བཅོམ་ལྡན་འདས་བདག་ཅག་ནི་མི་མཇེད་ཀྱི་འཇིག་རྟེན་གྱི་ཁམས་དེ་ན་རྒྱལ་པོ་མ་སྐྱེས་དགྲའི་ཁབ་ཏུ་འཇམ་དཔལ་གཞོན་ནུར་གྱུར་པ་དང་མཆོད་སྟོན་འཚལ་དུ་མཆིའོ། །དེ་ནས་འཇམ་དཔལ་གཞོན་ནུར་གྱུར་པས་དེ་ཉིད་ཀྱི་ཐང་ཅིག་སྐད་ཅིག་ཡུད་ཙམ་ལ་བྱང་ཆུབ་སེམས་དཔའ་བརྒྱད་ཁྲི་ཉིས་སྟོང་པོ་དེ་དག་དང་འགྲོགས་ཏེ། འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ནས་མི་སྣང་བར་གྱུར་ཏེ་བདག་གི་གཙུག་ལག་ཁང་དུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟར་ཚོགས་པའི་བྱང་ཆུབ་སེམས་དཔའ་དེ་དག་ལ་གཟུགས་ཞེས་བྱ་བའི་ཆོས་ཀྱི་རྣམ་གྲངས་རྒྱ་ཆེར་བཤད་དོ། །དེ་ལ་གཟུངས་གང་ཞེ་ན། གཟུངས་ཞེས་བྱ་བ་ནི་འདི་ལྟ་སྟེ། དྲན་པ་མ་ཉམས་པ། རྟོགས་པ་མ་གཡེངས་པ། བློ་གྲོས་མ་རྨོངས་པ། ཤེས་རབ་མངོན་དུ་བྱེད་པ། ཆོས་ཐམས་ཅད་ལ་དེ་བཞིན་ཉིད་བསྟན་པས་ལམ་བསྟན་པ་ཤེས་པ། འབྲས་བུ་ཐོབ་ནས་སྲུང་བར་བྱེད་པ། ལམ་སྐྱོན་མེད་པ་ལ་འཇུག་ཤེས་པ། ཆོས་ཐམས་ཅད་ཀྱི་ཚིག་རབ་ཏུ་ཐ་དད་པ་ཤེས་པ། གཟུངས་ཀྱིས་འཕགས་པའི་རིགས་མི་གཅོད་པ། སངས་རྒྱས་ཀྱི་རིགས་འཛིན་པ། ཆོས་ཀྱི་རིགས་སྡུད་པ། དགེ་འདུན་གྱི་རིགས་ཆོས་ཀྱི་རྗེས་སུ་ཤེས་པ། དྲི་བ་ལུང་བསྟན་པ་ལ་མ་རྨོངས་པ། འཁོར་ཐམས་ཅད་དུ་མ་ཞུམ་པ། འཁོར་ཐམས་ཅད་དུ་མི་འཇིགས་པ། ལྷའི་སྐད་དུ་སྟོན་པ་ཤེས་པ། ཀླུའི་སྐད་དུ་སྟོན་པ་ཤེས་པ། གནོད་སྦྱིན་གྱི་སྐད་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། བརྒྱ་བྱིན་དང་། ཚངས་པའི་སྐད་དུ་སྟོན་པ་ཤེས་པ། སྐད་ཡང་དག་པ་དང་དབང་པོ་ཤེས་པ། ལོག་པར་ལྟ་བ་ཡོངས་སུ་ཤེས་པ། སེམས་ཅན་ཐམས་ཅད་ཀྱི་དབང་པོ་ལ་རྟོག་པ། སེམས་ས་དང་མཚུངས་པར་གཞོག་པ། འཇིག་རྟེན་གྱི་ཆོས་བརྒྱད་ཀྱིས་མི་བསྐྱོད་པ། ཆོས་དཀར་པོ་ཐམས་ཅད་ཡོངས་སུ་སྨིན་པར་བྱེད་པ། ལས་ཀྱི་རྣམ་པར་སྨིན་པའི་འབྲས་བུ་ཇི་ལྟ་བ་བཞིན་དུ་སྟོན་པ། སེམས་ཅན་ཐམས་ཅད་ཀྱི་ཉེ་བའི་འཚོ་བར་རྩོལ་བ། ཚུལ་ཁྲིམས་ཀྱི་གཞི་སེམས་ཅན་ཐམས་ཅད་ལ་གནས་པ། ཡེ་ཤེས་ཐམས་ཅད་ཀྱི་རྗེས་སུ་སོང་བ།