བརྐྱང་པ་ལས་སྐུམ་པ་ཙམ་དུ་དེའི་སྐད་ཅིག་ཐང་ཅིག་ཡུད་ཙམ་ལ་བདག་གི་གཙུག་ལག་ཁང་དུ་མི་སྣང་བར་གྱུར་ནས་ཤར་ཕྱོགས་སུ་སངས་རྒྱས་ཀྱི་ཞིང་བརྒྱ་སྟོང་ཕྲག་བརྒྱད་ཅུ་འདས་ནས་འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ཞེས་བྱ་བར་ཕྱིན་པར་གྱུར་ཏེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྒྲགས་པའི་དཔལ་ཞེས་བྱ་བ་བཞུགས་སོ། །འཚོའོ་གཞེས་སོ། །བྱང་ཆུབ་སེམས་དཔའ་འབའ་ཞིག་ལ་ཆོས་ཀྱང་སྟོན་ཏོ། །དེ་ན་ཕྱིར་མི་ལྡོག་པའི་ཆོས་ཀྱི་འཁོར་ལོ་གཅིག་ཀྱང་བསྐོར་ཏོ། །ཡང་འཇིག་རྟེན་གྱི་ཁམས་དེ་ན་རྒྱུ་རིན་པོ་ཆེ་སྣ་བདུན་ལས་བྱས་པའི་ཤིང་མེ་ཏོག་དང་འབྲས་བུ་སྣ་ཚོགས་དང་ལྡན་པ་དག་ཡོད་དེ། རིན་པོ་ཆེའི་ཤིང་དེ་དག་རླུང་གིས་བཏབ་པ་ལས་སངས་རྒྱས་ཀྱི་སྒྲ་སྐད་འབྱུང་། ཆོས་ཀྱི་སྒྲ་སྐད་འབྱུང་། བྱང་ཆུབ་སེམས་དཔའི་ཕྱིར་མི་ལྡོག་པའི་དགེ་འདུན་གྱི་སྒྲ་སྐད་འབྱུང་ངོ་། །འདི་ལྟ་སྟེ་འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ཞེས་བྱ་བ་ནི་འཇིག་རྟེན་གྱི་ཁམས་དེར་དཀོན་མཆོག་གསུམ་གྱི་སྒྲ་དང་མི་འབྲལ་བས་ན་རྟག་ཏུ་སྒྲ་སྒྲོགས་ཞེས་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བསྒྲགས་པའི་དཔལ་དེའི་ཞབས་ལ་འཇམ་དཔལ་གཞོན་ནུར་གྱུར་པས་མགོ་བོས་ཕྱག་འཚལ་ནས་བཅོམ་ལྡན་འདས་དེ་བཞིན་གཤེགས་པ་བསྒྲགས་པའི་དཔལ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་སངས་རྒྱས་ཀྱི་ཞིང་འདི་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དག་མི་མཇེད་ཀྱི་འཇིག་རྟེན་གྱི་ཁམས་སུ་རྒྱལ་པོ་མ་སྐྱེས་དགྲའི་ཁབ་ཏུ་བདག་དང་ལྷན་ཅིག་ཏུ་མཆོད་སྟོན་འཚལ་བར་བཀའ་སྩལ་དུ་གསོལ། དེ་ནས་དེ་བཞིན་གཤེགས་པ་བསྒྲགས་པའི་དཔལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག་ཁྱེད་ལས་གང་འདོད་པ་རྣམས་འཇམ་དཔལ་གཞོན་ནུར་གྱུར་པ་དང་འགྲོགས་ཏེ། མི་མཇེད་ཀྱི་འཇིག་རྟེན་གྱི་ཁམས་སུ་དེང་ཤིག། དེ་ནས་བྱང་ཆུབ་སེམས་དཔའི་འཁོར་དེ་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་ཉིས་སྟོང་གིས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་བདག་ཅག་ནི་མི་མཇེད་ཀྱི་འཇིག་རྟེན་གྱི་ཁམས་དེ་ན་རྒྱལ་པོ་མ་སྐྱེས་དགྲའི་ཁབ་ཏུ་འཇམ་དཔལ་གཞོན་ནུར་གྱུར་པ་དང་མཆོད་སྟོན་འཚལ་དུ་མཆིའོ།