།འཇིག་རྟེན་པའི་ཆོ་ག་སྣ་ཚོགས་པའི་ཚོགས་དང་། འཇིག་རྟེན་ལས་འདས་ལ་བསོད་ནམས་ཀྱི་ཕུང་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱེ་བ་བརྒྱ་སྟོང་ཕྲག་རྣམས་ནོར་བུ་རིན་པོ་ཆེ་ཆེན་པོ་སྣ་བདུན་གྱིས་བཀང་བ། རིན་པོ་ཆེ་སྣ་བདུན་གྱི་མེ་ཏོག་དང་། གསེར་དང་། དངུལ་གྱི་མེ་ཏོག་གིས་བཀང་བ་རྣམས་ཀྱིས་དུས་གསུམ་པའི་དེ་བཞིན་གཤེགས་པ་ཐམས་ཅད་ལ། དེ་བཞིན་གཤེགས་པ་རེ་རེ་ཞིང་ལ་ཡང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་བཀང་ནས་ཕུལ་བར་འགྱུར་རོ། །མཆོད་པའི་སྤྲིན་ཆེན་པོར་འགྱུར་ཏེ། ཇི་སྲིད་བྱང་ཆུབ་སྙིང་པོ་ལ་མཐར་ཐུག་གི་བར་དུ་མི་ཟད་དེ་དེ་ལྟ་བུའི་བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་པར་འགྱུར་ཞིང་། བསོད་ནམས་ཀྱི་ཕུང་པོ་ཆེན་པོར་ཡང་འགྱུར་ཏེ། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་ཡང་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་བཟླས་པའི་དངོས་གྲུབ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་བཞིན་དུ་ཕན་ཡོན་ཆེན་པོ་དང་། རྣམ་པར་འཕྲུལ་བ་ཆེན་པོ་དང་། སྦྱིན་པ་ཡོངས་སུ་གཏོང་བ་ཆེན་པོ་གང་ཡིན་པ་དང་། བཟླས་པའི་ཆོ་ག་ཆེན་པོ་དང་། མཆོད་པའི་སྤྲིན་ཆེན་པོར་འགྱུར་རོ། །དེ་བཞིན་དུ་ཡོན་ཏན་བསྐྱེད་པ་དང་། རྣམ་པར་འཕྲུལ་པའི་ཆོ་གའི་ཁྱད་པར་སོ་སོར་ཐོབ་བོ། །དུས་རྟག་པར་རྒྱུན་དུ་བཟླས་པའི་ཆོ་ག་དང་ལྡན་པར་འགྱུར་བར་བྱའོ། །རྟག་ཏུ་ཡང་བྱང་ཆུབ་སེམས་དཔའ་ཐམས་ཅད་མཐོང་འདོད་པར་འགྱུར་རོ། །རྟག་ཏུ་ཡང་དགེ་བའི་རྩ་བ་དང་ཡང་དག་པར་འགྲོགས་པར་འགྱུར་རོ། །ལག་ན་རྡོ་རྗེ་གང་ཡང་རིག་པའི་རྒྱལ་པོའི་ཆོ་ག་ཞིབ་མོ་འདི་དོན་ཡོད་པའི་མཆོད་པའི་ནོར་བུའི་སྙིང་པོ་འདི་ཐ་ན་སྒྲ་ཙམ་ཡང་རྣ་བའི་བུ་གར་ལྟུང་བར་འགྱུར་བ་དང་། བྲིས་པ་རྣམས་བལྟ་བ་དང་། པོ་ཏིའམ། ཡི་གེའམ། རྩིག་པའམ་གྱང་ལ་བྲིས་པ་ལྟ་བར་བྱེད་པ་དེ་མཚམས་མེད་པ་ལྔའི་སྡིག་པ་ཐམས་ཅད་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་རོ། །སྔོན་བསགས་པའི་མནར་མེད་པར་གཞོལ་བའི་སྡིག་པ་དང་། སྒྲིབ་པ་དེ་ཐམས་ཅད་རྣམ་པར་ཉམས་པར་བྱེད་དོ། །ཡོངས་སུ་གཏུགས་པར་འགྱུར་རོ། །ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། པདྨ་ལས་བརྫུས་ཏེ་སྐྱེ་བར་འགྱུར་རོ། །ནམ་ཡང་ཕྱིས་མངལ་དུ་གནས་པའི་དྲི་མས་གོས་པར་མི་འགྱུར་རོ།