འབྲོག་དགོན་པའི་འཇིགས་པ་རབ་ཏུ་ཞི་བར་འདོད་པའི་རིག་སྔགས་འཆང་དེས་རིག་པའི་རྒྱལ་པོ་འབའ་ཞིག་རས་ལ་བྲི་བར་བྱ་སྟེ། དཔལ་ལྷ་མོའི་གཟུགས་དང་། ཁ་དོག་དང་། རྟགས་དང་། དབྱིབས་དང་། རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་དཔག་མེད་ཀྱི་ཅོད་པན་འཆང་བའི་རྒྱལ་པོ་ཆེན་པོ་བཞི་བྲི་བར་བྱའོ། །ཚོན་སྣ་ཚོགས་པ་རྣམ་པར་བཀྲ་བའི་རྒྱལ་མཚན་གྱི་མཆོག་གདགས་པར་བྱའོ། །ཀླུའི་རྒྱལ་པོའི་ཕོ་བྲང་དུ་འཇུག་པར་བྱའོ། །དོན་ཡོད་པའི་ཞགས་པའི་ནོར་བུའི་སྙིང་པོའི་གཟུངས་འདི་ཡང་བརྗོད་པར་བྱ་ཞིང་འཇུག་པར་བྱ་སྟེ། དང་པོར་རྒྱལ་མཚན་གྱི་མཆོག་མཐོང་བ་ཙམ་གྱི་མོད་ལ་བུད་མེད་དང་སྐྱེས་པ་དང་། ཁྱེའུ་དང་། བུ་མོ་ཐམས་ཅད་ཀྱི་ནད་ཐམས་ཅད་དང་། འཇིགས་པ་ཐམས་ཅད་དང་། སྒྲིབ་པ་ཐམས་ཅད་དང་། སྡིག་པ་ཐམས་ཅད་དང་། ནད་ཐམས་ཅད་ཡོངས་སུ་གྲོལ་ལོ། །ཉེས་པར་བྱས་པ་དང་། སྡིག་པ་ཐམས་ཅད་ཡོངས་སུ་གྲོལ་ལོ། །དུག་དང་བྱད་སྟེམས་དང་། ཕྱེ་མའི་སྦྱོར་བའི་དུག་དང་། དུག་གི་འཇིགས་པ་ཐམས་ཅད་ཡོངས་སུ་གྲོལ་ལོ། །དགྲའི་འཇིགས་པ་ཐམས་ཅད་ཡོངས་སུ་གྲོལ་ལོ། །སྡིག་པ་ཐམས་ཅད་ཡོངས་སུ་གྲོལ་ལོ། །རྒྱལ་མཚན་གྱི་མཆོག་ལ་བཏགས་པ་མཐོང་ནས་མཐོང་བ་ཙམ་གྱི་མོད་ཁོ་ན་ལ། སྔོན་གྱི་སྡིག་པ་དང་། སྒྲིབ་པ་དང་། མཚམས་མེད་པ་ལྔའི་འགྲོ་བ་རྣམས་ལས་ཡོངས་སུ་གྲོལ་བར་འགྱུར་ཏེ། འདི་ལ་ཐེ་ཚོམ་དང་། ཡིད་གཉིས་བསྐྱེད་པར་མི་བྱའོ། །དང་པོར་གྲོང་ཁྱེར་གྱི་རྒྱལ་པོའི་ཕོ་བྲང་དུ་རྒྱལ་མཚན་གྱི་མཆོག་འདི་ཞུགས་པ་ཙམ་གྱི་མོད་ལ་མི་ངས་དང་། མུ་གེ་དང་། ཡམས་ཀྱི་ནད་དང་། འབྲོག་དགོན་པའི་ཉེ་བར་འཚེ་བ་དང་། འགོ་བའི་ནད་དང་། འཁྲུག་པ་ཐམས་ཅད་དང་། གདོན་དང་། འབྱུང་པོ་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། གྲིབ་གནོན་དང་། བརྗེད་བྱེད་ཐམས་ཅད་དང་། ལོག་པར་འདྲེན་པའི་འཇིགས་པ་མི་བཟད་པ་ཐམས་ཅད་རབ་ཏུ་ཞི་བར་བྱེད་དོ། །འཐབ་པ་དང་། འཐབ་མོ་དང་། རྩོད་པ་དང་། འགྱེད་པའི་འཇིགས་པ་ཐམས་ཅད་རབ་ཏུ་ཞི་བར་བྱེད་དོ། །ཕ་རོལ་གྱི་དམག་ཚོགས་དང་། ཕྱིར་རྒོལ་བ་དང་། དགྲའི་འཇིགས་པ་ཐམས་ཅད་རབ་ཏུ་ཞི་བར་བྱེད་དོ། །ཆོམ་རྐུན་དང་། གཡོན་ཅན་དང་། རྐུན་མོའི་འཇིགས་པ་ཐམས་ཅད་རབ་ཏུ་ཞི་བར་བྱེད་དོ།