།འདི་ནི་དེ་བཞིན་གཤེགས་པ་ཐམས་ཅད་ཀྱི་མཆོད་པའི་སྤྲིན་གྱི་རྣམ་པར་འཕྲུལ་པའོ། །འདི་ནི་རྡོ་རྗེའི་སྙིང་པ་ཆེན་པོ་མཐོང་བའོ། །འདི་ནི་མགོའི་སྙིང་པོ་ཆེན་པོའོ། །འདི་ནི་སྣ་ཚོགས་པའི་གཟུགས་ཀྱི་རང་བཞིན་མཐོང་བའོ། །འདི་ནི་དོན་ཡོད་པའི་གཟུགས་དང་དོན་ཡོད་པའི་དངོས་གྲུབ་ཀྱི་རྣམ་པར་འཕྲུལ་པའོ། །འདི་ནི་དེས་ཐམས་ཅད་དུ་འགུགས་པས་ན་ཞགས་པར་བརྗོད་པར་བྱའོ། །དོན་ཡོད་པ་ཡིད་བཞིན་གྱི་ནོར་བུའི་མཆོད་པའི་སྙིང་པོའི་གཟུངས་སུ་བརྗོད་པར་བྱ་སྟེ། དོན་ཡོད་ཞགས་པའི་སྙིང་པོ་འཕགས་པ་སྤྱན་རས་གཟིགས་དབང་ཕྱུག་དམ་པར་གྱུར་པའི་ངོ་བོ་ཉིད་ཀྱི་སྐུ་གཞན་དུ་གྱུར་པ་མཐོང་བ་མཚུངས་པ་སྟེ། དོན་ཡོད་པའི་ནོར་བུའི་མཆོད་པའི་སྙིང་པོའི་གཟུངས་འདི་དག་མཐོང་བ་དང་མཚུངས་པར་འགྱུར་རོ། །བཀླགས་པ་དང་བརྗོད་པ་ཙམ་གྱི་མོད་ལ་དུས་གསུམ་དུ་གཤེགས་པ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྲས་གཅིག་པུར་འགྱུར་རོ། །དེ་བཞིན་གཤེགས་པ་ཐམས་ཅད་ཡོངས་སུ་དག་པའི་སྐུ་ཤིན་ཏུ་དྲི་མ་མེད་ཅིང་ཡོངས་སུ་དག་པ་དང་མཉམ་པར་འགྱུར་ཏེ། དེ་བཞིན་གཤེགས་པའི་སྙིང་པོའི་སྐུར་ཡང་འགྱུར་རོ། །དུས་གསུམ་པའི་དེ་བཞིན་གཤེགས་པ་ཐམས་ཅད་ཀྱིས་ཕྱིར་མི་ལྡོག་པར་ལུང་སྟོན་ཅིང་། བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་རྟག་ཏུ་རྒྱུན་མི་འཆད་པར་མཐོང་བར་འགྱུར་རོ། །ལྷ་ཐམས་ཅད་ཀྱིས་ཡང་དག་པར་དབུགས་འབྱིན་པར་འགྱུར་རོ། །བདུད་ལ་སོགས་པ་དང་། གདུག་པའི་རྨི་ལམ་དང་། ལོག་པར་འདྲེན་པ་ཐམས་ཅད་ཚར་བཅད་པར་བྱས་པར་འགྱུར་རོ། །བཅིང་བ་ལྔས་བཅིངས་ཤིང་གཟིར་བ་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། བརྗེད་བྱེད་དང་། ཚངས་པའི་སྲིན་པོ་རྣམས་ཐམས་ཅད་རིང་དུ་འབྲོས་པར་འགྱུར་རོ། །རིམས་ཐམས་ཅད་དང་། ནད་ཐམས་ཅད་དང་། འབྲས་དང་། ཕོལ་མིག་དང་། རྩོག་ཤུ་དང་། ལྷོག་པ་དང་། མཚན་བར་རྡོལ་བ་དང་། གཡན་པ་དང་། མཛེ་དང་། རྐང་ཤུ་ཐམས་ཅད་རྣམ་པར་ཉམས་པར་བྱེད་དོ། །ལུས་ཀྱི་གཟེར་ཐམས་ཅད་ཉེ་བར་ཞི་བར་བྱེད་དོ། །ཇི་ལྟར་ཤེལ་ཡོངས་སུ་དག་པ་ཇི་ལྟ་བ་བཞིན་དུ་དེ་བཞིན་གཤེགས་པའི་སྐུ་ཡོངས་སུ་དག་པར་འགྱུར་རོ།