།ལྷ་རྫས་རྒྱལ་མཚན་མཆོག་གིས་མཛེས་པར་བྱས། །དེ་བཞིན་གཤེགས་པ་ཚངས་པའི་དབྱངས་སྐྱེ་བའི། །ཡུལ་ནི་སྒྲ་སྙན་པ་དག་གྲག་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་དཔག་ཚད། །ཉི་ཤུ་རྩ་ལྔ་ཡབ་ནི་ཚངས་བཟངས་ཡིན། །ཚངས་པའི་དབྱངས་ཞེས་བྱ་བ་རྒྱལ་བའི་ཡུམ། །སྲས་པོ་ཚངས་བྱིན་བརྟུལ་ཞུགས་རིམ་གྲོ་པ། །སྙིང་རྗེའི་མིག་ཅེས་བྱ་བ་མཁས་པ་སྟེ། །ཚངས་དབང་བདག་ཉིད་ཆེན་པོ་རྫུ་འཕྲུལ་ཅན། །འདུས་པ་ལན་གྲངས་ལྔ་སྟེ་ཀུན་ལ་ཡང་། །ཆགས་པ་ཞི་བའི་ཡིད་དང་ལྡན་དེ་དག །བྱེ་བ་ཕྲག་ནི་སྟོང་སྟོང་འབྱུང་བར་འགྱུར། །མི་ཚེ་ལོ་གྲངས་དག་ནི་ཁྲི་ཡང་ཡིན། །རྒྱལ་བའི་དམ་ཆོས་ལོ་གྲངས་སྟོང་ཕྲག་ནི། །ཉི་ཤུ་རྩ་བདུན་བར་དུ་གནས་པར་འགྱུར། །རྒྱལ་བའི་སྐུ་གདུང་དག་གི་མཆོད་རྟེན་ནི། །དཔག་ཚད་སུམ་ཅུ་པ་གཅིག་འབྱུང་བར་འགྱུར། །དེ་བཞིན་གཤེགས་པ་ཡོན་ཏན་མཆོག་མ་ཡི། །སྐྱེ་ཡུལ་ལག་མཆོག་དག་གིས་བརྒྱན་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བཅུ་གཉིས་ཡབ་ནི་ལག་མཆོག་ཡིན། །ཀླུ་འོད་མ་ཞེས་བྱ་བ་རྒྱལ་བའི་ཡུམ། །སྲས་པོ་ལྔ་པ་གཉིད་སྤངས་རིམ་གྲོ་པ། །གླུ་དབྱངས་ཞེས་ནི་བྱ་བ་མཁས་པ་སྟེ། །མགོན་པོ་མཐོང་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གཉིས་ཀུན་ལའང་། །དེར་ནི་ཐམས་ཅད་དག་ཀྱང་འདུས་འགྱུར་ཏེ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །མཚུངས་མེད་རྒྱལ་བ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་ཕྲག་བཅུ་དྲུག་གནས། །འཇིག་རྟེན་ཕན་ཕྱིར་རྒྱལ་བའི་སྐུ་གདུང་དག །རྒྱས་པར་འགྱུར་ཞིང་འཕེལ་བ་དག་ཏུ་འགྱུར། །དེ་བཞིན་གཤེགས་པ་འབྲུག་སྒྲ་དབྱངས་དག་གི། །སྐྱེ་བའི་ཡུལ་ནི་གྲགས་པའི་དབྱངས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་རྣམ་པར་གྲགས། །དབྱངས་མཆོག་མ་ཞེས་བྱ་བ་རྒྱལ་བའི་ཡུམ། །སྲས་པོ་སྐད་སྙན་ཡིད་འཐད་རིམ་གྲོ་པ། །དབྱངས་སྙན་པ་ཞེས་བྱ་བ་མཁས་པ་སྟེ། །དྲག་ཤུལ་སྐད་འབྱིན་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་ཀུན་ལ་ཡང་། །སྲིད་པ་གསུམ་ལས་རྒལ་བའི་ཡིད་ལྡན་པ། །བྱེ་བ་ཕྲག་ནི་སུམ་ཅུ་སུམ་ཅུ་ཡོད། །མི་ཚེ་ལོ་གྲངས་སུམ་ཁྲི་ཉིས་སྟོང་ཡིན།