།མཆོད་རྟེན་བྱེ་བ་བརྒྱ་ཕྲག་བདུན་ཅུ་འབྱུང་། །དེ་བཞིན་གཤེགས་པ་བློ་གྲོས་འོད་འཕྲོ་ཡི། །སྐྱེ་བའི་ཡུལ་ནི་བསོད་ནམས་ལྡན་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །ཞིང་རྣམས་ཁྱབ་ལྡན་ཡབ་ནི་འོད་བཟངས་ཡིན། །དཔལ་གཟི་མ་ཞེས་བྱ་བ་ཡུམ་ཡིན་ནོ། །སྲས་པོ་གཟི་སྡུག་གྲགས་པ་རིམ་གྲོ་པ། །ཡོན་ཏན་བརྒྱན་ཅེས་བྱ་བ་མཁས་པ་སྟེ། །སྲིད་པ་སྐྲག་པར་བྱེད་པ་རྫུ་འཕྲུལ་ཅན། །འདུས་པ་ལན་གྲངས་ཁྲི་ཕྲག་བཞི་ཡིན་ཏེ། །ཀུན་ལའང་རྣམ་ཐར་བརྒྱད་ལ་གནས་གྱུར་པ། །བྱེ་བ་བརྒྱ་ཕྲག་སུམ་ཅུ་གཉིས་གཉིས་ཡོད། །རྒྱལ་བའི་སྐུ་ཚེ་ལོ་གྲངས་བརྒྱ་ཡང་ཡིན། །མྱ་ངན་འདས་ནས་འགྲོ་ལ་ཕན་པའི་ཕྱིར། །དམ་ཆོས་ལོ་གྲངས་སྟོང་གི་བར་དུ་གནས། །རྒྱལ་བའི་སྐུ་གདུང་རིལ་གཅིག་མཆོད་རྟེན་གཅིག །དཔག་ཚད་བདུན་ཅུ་པ་སྟེ་རྒྱལ་མཚན་བརྒྱན། །དེ་བཞིན་གཤེགས་པ་རི་བོའི་རྒྱལ་མཚན་གྱི། །སྐྱེ་ཡུལ་མཆོད་རྟེན་རྨད་དུ་བྱུང་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་ཤེད་སྐྱེས་ཡིན། །ཐ་སྤངས་མ་ཞེས་བྱ་བ་རྡུལ་བྲལ་ཡུམ། །སྲས་པོ་ལྷ་དགའ་སྐར་རྒྱལ་རིམ་གྲོ་པ། །ཐོས་པ་རྒྱ་མཚོ་ཞེས་བྱ་མཁས་པ་སྟེ། །རྒོལ་བ་རྣམ་པར་འཇོམས་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་ཏིང་འཛིན་ཞི་བ་རིམ་བསྒོམས་པ། །དགྲ་བཅོམ་འཁྲུག་མེད་བྱེ་བ་བྱེ་བ་ཡོད། །མི་ཚེ་ལོ་གྲངས་སྟོང་ཕྲག་བཅུ་ཡང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སྟོང་ཕྲག་བཅུ་ནི་ཚང་བར་གནས། །མཆོད་རྟེན་བཟང་པོ་བྱེ་བ་ཕྲག་གསུམ་སྟེ། །མེ་ཏོག་བ་དན་རྒྱལ་མཚན་མཆོག་གིས་བརྒྱན། །བདེ་བར་གཤེགས་པ་རིན་ཆེན་སྤོས་བཟངས་ཀྱི། །སྐྱེ་བའི་ཡུལ་ནི་སྤོས་ཀྱིས་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བྱེ་བ་བརྒྱད་ཅུ་ཡབ་ནི་ལེགས་ཡིད་གཞུངས། །སྤོས་ཀྱི་མཆོད་རྟེན་ཞེས་བྱ་རྒྱལ་བའི་ཡུམ། །སྲས་པོ་ནོར་སྲེད་དགའ་བ་རིམ་གྲོ་པ། །རབ་ཞི་མཆོག་ཅེས་བྱ་བ་མཁས་པ་སྟེ། །མཆོད་རྟེན་མཆོག་ཅེས་བྱ་བ་རྫུ་འཕྲུལ་ཅན། །