།དེ་ནས་ཤཱ་རིའི་བུ་ཁྱེའུ་གཉིས་པོ་དེ་དག་ཁྱེའུ་དེའི་རྗེས་སུ་སློབ་པར་གྱུར་ནས་བདག་བདག་གི་མགུལ་ནས་མུ་ཏིག་གི་སེ་མོ་དོ་བཀྲོལ་ཏེ། ཚིགས་སུ་བཅད་པ་འདི་སྨྲས་སོ། །ཡང་དག་རྫོགས་པ་འོད་པ་རྒལ། །མྱ་ངན་སྤངས་པ་སེམས་གྲོལ་བ། །སྡིག་མེད་ཡང་དག་ཆོས་གནས་ལ། །བདག་ཅག་གཉིས་ནི་མཆོད་པ་བགྱིད། །དེ་ནས་ཁྱེའུ་དེས་ཁྱེའུ་གཉིས་པོ་དེ་དག་ལ་འདི་སྐད་ཅེས་སྨྲས་སོ། །ཁྱེའུ་ཁྱེད་གཉིས་སྦྱིན་པའི་ཆོས་འདིས་ཅིར་སྨོན། དེ་ནས་ཁྱེའུ་གཅིག་གིས་སྨྲས་པ། བདག་ནི་བཅོམ་ལྡན་འདས་འདིའི་གཡས་ཕྱོགས་ན་ཤེས་རབ་དང་ལྡན་པའི་མཆོག་དེ་ཇི་ལྟ་བ་བཞིན་དུ་གྱུར་ཅིག །ཁྱེའུ་གཉིས་པས་སྨྲས་པ། བདག་ནི་བཅོམ་ལྡན་འདས་འདིའི་གཡོན་ཕྱོགས་ན་རྫུ་འཕྲུལ་དང་ལྡན་པའི་མཆོག་དེ་ཇི་ལྟ་བ་བཞིན་དུ་གྱུར་ཅིག །དེ་ནས་ཁྱེའུ་དེས་སྨྲས་པ། བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ་ཐམས་ཅད་གཟིགས་པ། ཕྱོགས་ཐམས་ཅད་དུ་སྣང་བར་མཛད་པ། སེང་གེའི་འགྲོས་སུ་གཤེགས་པ། འདི་ཇི་ལྟ་བ་དེ་བཞིན་དུ་གྱུར་ཅིག་ཅེས་ཤཱ་རིའི་བུ་ཁྱེའུ་དེས་ཚིག་དེ་སྐད་སྨྲས་མ་ཐག་ཏུ་བར་སྣང་ལས་ལྷའི་བུ་བརྒྱད་སྟོང་གིས་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །སྐྱེས་བུ་དམ་པ་ཁྱོད་ཀྱིས་ཚིག་དེ་ལེགས་པར་སྨྲས་སོ། །ལྷ་དང་འཇིག་རྟེན་དུ་བཅས་པའི་རྟེན་དུ་སེམས་བསྐྱེད་དོ། །དེ་ནས་ཤཱ་རིའི་བུ་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པས་བསྙེན་བཀུར་བྱེད་པ་བློ་གྲོས་རྒྱ་མཚོ་ཞེས་བྱ་བ་ལ་བཀའ་སྩལ་པ། དགེ་སློང་ཁྱོད་ཀྱིས་ཁྱེའུ་མུ་ཏིག་གི་སེ་མོ་དོ་ཐོགས་ཏེ། འོང་བ་འདི་གསུམ་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེའུ་བར་མ་ཚུར་འོང་བ་འདི་ནི་འདི་འདྲ་བའི་བསམ་པས་འོང་སྟེ། གོམ་པ་འདོར་བ་དང་། འཇོག་པ་ཐམས་ཅད་ལ་འཁོར་ལོས་སྒྱུར་བའི་རྒྱལ་སྲིད་བརྒྱ་སྟོང་གི་དགེ་བའི་རྩ་བ་ཡོངས་སུ་ལེན་ཏོ། །དེ་བཞིན་དུ་བརྒྱ་བྱིན་འཐོབ་པ་དང་། ཚངས་པ་འཐོབ་པ་བརྒྱ་སྟོང་ཡོངས་སུ་ལེན་ཏོ། །གོམ་པ་ཐམས་ཅད་ལ་སངས་རྒྱས་བརྒྱ་སྟོང་མངོན་པར་མཐོང་བའི་དགེ་བའི་རྩ་བ་ཡོངས་སུ་ལེན་ཏོ། །