འོན་ཏེ་མི་འཚལ་ན་ལྷའི་གནས་ནས་སླར་ཡང་འབབ་པར་འགྱུར་རོ། །གཞན་ཅི་ལྟར་རང་གི་བློ་གྲོས་དང་། ཡིད་ལ་བསམས་པའི་དགོས་པ་ཐམས་ཅད་བགྱིད་པར་འགྱུར་ཞིང་ཐམས་ཅད་དུ་གྲུབ་པར་འགྱུར་ཏེ། དེ་ལ་སོམ་ཉི་དང་ཡིད་གཉིས་བསྐྱེད་པར་མི་བགྱིའོ། །འཁོར་ལོའི་ཞགས་པ་སྒྲུབ་པའི་ཆོ་གའོ།། །།དེ་ནས་རིག་སྔགས་འཆང་པདྨའི་ཞགས་པ་སྒྲུབ་པར་འཚལ་བས། རིག་སྔགས་འཆང་དེ་གཙང་མ་ལེགས་པར་བཀྲུས་ཏེ་གོས་གཙང་མ་བགོ་བར་བགྱིའོ། །ནུབ་གསུམ་མཆིས་སམ། ནུབ་ལྔ་མཆིས་སམ། ནུབ་གཅིག་མཆིས་ནས་རིག་སྔགས་འཆང་གིས་ཞགས་པའི་སྐུད་པ་བསྒྲུབ་པར་བགྱི་སྟེ། རས་ཀྱི་སྐུད་པའམ་པདྨའི་སྐུད་པ་བཻ་ཌཱུརྱའི་ཁ་དོག་ལྟ་བུར་ཚོན་གྱིས་ཁ་བསྒྱུར་བར་བགྱི་ཞིང་ཁྲུ་ཉི་ཤུ་རྩ་གཅིག་བཀལ་ཏེ། དེ་ལ་ཡང་པདྨ་བགྱིས་ཏེ། རིན་པོ་ཆེ་སྣ་བདུན་གྱི་འདབ་མ་ཁ་ཕྱེ་བ་སོར་བཞི་བའི་ཚད་ཀྱིས་པདྨ་གསེར་གྱི་འདབ་མ་དང་། དངུལ་གྱི་འདབ་མ་དང་། བཻ་ཌཱུརྱ་དང་། ཨིན་དྲ་ནཱི་ལ་དང་། རིན་པོ་ཆེ་ཀ་ཏི་ཀ་ལས་བགྱི་ཞིང་མུ་ཏིག་གིས་བསྐོར་བ་བགྱི་སྟེ། དེ་ནས་ཞགས་པ་ལ་བཏགས་པར་བགྱིའོ། །ཞགས་པའི་ཐོར་ཏོ་གཅིག་ལ་ནི་པདྨའི་ཕྱག་རྒྱ་གདགས་པར་བགྱིའོ། །དེ་ནས་ལེགས་པར་བརྒྱན་པའི་ཆོས་ཀྱི་སྟན་བཟང་པོ་བཤམ་པར་བགྱིའོ། །བའི་ལྕི་བས་དཀྱིལ་འཁོར་བགྱིས་ལ་དཀྱིལ་འཁོར་གྱི་སྟེང་དུ་དྲིའི་པདྨ་བསམས་པར་བགྱི་ཞིང་། དཀྱིལ་འཁོར་གྱི་སྟེང་དུ་ཆོས་ཀྱི་སྟན་བཤམས་ལ། བུམ་པ་གང་བས་བརྒྱན་པར་བགྱིའོ། །མེ་ཏོག་གི་སིལ་མ་བཀྲམ་ཞིང་ཨ་ག་རུ་དང་། ཙན་དན་དང་། དུ་རུ་སྐའི་བདུག་པ་དབུལ་བར་བགྱིའོ། །མཆོད་ཡོན་དང་ཞབས་བསིལ་གྱི་སྣོད་ཀྱང་གཞག་པར་བགྱིའོ། །པདྨའི་ཞགས་པ་དེ་ཡང་ཆོས་ཀྱི་སྟན་གྱི་སྟེང་དུ་གཞག་པར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་རིག་སྔགས་འཆང་གིས་སྐྱིལ་མོ་ཀྲུང་བཅས་ནས། དོན་ཡོད་པའི་ཞགས་པའི་སྙིང་པོ་ལན་ཁྲི་བཟླས་ཏེ། བཟླས་པའི་ཡུངས་ཀར་རེ་རེ་ནས་དེའི་སྟེང་དུ་གཏོར་བར་བགྱིའོ། །ལན་ཁྲི་རྫོགས་ནས་དེ་ནས་ཚེས་བཅྭ་ལྔའི་ཟླ་བ་ཉ་བའི་ནུབ་མོ་མཆིས་ནས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བགྱིའོ།