།འཆི་འཕོ་ཞིང་སྐྱེ་བ་བརྗེས་པའི་དུས་སུ་སོན་ཏེ་འཆི་བའི་མཐར་ཐུག་པ་ན། དེ་བཞིན་གཤེགས་པ་བྱེ་བ་ཕྲག་དགུ་བཅུ་རྩ་གཉིས་མངོན་སུམ་དུ་སྟོན་ཞིང་སྣང་བར་འགྱུར་རོ། །ལམ་ཉེ་བར་སྟོན་པར་བྱེད་ཅིང་དབུགས་འབྱིན་པར་བྱེད་དོ། །སངས་རྒྱས་ཀྱི་ཞིང་སྣ་ཚོགས་པ་རྣམས་སུ་སྐལ་བ་མཉམ་པ་ཉིད་ཀྱི་སྐྱེ་བར་བྱེད་དེ། རྒྱན་ཐམས་ཅད་ཀྱིས་བརྒྱན་པར་པདྨ་ལས་བརྫུས་ཏེ་སྐྱེ་བར་འགྱུར་རོ། །སྐྱེས་པ་ཙམ་གྱི་མོད་ལ། སྐྱེ་བ་ཐམས་ཅད་རྗེས་སུ་དྲན་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་གསང་བ་ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། ཆོ་ག་ཞིབ་མོ་དང་། དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་མཐའ་དག་རྫོགས་པར་ཁ་ཏོན་དུ་གནས་པར་བྱེད་དོ། །ཇི་སྲིད་སངས་རྒྱས་ཀྱི་བྱང་ཆུབ་ལ་མཐར་ཐུག་གི་བར་དུ་ཐམས་ཅད་རྒྱལ་མཚན་གྱི་རྩེ་མོར་བཅིངས་ཏེ་གནས་བར་བྱེད་དོ་ཞེས་སོ། །འདི་ནི་སྐྱེ་བའི་ཐ་མར་འགྱུར་ཏེ། མཆོད་པ་དང་། དཀྱིལ་འཁོར་གྱི་ཆོ་ག་འདི་ཐ་ན་དུད་འགྲོའི་སྐྱེ་གནས་སུ་སོང་བའི་རི་དགས་དང་བྱ་དེ་དག་ཐམས་ཅད་ཕྱིར་མི་ལྡོག་པར་འགྱུར་ཞིང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་ཏེ། མིར་གྱུར་པ་རྣམས་ཀྱི་ལྟ་ཅི་སྨོས་སོ། །དེ་ལྟར་ཡོན་ཏན་དང་ཕན་ཡོན་ཆེན་པོའི་མཆོད་པ་ཆེན་པོ་དང་། དཀྱིལ་འཁོར་གྱི་ཆོ་གའོ། །དོན་ཡོད་པ་ནོར་བུའི་མཆོད་པའི་སྙིང་པོའི་གཟུངས་ཀྱི་རྣམ་པར་འཕྲུལ་པ་དང་ཕན་ཡོན་གྱི་ཆོ་གའི་སྒྲུབ་ཐབས་སོ།། །།དེ་ནས་རིག་པའི་རྒྱལ་པོའི་རས་རིས་བཤད་པར་བྱ་སྟེ། སེམས་ཅན་ཐམས་ཅད་ལ་ཕན་པར་བྱེད་པ་སྡིག་པ་ཐམས་ཅད་སེལ་བ་འཕྲལ་དུ་ནད་ཐམས་ཅད་ཟློག་པར་བྱེད་པ་དངོས་གྲུབ་ཐམས་ཅད་བྱེད་པའི་གནས་མཆོག་ཐམས་ཅད་སྦྱིན་པ་བཤད་པར་བྱའོ། །རས་སམ་གོས་གཞན་ནམ། རྒྱ་དར་ལ་ཀུན་ནས་ཁྲུ་བཞི་པ་ལ་གཙང་མས་གཙང་མའི་གནས་སུ་རི་མོ་མཁན་གཙང་མ་ཉིད་ཀྱིས་ཁྲུས་བྱས་གོས་གཙང་མ་བགོས་ཏེ། དྲི་སྣ་ཚོགས་པས་བདུགས་ལ་མཚོན་སྣ་ཚོགས་པ་རྣམ་པར་བཀྲ་ཞིང་ལྷག་མ་མ་ཡིན་པ་སྣོད་གསར་པར་བཞག་པས་རས་རིས་བླ་ན་མེད་པ་བྲི་བར་བྱའོ། །དབུས་སུ་དེ་བཞིན་གཤེགས་པ་ཤཱཀྱ་ཐུབ་པ་བྱ་སྟེ། གཞལ་ཡས་ཁང་གི་ཁང་པ་བརྩེགས་པར་སེང་གེའི་ཁྲི་ལ་པདྨའི་རྫིང་བུར་ཀླུའི་རྒྱལ་པོ་དགའ་བོ་དང་ཉེ་དགའ་བོ་དང་བཅས་པས་བཅོམ་ལྡན་འདས་ལ་མེ་ཏོག་འཐོར་བར་བྱེད་བཞིན་པའོ། །