།འཇིག་རྟེན་བཀྲ་ཤིས་པ་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་རྩ་གསུམ་སྟེ། །ཀུན་ལའང་སྲིད་པ་ཀུན་ལ་མ་ཆགས་པ། །བྱེ་བ་ཕྲག་ནི་གཉིས་གཉིས་ཡོད་པར་འགྱུར། །མི་ཚེ་ལོ་གྲངས་བྱེ་བ་སུམ་ཅུ་གཉིས། །རྒྱལ་བ་མྱ་ངན་འདས་ཀྱང་དམ་ཆོས་དག །ལོ་གྲངས་བྱེ་བར་ཐེ་ཚོམ་མེད་པར་གནས། །མཆོད་རྟེན་གྲངས་ནི་ཐེར་འབུམ་ཕྲག་གཉིས་ཏེ། །ན་བཟའ་བརྒྱ་སྟོང་སྙེད་ཀྱིས་རྣམ་པར་བརྒྱན། །དེ་བཞིན་གཤེགས་པ་སེང་གེའི་འོད་ཟེར་གྱི། །སྐྱེ་བའི་ཡུལ་ནི་དྲག་ཤུལ་ངེས་ཞེས་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བྱེ་བ་ཡབ་ནི་གྲོགས་བཟང་ཡིན། །དོན་ལྡན་ང་རོ་ཞེས་བྱ་ཡུམ་ཡང་ཡིན། །སྲས་པོ་དོན་ལྡན་དོན་ཆེན་རིམ་གྲོ་པ། །དགེ་བ་དགའ་ཞེས་བྱ་བ་མཁས་པ་སྟེ། །བདག་བརྟགས་པ་ཞེས་བྱ་བ་རྫུ་འཕྲུལ་ཅན། །འདུས་པ་དག་ནི་ལན་གྲངས་བདུན་ཅུ་སྟེ། །ཐམས་ཅད་ལ་ཡང་ང་རྒྱལ་སྤངས་པ་པོ། །བྱེ་བ་སྟོང་ཕྲག་དག་ནི་མཐའ་ཡང་ཡས། །མི་ཚེ་ལོ་གྲངས་ཆིག་ཁྲི་བཞི་སྟོང་ཡིན། །རྒྱལ་བའི་དམ་ཆོས་ལོ་གྲངས་ཆིག་ཁྲི་དང་། །གཞན་ཡང་སུམ་ཁྲི་དྲུག་སྟོང་བར་དུ་གནས། །མཆོད་རྟེན་བྱེ་བ་ཕྲག་ནི་སྟོང་སྙེད་དེ། །གསེར་གྱི་རྒྱལ་མཚན་དག་གིས་འཁོར་བར་བསྐོར། །དེ་བཞིན་གཤེགས་པ་རྣམ་པར་སྣང་མཛད་ཀྱི། །སྐྱེ་བའི་ཡུལ་ནི་གྲགས་པ་ཚད་མེད་ཡིན། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བྱེ་བ་ཡབ་ནི་ལྷ་ལེགས་ཡིན། །མི་ཡིས་མཆོད་ཅེས་བྱ་བ་རྒྱལ་བའི་ཡུམ། །སྲས་པོ་དགའ་བྱེད་བརྟན་ལྡན་རིམ་གྲོ་པ། །དཔའ་བརྟན་ཞེས་ནི་བྱ་བ་མཁས་པ་སྟེ། །མཐུ་རྩལ་ནོར་གནས་པ་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཏེ་དགྲ་བཅོམ་གྲངས། །བྱེ་བ་ཕྲག་ནི་ཆིག་ཁྲི་ཆིག་སྟོང་དང་། །ཉིས་བརྒྱ་དྲུག་ཅུ་དག་ནི་འབྱུང་བར་འགྱུར། །སྐུ་ཚེ་ལོ་གྲངས་ཉི་ཁྲི་ཉིས་སྟོང་ཡིན། །རྒྱལ་བའི་དམ་པའི་ཆོས་ནི་ལོ་གྲངས་དག །ཆིག་ཁྲི་བདུན་སྟོང་བར་དུ་གནས་རྒྱལ་བའི། །སྐུ་གདུང་མཆོད་རྟེན་དཔག་ཚད་གཉིས་པ་གཅིག །ནོར་བུའི་དྲ་བ་དག་གིས་རྣམ་པར་བརྒྱན། །ཐ་བ་མེད་པ་གྲགས་པ་མཆོག་དག་གི། །སྐྱེ་བའི་ཡུལ་ནི་གྲགས་པའི་འོད་ཅེས་བྱ།