ཕྲེང་བ་དང་། བྱུག་པ་དང་། གཏོར་མ་འབུལ་བར་བྱེད་པ་དང་། དེ་བཞིན་དུ་ཁྲུས་དང་། ཉེ་རེག་ཉིད་དང་། གོས་བགོ་བ་དང་། གཙུག་ཏོར་བཅིང་བ་དང་། སྲུང་བ་དང་། གཞན་སྲུང་བ་དང་། དེ་བཞིན་ཉིད་དུ་གྲོགས་སྲུང་བ་དང་། བཟླས་བཞིན་པ་དང་མཉམ་པ་ཉིད་དང་། སྐྱིལ་མོ་ཀྲུང་བཅིང་བ་དང་། སྦྱིན་སྲེག་གི་ལས་དང་། གཞན་སྤྱན་དྲང་བ་ཉིད་དང་། གསང་སྔགས་སྤྱན་དྲང་བ་ཉིད་དང་། དངོས་གྲུབ་སྒྲུབ་པ་ཉིད་དང་། ཐམས་ཅད་ནས་ཐམས་ཅད་དུ་བྱ་བ་ཐམས་ཅད་ཕྱག་རྒྱ་འདིས་བྱེད་དེ། གནས་ཐམས་ཅད་དུ་སོང་བ་དང་། གནས་གྲུབ་པ་དང་། བྱ་བ་ཐམས་ཅད་ལེགས་པར་བསྔགས་པ་དང་། ཐམས་ཅད་དུ་མཆོག་གི་ཕྱག་རྒྱ་དོན་ཡོད་པའི་ལས་རབ་ཏུ་གྲུབ་པ་དང་། ཡོན་ཏན་ཐམས་ཅད་བསྐྱེད་པ་དང་། ཐམས་ཅད་དུ་རིགས་ཐུན་མོང་བའི་དཀྱིལ་འཁོར་དུ། དོན་ཡོད་པ་སྒྲུབ་པ་པོའི་ཕྱག་རྒྱ་དོན་ཡོད་པའི་ཆོ་ག་ཞིབ་མོ་སྒྲུབ་པར་བྱེད་པའོ། །དོན་ཡོད་པའི་ལས་ཞེས་བྱ་བའི་ཕྱག་རྒྱ་འདི། དོན་ཡོད་པའི་མཆོག་སྦྱིན་པ་ཞེས་བྱ་བ་བརྗོད་པར་བྱའོ། །ཕྱག་རྒྱ་ཆེན་པོ་ལྔ་པོ་འདི་རྣམས་རྨད་དུ་བྱུང་བའི་དེ་ཁོ་ན་ཉིད་མཐོང་བ་དང་། དོན་ཡོད་པ་ཐོས་པ་ཉིད་དང་། དོན་ཡོད་པའི་འབྲས་བུ་མཐོང་བ་དང་། དོན་ཡོད་པའི་བསོད་ནམས་བསགས་པའི་དེ་ཁོ་ན་ཉིད་དང་། དོན་ཡོད་པར་སྡིག་པ་ཉམས་པ་དང་། སྒྲིབ་པ་ཐམས་ཅད་ཟད་པ་དང་། ཉོན་མོངས་པ་ཐམས་ཅད་རྣམ་པར་འཇོམས་པའི་ཕྱག་རྒྱ་དང་། དོན་ཡོད་པར་སངས་རྒྱས་རྣམས་མཐོང་བ་དང་། དོན་ཡོད་པར་སངས་རྒྱས་ཀྱི་ཞིང་མཐོང་བ་དང་། དོན་ཡོད་པར་ཚེ་འཕེལ་བར་བྱེད་པའི་ཕྱག་རྒྱ་དང་། དོན་ཡོད་པར་དངོས་གྲུབ་ཀྱི་མཆོག་སྦྱིན་པར་བྱེད་པ་མཆོག་ཏུ་གྱུར་པའོ། །སྙིང་པོ་དང་། ཕྱག་རྒྱ་འདི་འཇིག་རྟེན་དབང་ཕྱུག་གིས་སེམས་ཅན་ཐམས་ཅད་ལ་ཕན་པའི་དོན་དུ་བསྒྲགས་པའོ། །རིག་སྔགས་འཆང་རྣམས་ཀྱིས་ཁྱད་པར་དུ། ཉིན་མཚན་དུ་དང་། ཐུན་མཚམས་སུ་ཡང་། ཕྱག་རྒྱ་འདི་འཆིང་ན། བཀྲ་ཤིས་པའི་མཆོག །བསོད་ནམས་དང་། དག་པ་དང་། སྡིག་པ་ཉམས་པ་དང་། དོན་ཡོད་པའི་དངོས་གྲུབ་དམ་པར་གྱུར་པའི་མཆོག་སྦྱིན་པར་བྱེད་དོ།