།དམ་ཆོས་ལོ་གྲངས་ཉིས་སྟོང་བར་དུ་གནས། །དེ་ཡི་སྐུ་གདུང་རིལ་གཅིག་མཆོད་རྟེན་གཅིག །གསེར་གྱི་སྲོག་ཤིང་དཔག་ཚད་གཅིག་ཏུ་འཕགས། །སྲིད་མཐར་མཛད་པ་དཔལ་གྱི་སྙིང་པོ་ཡི། །སྐྱེ་བའི་ཡུལ་ནི་སྐྱེ་བོ་དགའ་ཞེས་བྱ། །རིགས་ནི་བྲམ་ཟེ་འོད་ནི་དཔག་ཚད་གཅིག །དེ་ཡི་ཡབ་ནི་ཟླ་བའི་སྟོབས་ཞེས་བྱ། །ཨུ་བེ་ཞེས་བྱ་ཡུམ་ཡིན་ཟླ་བ་སྲས། །བརྩོན་འགྲུས་བདེ་བའི་དབང་པོ་རིམ་གྲོ་པ། །ནོར་གྱི་འབྱུང་གནས་ཞེས་བྱ་ཤེས་རབ་ཅན། །བསམ་གཏན་དབང་ཕྱུག་ཞེས་བྱ་རྫུ་འཕྲུལ་ཅན། །དགོངས་པ་དྲི་མ་མེད་པའི་དགེ་སློང་དག །འདུས་པ་དང་པོར་ལྔ་ཁྲི་བཞི་སྟོང་ཡོད། །གཉིས་པར་དྲུག་ཁྲི་གསུམ་པར་བརྒྱད་ཁྲི་ཡོད། །སྐུ་ཚེ་ལོ་གྲངས་སྟོང་ཕྲག་ལྔ་བཅུ་ཡིན། །དམ་པའི་ཆོས་ནི་ལོ་གྲངས་འབུམ་དུ་གནས། །རྐང་གཉིས་མཆོག་མ་དེ་ཡི་མཆོད་རྟེན་ཡང་། །གཅིག་འབྱུང་དཔག་ཚད་བཞི་ཙམ་ཁོར་ཡུག་ཏུ། །གདུགས་བཀབ་དྲིལ་བུ་གཡེར་ཁའི་དྲ་བས་ཁྱབ། །དེ་བཞིན་གཤེགས་པ་སྲིད་མཐའ་གཟིགས་པ་ཡི། །སྐྱེ་བའི་ཡུལ་ནི་དགའ་བས་མཐོང་ཞེས་བྱ། །རིགས་ནི་རྒྱལ་རིགས་འོད་བཟངས་དཔག་ཚད་དག །སུམ་ཅུ་གསུམ་ཡོད་ཡབ་ནི་རྣམ་པར་གནོན། །དེ་ཡི་ཡུམ་ནི་ཟླ་བའི་འདབ་ལྡན་མ། །སྲས་པོ་རྗེ་བཙན་སྦེད་པ་རིམ་གྲོ་པ། །སྐྱེ་བའི་འོད་ཅེས་བྱ་བ་མཁས་པའི་མཆོག །རླུང་ལྟར་འགྲོ་ཞེས་བྱ་བ་རྫུ་འཕྲུལ་ཅན། །འདུས་པ་དང་པོར་དགེ་སློང་བརྒྱད་ཁྲི་ཡོད། །གཉིས་པར་དགུ་ཁྲི་གསུམ་པར་བྱེ་བ་ཡོད། །སྐུ་ཚེ་ལོ་གྲངས་སྟོང་ཕྲག་བརྒྱ་ཡང་ཡིན། །མྱ་ངན་འདས་ནས་དམ་པའི་ཆོས་རྣམས་ཀྱང་། །ལོ་གྲངས་བྱེ་བའི་བར་དུ་གནས་པར་འགྱུར། །དེ་བཞིན་གཤེགས་པ་ཐེ་ཙོམ་མི་མངའ་བ། །དེ་ཡི་སྐུ་གདུང་རྣམས་ཀྱང་རྒྱས་འགྱུར་ལ། །མཆོད་རྟེན་བྱེ་བ་བརྒྱ་ཕྲག་དགུ་བཅུ་གཅིག །དེ་བཞིན་གཤེགས་པ་གློག་གི་འོད་དག་གི། །སྐྱེ་བའི་ཡུལ་ནི་སྨན་ཅེས་བྱ་བ་ཡིན། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་གཉིས་ཡོད་བདེ་བའི་དབང་པོ་ཡབ། །དེ་ཡི་ཡུམ་ནི་ཡན་ལག་དགའ་ཞེས་བྱ། །སྲས་པོ་སྟོབས་བརྟན་ཆོས་ནི་རིམ་གྲོ་པ། །ནོར་ལྷ་ཞེས་ནི་བྱ་བ་མཁས་པ་སྟེ། །སྙན་པར་སེམས་ཞེས་བྱ་བ་རྫུ་འཕྲུལ་ཅན།