག་བཟང་བ་ཡིན་ནོ། །སྐྱེས་བུ་དམ་པ་དག་ནི་ཡང་དག་པའི་འཚོ་བ་ལ་གནས་པས་ལས་ཀྱི་མཐའ་གྲགས་པ་ཡིན་ནོ། །སྐྱེས་བུ་དམ་པ་དག་ནི་སྐྱོ་བ་དང་བྲལ་བས་འདོད་ཆགས་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་ཁོང་ཁྲོ་བ་དང་བྲལ་བས་ཞེ་སྡང་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་ཞི་བ་རབ་ཏུ་ཞི་བ་ཉེ་བར་ཞི་བས་མུན་པ་མུན་ནག་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་སྡུག་བསྔལ་བ་དང་དབུལ་པོ་ལ་སྙིང་རྗེ་བར་གྱུར་པས་འཇམ་པ་རྣམས་ཡིན་ནོ། །སྐྱེས་བུ་དམ་པ་དག་ནི་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཡོངས་སུ་དག་པས་འཛེམ་པ་དང་བཅས་པ་ཡིན་ནོ། །སྐྱེས་བུ་དམ་པ་དག་ནི་དེ་དག་བྱ་བ་ལ་ཡང་དག་པར་ཞུགས་པས་ཇི་སྐད་སྨྲས་པ་བཞིན་དུ་བྱེད་པ་ཡིན་ནོ། །སྐྱེས་བུ་དམ་པ་དག་ནི་རྟག་ཏུ་བརྟུལ་བ་བརྟན་པས་ལྷག་པའི་བསམ་པ་དང་ལྡན་པ་ཡིན་ནོ། །སྐྱེས་བུ་དམ་པ་དག་ནི་ལོག་པའི་ཆོས་དང་བྲལ་བས་བདེན་པ་ལ་གནས་པ་ཡིན་ནོ། །སྐྱེས་བུ་དམ་པ་དག་ནི་ཆོས་ཀྱི་དགའ་བས་དགའ་ཞིང་མགུ་བས་ཆོས་འདོད་པ་ཡིན་ནོ།