གང་དང་གང་དུ་མངག་པ་དེ་དང་དེར་མཆི་བར་འགྱུར་ཏེ། ལྷའི་གནས་སམ། ཀླུའི་གནས་སམ། གནོད་སྦྱིན་གྱི་གནས་སམ། སྲིན་པོའི་གནས་སམ། འབྱུང་པོའི་གནས་སམ། གཞན་ཡང་མངག་གཞུག་པའི་སྒྲུབ་པ་རྣམ་པ་སྣ་ཚོགས་ཡིད་ལ་བསམས་པ་བཞིན་བགྱིད་དོ། །ནགས་སྒྲུབ་པའི་ཆོ་གའོ།། །།དེ་ནས་རིག་སྔགས་འཆང་ཐང་ལ་རྒྱུ་བར་འཚལ་ན། གཙང་མ་ཁྲུས་བགྱིས་པས་གོས་གཙང་མ་བགོ་བར་བགྱི། གནས་དབེན་པ་གཙང་མའི་ས་ཕྱོགས་སུ་དཀྱིལ་འཁོར་གྲུ་བཞིར་བྲིས་ལ། དྲི་སྣ་ཚོགས་ཀྱིས་བྱུག །རོ་སྣ་ཚོགས་དང་ལྡན་པའི་གཏོར་མ་བཤམས་ལ། ཨ་ག་རུའི་བདུག་པ་བསྲེགས་ཏེ་ནུབ་གསུམ་དུ་མཆིས་ནས་འཁོར་ལོ་ཞགས་པའི་ལག་པའི་ཕྱག་རྒྱས་དོན་ཡོད་རྒྱལ་པོའི་སྙིང་པོའི་བཟླས་བརྗོད་སྟོང་རྩ་བརྒྱད་བགྱིས་ཏེ། ལན་སྟོང་རྩ་བརྒྱད་ཚང་བ་དང་། དཀྱིལ་འཁོར་གྱི་དབུས་ནས་དུ་བ་འབྱུང་བར་འགྱུར་ཏེ། ཁྲོ་བོའི་རྒྱལ་པོ་ལན་བདུན་བཟླས་པར་བགྱིའོ། །དེ་ནས་དཀྱིལ་འཁོར་གྱི་དབུས་ནས་སྐྱེས་པ་ནག་པོ་ཆེན་པོའི་ཚུལ་མི་སྡུག་པ། མཆེ་བ་གཙིགས་པ། སྐྲ་གྱེན་དུ་བསྒྲེང་བ། མགོ་འབར་བ། མིག་དམར་བ། མཆུ་དང་ལྕེ་དམར་བ། སེན་མོ་དམར་བ། སྐྲ་སྔོ་བ། དཔུང་པ་མཁྲང་ཞིང་བརྟན་པ། གསུས་པ་འཕྱངས་པོ་མཆོད་ཕྱིར་ཐོགས་པ་དང་ལྡན་པ། མགོ་ལྔ་པ་སྦྲུལ་ལྟར་ལྕེ་བསྒྱུར་བ། སྟག་གི་ཤམ་ཐབས་བགོས་པ། ལག་པ་ན་དགྲ་སྟ་དང་། དྲིལ་བུ་ཐོགས་པ་ཞིག་ལུས་ཕྱེད་ཙམ་ཕྱུང་ནས་ཕྱོགས་བཅུར་ལྟ་བར་བྱེད་དོ། །དེ་ནས་རིག་སྔགས་འཆང་གིས་སྐྲག་པར་མི་བགྱི་སྟེ། བརྟན་པར་བགྱིས་ལ། ཁྲོ་བོའི་རྒྱལ་པོ་བཟླས་ནས། འཁོར་ལོའི་ཞགས་པ་འཕངས་ཏེ་མགོ་བཅད་ལ་ཁྲག་མང་དུ་བྱུང་བ་དང་། རིག་སྔགས་འཆང་གིས་ཁྲག་དེས་ལུས་ཐམས་ཅད་བྱུག་པར་བགྱིའོ། །བྱུགས་པ་ཙམ་གྱི་མོད་ལ་བདག་ཉིད་ཀྱི་ལུས་མི་ཆོད་པ་དང་། མི་ཤིགས་པས་རྡོ་རྗེར་བྱིན་གྱིས་བརླབས་པར་འགྱུར་རོ། །མིག་གཉིས་ཕྱུང་ལ་རང་གི་མིག་ཕྱིས་ནས་མིག་ལ་བསྐུས་ན་ལྷའི་མིག་ཏུ་འགྱུར་རོ། །རྐང་བྲུས་ཏེ་བྱུགས་ན་ཚེ་བསྐལ་པ་བཅུར་འགྱུར་ཞིང་ཐོས་པ་བསགས་པའི་རྒྱ་མཚོར་འགྱུར།