།ཐམས་ཅད་དུ་སངས་རྒྱས་ཀྱི་ཞིང་ཀུན་ཏུ་དེ་བཞིན་གཤེགས་པ་ཐམས་ཅད་ཀྱིས་མངོན་སུམ་དུ་མཚུངས་པར་ལྷན་ཅིག་ལུང་སྟོན་པ་སོ་སོར་ཐོབ་སྟེ། ནམ་དུ་ཡང་ཕྱིར་ཞིང་རྣམ་པར་གྲོལ་བར་འགྱུར་བ་དང་། ཇི་སྲིད་དུ་སངས་རྒྱས་ཀྱི་བྱང་ཆུབ་ཏུ་བསྟན་པའི་བར་དང་། ཇི་སྲིད་དུ་ཡོངས་སུ་མྱ་ངན་ལས་འདས་པའི་ལུས་སུ་གྱུར་གྱི་བར་དུ་འཇིག་རྟེན་ལས་འདས་པའི་ཕན་ཡོན་དང་། རྣམ་པར་འཕྲུལ་པ་བཀླགས་པས་གྲུབ་པར་འགྱུར་རོ། །དེ་ནས་བཟླས་པ་ཙམ་གྱིས་དངོས་གྲུབ་བཤད་པར་བྱ་སྟེ། སྔ་དྲོ་གཅིག་བཟླས་པ་ཙམ་གྱི་མོད་ལ་མཚམས་མེད་པ་ལྔའི་སྡིག་པ་དང་། མནར་མེད་པའི་མཐར་གཏུགས་པའི་སྡིག་པ་དང་། རི་རབ་ལྷུན་པོ་ཆེན་པོ་བདུན་གྱི་ཚད་ཙམ་བ་སྤུའི་ཁུང་བུ་རེ་རེར་སྒྲིབ་པ་བསགས་པ་དང་། བསྐལ་པ་སྟོང་ཕྲག་ཏུ་བསགས་པའི་སྔོན་གྱི་སྡིག་པ་དང་སྒྲིབ་པ་དེ་རྣམས་ཐམས་ཅད་སྔ་དྲོ་གཅིག་བཟླས་པ་ཙམ་གྱིས་སྡིག་པ་དང་ལས་ཀྱི་སྒྲིབ་པ་རྣམ་པར་ཉམས་པར་བྱེད་དེ། ཟད་པ་དང་ཡོངས་སུ་གཏུགས་པར་འགྱུར་རོ། །དམྱལ་བའི་འགྲོ་བ་ཆེན་པོ་བཅུ་དྲུག་ཏུ་གཞོལ་བ་དེ་རྣམས་ཐམས་ཅད་སྐད་ཅིག་གཅིག་གིས་ཡོངས་སུ་གྲོལ་ལོ། །སྨྱུང་བར་གནས་པ་གཅིག་གིས་བཟླས་པས་དུས་གསུམ་པའི་དེ་བཞིན་གཤེགས་པའི་སངས་རྒྱས་ཀྱི་ཞིང་རྣམས་སུ་ཀུན་ཏུ་བཟང་པོ་ཆེན་པོ་ཉིད་ཐོབ་བོ། །གང་ཡང་དེ་བཞིན་གཤེགས་པའི་རིགས་དང་། པདྨོ་ཡངས་པའི་རྣམ་པར་ཐར་པའི་དཀྱིལ་འཁོར་དང་། དོན་ཡོད་ཞགས་པའི་སྙིང་པོ་ཐམས་ཅད་དུ་དངོས་སུ་རྗེས་སུ་འཇུག་པར་བྱེད་དོ། །ཐམས་ཅད་དུ་དམ་ཚིག་ཆེན་པོ་ཡང་དག་པར་འཛིན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་དངོས་སུ་མཐོང་བ་སྦྱིན་པར་བྱེད་དོ། །དུས་གསུམ་པའི་དེ་བཞིན་གཤེགས་པ་རྣམས་རང་གི་གཟུགས་ཀྱིས་དངོས་སུ་མཐོང་བར་ཉེ་བར་གནས་པར་བྱེད་དོ། །དཀྱིལ་འཁོར་པའི་ལྷ་ཐམས་ཅད་དངོས་སུ་རྗེས་སུ་འབྲང་ཞིང་གནས་ཏེ། རྟག་ཏུ་རྣམ་པར་ལྟ་བར་འགྱུར་ཞིང་ཆེར་བཅིངས་པར་འགྱུར་རོ། །རིག་པའི་རྒྱལ་པོ་ཐམས་ཅད་ཀྱང་རྟག་ཏུ་རྗེས་སུ་འབྲང་ཞིང་དངོས་སུ་མཐོང་བར་གནས་པར་བྱེད་དོ། །བརྒྱ་སྟོང་ཕྲག་བཟླས་པ་ཙམ་གྱིས་ལྕེ་རྡོ་རྗེ་ལྟར་བརྟན་པར་འགྱུར་ཞིང་། རྡོ་རྗེའི་སྙིང་པོ་དང་མཉམ་ཞིང་མཚུངས་པ་དང་། པདྨའི་འདབ་མ་ལྟ་བུའི་ཁ་དོག་དང་འདྲ་བར་འགྱུར་ཏེ། ཕྱིར་ཞིང་དེའི་ལུས་ལ་རེག་པ་ངན་པ་འབྱུང་བར་མི་འགྱུར་རོ།