མངོན་པར་དབང་བསྐུར་བས་མངོན་པར་དབང་སྐུར་བར་བྱེད་དོ། །རྡོ་རྗེའི་རིགས་ཀྱི་དངོས་གྲུབ་ཆེན་པོ་དང་། དམ་ཚིག་ཐམས་ཅད་སོ་སོར་ཐོབ་བོ། །བཞི་པར་རྨི་ལམ་མཐོང་བ་ན། ནོར་བུའི་རིགས་ཆེན་པོའི་དཀྱིལ་འཁོར་དང་ཕྱག་རྒྱའི་རིམ་པར་ཕྱེ་བ་དང་ཆོ་ག་ཞིབ་མོ་དང་། རང་གི་རྒྱན་དང་དཀྱིལ་འཁོར་མཐོང་ངོ་། །དེ་བཞིན་གཤེགས་པ་དང་བྱང་ཆུབ་སེམས་དཔའི་ཚོགས་ཐམས་ཅད་ལྷའི་ཚོགས་དང་དཀྱིལ་འཁོར་དུ་གནས་པའི་ལྷ་དང་། རིག་པའི་རྒྱལ་པོ་ཡང་མཐོང་སྟེ། དེ་ལ་ཡང་རབ་ཏུ་འཇུག་པར་བྱེད་དོ། །ཕྱག་རྒྱ་དང་། དམ་ཚིག་དང་། ཆོ་ག་དང་བཅས་པ་རྗེས་སུ་ཐོབ་སྟེ། མངོན་པར་དབང་བསྐུར་བ་ཡང་རབ་ཏུ་ཐོབ་བོ། །དངོས་གྲུབ་ཆེན་པོ་དང་མཆོག་སྦྱིན་ཡང་སོ་སོར་ཐོབ་ཅིང་ཐམས་ཅད་དུ་མངོན་པར་དབང་བསྐུར་བར་ཡང་འགྱུར་རོ། །ལྔ་པར་རྨི་ལམ་མཐོང་བ་ན་རྣམ་པར་ཐར་པའི་དཀྱིལ་འཁོར་དུ་བརྟགས་པ་དང་། དོན་ཡོད་ཞགས་པའི་དཀྱིལ་འཁོར་དུ་བརྟགས་པ་དང་། པོ་ཊ་ལ་ཀའི་རིའི་གཞལ་མེད་ཁང་དང་བཅས་པ་མཐོང་ངོ་། །དེ་བཞིན་གཤེགས་པ་དང་། བྱང་ཆུབ་སེམས་དཔའི་ཚོགས་ཐམས་ཅད་དང་། ལྷ་དང་བཅས་པ་དང་། རིག་པའི་རྒྱལ་པོའི་དཀྱིལ་འཁོར་ཀྱི་ལྷ་རྣམས་མཐོང་སྟེ། དེ་ལ་ཡང་འཕགས་པ་སྤྱན་རས་གཟིགས་དབང་ཕྱུག་རང་ཉིད་སེམས་ཅན་དེ་ལ་རབ་ཏུ་འཇུག་པར་བྱེད་དོ། །དམ་ཚིག་དང་ཕྱག་རྒྱ་དང་། དཀྱིལ་འཁོར་དང་གསང་སྔགས་དང་གཟུངས་ཀྱི་དངོས་གྲུབ་སོ་སོར་ཐོབ་པོ། །རང་ཉིད་ཀྱང་དོན་ཡོད་པའི་རིག་སྔགས་ཀྱི་དབང་གིས་མངོན་པར་དབང་བསྐུར་ཏེ། མངོན་པར་དབང་སྐུར་བར་བྱེད་དོ། །ཆོ་ག་ཞིབ་མོ་ཐམས་ཅད་དང་། དངོས་གྲུབ་ཀྱང་རྗེས་སུ་སྩོལ་བར་བྱེད་དོ། །མཆོག་ཐམས་ཅད་རབ་ཏུ་སྦྱིན་པ་སོ་སོར་ཐོབ་བོ། །དྲུག་པར་རྨི་ལམ་མཐོང་བ་ན། དཀྱིལ་འཁོར་ཆེན་པོ་མཐོང་སྟེ། འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་བ་མཐོང་ངོ་། །གཞལ་མེད་ཁང་དང་བཅས་པའི་བྱང་ཆུབ་སེམས་དཔའི་ཚོགས་དང་། ལྷ་དང་། ཀླུ་དང་། གནོད་སྦྱིན་དང་དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མཐོང་སྟེ་དེ་ལ་ཡང་རབ་ཏུ་འཇུག་པར་བྱེད་དོ། །ཕྱག་རྒྱ་དང་གསང་སྔགས་དང་དམ་ཚིག་དང་མངོན་པར་དབང་བསྐུར་བ་སོ་སོར་ཐོབ་སྟེ། རིག་སྔགས་ཐམས་ཅད་ཀྱི་དངོས་གྲུབ་ཀྱི་མཆོག་སྦྱིན་པ་སོ་སོར་ཐོབ་བོ།