སྙོམས་པར་འཇུག་པ་ཐམས་ཅད་ཐོགས་པ་མེད་པ་གང་ཡིན་པ་དེ་ནི་ཐུག་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་ཐུག་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་སེམས་ཅན་ལ་དམིགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། བྱམས་པ་སྔོན་དུ་འགྲོ་བའི་སྦྱིན་པས་ཡི་དགས་ཀྱི་ཡུལ་རྣམ་པར་སྦྱོང་བར་བྱེད་པ་གང་ཡིན་པ་དེ་ནི་སེམས་ཅན་ལ་དམིགས་པའི་སྦྱིན་པའི་ཕ་རོལ་ཏུ་ཕྱིན་པའོ། །དུད་འགྲོའི་སྐྱེ་གནས་རྣམ་པར་སྦྱོང་བར་བྱེད་པའི་ཚུལ་ཁྲིམས་གང་ཡིན་པ་དེ་ནི་སེམས་ཅན་ལ་དམིགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཉེས་པ་བྱས་པ་ཐམས་ཅད་བཟོད་ཅིང་སེམས་ཅན་དམྱལ་བ་སྦྱོང་བར་བྱེད་པ་གང་ཡིན་པ་དེ་ནི་སེམས་ཅན་ལ་དམིགས་པའི་བཟོད་པའི་ཕ་རོལ་ཏུ་ཕྱིན་པའོ། །བསྡུ་བའི་དངོས་པོ་རྣམ་པ་བཞི་དང་འཐུན་པར་ཕ་རོལ་གནོན་ཅིང་ལྷ་མ་ཡིན་གྱི་སྐྱེ་བ་ཡོངས་སུ་སྦྱོང་བ་གང་ཡིན་པ་དེ་ནི་སེམས་ཅན་ལ་དམིགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བདག་ཉིད་ཉེ་བར་བཟུང་ནས་སེམས་ཅན་ལ་བདེ་བ་བསྒྲུབ་པ་ནི་དཔེར་ན་མི་འཁྲུགས་པའི་ཐུགས་དམ་ལས། ཕ་རོལ་གྱི་གཞི་ལས་འཚོ་ཞིང་ཐུགས་དམ་བཅུ་མཛད་པ་ལྟ་བུ་དང་། མི་རྣམས་ཡོངས་སུ་སྤྱོད་པར་འགྱུར་བ་གང་ཡིན་པ་དེ་ནི་སེམས་ཅན་ལ་དམིགས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །ཀུན་རྫོབ་ཀྱི་བདེན་པ་ལ་གནས་ནས་སེམས་ཅན་རྣམས་ལ་ཆོས་རྒྱ་ཆེན་པོ་རབ་ཏུ་དབྱེ་བ་འབྱེད་ཅིང་སྟོན་ལ། ཉོན་མོངས་པ་རྣམ་པར་བྱང་བ་ལ་གནས་པ་གང་ཡིན་པ་དེ་ནི་སེམས་ཅན་ལ་དམིགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་སེམས་ཅན་ལ་དམིགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ཆོས་ལ་དམིགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འདོད་པས་སྦྱིན་པ་གང་ཡིན་པ་དེ་ནི་ཆོས་ལ་དམིགས་པའི་སྦྱིན་པའི་ཕ་རོལ་ཏུ་ཕྱིན་པའོ། །སྨོན་པ་མེད་པའི་ཏིང་ངེ་འཛིན་གྱི་རྣམ་པར་ཐར་པའི་སྒོ་སྐྱེས་པའི་ལུས་དང་། ངག་དང་། སེམས་ཀྱི་སྡོམ་པ་གང་ཡིན་པ་དེ་ནི་ཆོས་ལ་དམིགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སྙིང་རྗེ་ཆེན་པོ་ལ་དམིགས་པའི་བཟོད་པ་གང་ཡིན་པ་དེ་ནི་ཆོས་ལ་དམིགས་པའི་བཟོད་པའི་ཕ་རོལ་ཏུ་ཕྱིན་པའོ།