དཀྱིལ་འཁོར་ཐམས་ཅད་དུ་གཙོ་བོ་སྟེ། གང་གིས་ཕྱག་རྒྱ་འདི་འཆིང་བ་དེ། གངྒཱའི་ཀླུང་གི་བྱེ་མ་བྱེ་བ་བརྒྱ་སྟོང་ཕྲག་གི་ཕྱག་རྒྱ་རྣམས་ཇི་ལྟ་བ་བཞིན་དུ་བཅིངས་པར་འགྱུར་རོ། །སྡིག་པ་དང་། ཉོན་མོངས་པ་མི་བཟད་པ་དང་། གདུག་པ་ཐམས་ཅད་རྣམ་པར་ཉམས་པར་བྱེད་དོ། །བསོད་ནམས་ཀྱི་ཕུང་པོ་བརྒྱ་སྟོང་ཕྲག་བསྐྱེད་པར་འགྱུར་རོ། །དགེ་བའི་རྩ་བ་རྣམས་ཀུན་ནས་བསྐྱེད་པར་འགྱུར་རོ། །ཕྱག་རྒྱ་འཛིན་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱིས་རྣམ་པར་གཟིགས་པར་བྱེད་ཅིང་དགོངས་པར་བྱེད་དེ་ཐེ་ཙོམ་མེད་དོ། །བྱང་ཆུབ་སེམས་དཔའ་ཐམས་ཅད་དུ་མཆོག་སྦྱིན་པར་འགྱུར་རོ། །ལྷ་རྣམས་ཀྱིས་རྟག་པར་རྒྱུན་དུ་སྲུང་བར་བྱེད་དོ། །ཕྱག་རྒྱ་འདིའི་ཕན་ཡོན་སྔར་བརྗོད་པས་གཞལ་དུ་མེད་ཅིང་གྲངས་མེད་ལ་ཚད་མེད་པར་རབ་ཏུ་བསྒྲགས་ཤིང་ཐེ་ཙོམ་མེད་དོ། །ཕྱག་རྒྱ་འདི་མཐོང་བ་དང་། བཅིངས་པ་ཙམ་གྱིས་བསོད་ནམས་ཀྱི་ཕུང་པོ་རབ་ཏུ་བསྐྱེད་དོ། །ལག་པ་གཡས་པའི་མཐིལ་དུ་གཅིག་བརྐྱངས་ལ། དཔུང་པ་བསྐུམས་ཏེ། མིང་མེད་དང་། མཐེ་བོང་གི་སོར་མོ་འདུད་ལ་མཐེ་ཆུང་བསྐུམ་པར་བྱའོ། །མིང་མེད་ཀྱི་མཐར་རེག་ལ། གུང་མོ་བསྐུམས་ལ་སྡིགས་མཛུབ་རབ་ཏུ་བརྐྱངས་ཏེ། སྙིང་གའི་གནས་སུ་འདི་གཡོ་བ་ཙམ་མོ། །མེ་ཏོག་གམ། དྲི་དང་། བདུག་པ་དང་། ཕྲེང་བ་དང་། བྱུག་པ་དང་། གོས་སམ། རྒྱན་དང་། སྤུད་པ་རྣམས་ཀྱང་ལག་པ་གཡོན་དུ་བཟུང་ནས་དབུལ་བར་བྱ་སྟེ། དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་དང་། ལྷ་རྣམས་དང་། དེ་བཞིན་དུ་རིག་པའི་རྒྱལ་པོ་རྣམས་དང་། དེ་བཞིན་དུ་དཀྱིལ་འཁོར་པའི་ལྷ་རྣམས་ཀྱི་དེ་རྣམས་ཐམས་ཅད་མཆོད་པར་འགྱུར་རོ། །ལྷ་རྫས་ཀྱི་མཆོད་པ་བླ་ན་མེད་པ་དང་། མཆོག་དང་། རབ་མཆོག་དང་། གྱ་ནོམ་པའི་མཆོད་པ་འདི་རྣམས་བྱེད་དེ། རོ་སྣ་ཚོགས་པའི་བཟའ་བ་རྣམས་དང་། རོ་བརྒྱ་བའི་འབྲས་བུ་རྣམ་པ་སྣ་ཚོགས་པ་དང་། བཏུང་བ་རྣམ་པ་སྣ་ཚོགས་པ་བདུད་རྩི་བཅུད་ཀྱིས་ལེན་གྱི་མཆོད་པ་འདི་རྣམས་བྱེད་དོ།