།དེ་བཞིན་གཤེགས་པ་གཟི་བརྗིད་སྣང་བ་ལ། །གསེར་གདུགས་ཡུ་བ་བཻ་དཱུརྱས་བྱས་པ། །ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་འོད་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་བྱམས་པའི་སྟོབས་དེ་ལ། །བྱུག་པ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དུས་མཁྱེན་འོད་ནི་རྫ་མཁན་ཚེ། །དེ་བཞིན་གཤེགས་པ་ཟླ་བའི་དཔལ་དེ་ལ། །ཁམ་པ་དག་ལས་བྱས་པའི་ལྷུང་བཟེད་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དྲན་པའི་དབང་པོ་ཚོང་དཔོན་ཚེ། །དེ་བཞིན་གཤེགས་པ་ཞི་བའི་འོད་དེ་ཡི། །ལམ་དུ་ཟམ་པ་དག་ནི་བཙུགས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཞལ་བཟངས་ཕྲེང་རྒྱུད་ཚེ། །དེ་བཞིན་གཤེགས་པ་སྤྱན་ནི་སྡུག་དེ་ལ། །མེ་ཏོག་ཀུ་མུ་ད་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཐོགས་མེད་རྒྱལ་མཚན་འདྲེག་མཁན་ཚེ། །དེ་བཞིན་གཤེགས་པ་ཟླ་ལྡན་དབྱངས་དེ་ཡི། །ཕྱག་གི་སེན་མོ་དག་ནི་བཅད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བྱང་ཆུབ་མཆོག་བགྲོད་ལམ་སྟོན་ཚེ། །དེ་བཞིན་གཤེགས་པ་བདུད་རྩིའི་གཟུགས་དེ་ཡི། །སྤྱན་སྔར་ལམ་དག་མཚོན་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤྱོད་གསལ་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ཆོས་ཀྱི་བློ་གྲོས་ལ། །མུ་ཏིག་དོ་ཤལ་དག་ནི་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་དགྱེས་པ་ཕྱག་དར་པ། །བྱེད་ཚེ་བདེ་གཤེགས་ཟླ་བ་ཆེན་པོ་ལ། །མཆོད་ཕྱིར་གླིང་བུ་དག་ནི་བུས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཆོས་ཀྱི་དབང་ཕྱུག་དགེ་སློང་ཚེ། །ཆོས་རྣམས་ཡང་དག་གཟུང་ཕྱིར་སེམས་བཏུད་ནས། །དེ་བཞིན་གཤེགས་པ་ཐོགས་མེད་དབྱངས་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྷ་ཐམས་ཅད་པ་གསེར་རྟོག་ཚེ། །དེ་བཞིན་གཤེགས་པ་ལྷ་ཡི་མེ་ཏོག་ལ། །གསེར་གྱིས་སྤར་བ་བཀང་སྟེ་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།