ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་དེའི་ལག་ཏུ་ཕྱིན་པར་མི་འགྱུར་རོ། །མི་ཐོས་ཤིང་མི་མཐོང་ལ། མིང་གི་སྒྲ་གྲགས་པ་ཙམ་དུའང་མི་འགྱུར་རོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་པར་འགྱུར་བ་དེས་ནི། ལག་ན་རྡོ་རྗེ་གངྒཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་དུས་གསུམ་མཉམ་པ་ཉིད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དེའི་ལག་ཏུ་སོན་པར་འགྱུར་རོ། །དེ་བཞིན་གཤེགས་པ་དེ་རྣམས་ཀྱི་དྲུང་དུ། རིགས་ཀྱི་དམ་ཚིག་གི་དཀྱིལ་འཁོར་དང་། ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། སྙིང་པོ་དང་། གསང་བའི་ཆོ་ག་ཞིབ་མོ་ཐམས་ཅད་ལག་ཏུ་སོན་པར་འགྱུར་རོ། །གནས་ཐམས་ཅད་དུ་སོང་ཞིང་རྗེས་སུ་ཞུགས་པར་འགྱུར་རོ། །ཐམས་ཅད་རྗེས་སུ་སོང་ཞིང་། དམ་ཚིག་ཤེས་པར་འགྱུར་རོ། །རིག་སྔགས་ཐམས་ཅད་དང་། གསང་སྔགས་རིམ་པར་ཕྱེ་བ་དང་། ཕྱག་རྒྱ་ཡང་དག་པར་སྤྱོད་པར་འགྱུར་རོ། །རིག་སྔགས་འཆང་ཐམས་ཅད་ཀྱི་མཆོག་དང་། གཙོ་བོ་དང་ཐུ་བོར་འགྱུར་རོ། །དེ་བཞིན་གཤེགས་པ་དེ་རྣམས་ཐམས་ཅད་ཀྱི་དྲུང་ན། སྲས་ཀྱི་གཙོ་བོར་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཀྱིས་ལུང་སྟོན་པར་འགྱུར་རོ། །དགེ་བའི་རྩ་བ་ཉེ་བར་སྟོན་པ་དང་། བསོད་ནམས་ཀྱི་ཚོགས་ཡོངས་སུ་འཛིན་པར་འགྱུར་རོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་ཅིང་ཐོབ་པར་འགྱུར་བའི་སེམས་ཅན་གང་ཡིན་པ་དེ་ནི། དེའི་ཡོན་ཏན་དང་། ཕན་ཡོན་གཞལ་དུ་མེད་པ་ཐོབ་པར་འགྱུར་རོ། །རིག་སྔགས་ཀྱི་རྒྱལ་པོ་འདི། གང་གི་ལག་ཏུ་སོན་པར་འགྱུར་བ་དེ། སངས་རྒྱས་ཀྱི་ཕུན་སུམ་ཚོགས་པ་ཐམས་ཅད་སོ་སོར་རྙེད་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། རིག་སྔགས་ཀྱི་རྒྱལ་པོ་འདི་སྨྲས་ནས། རང་གི་གཟུགས་ཀྱི་བདག་ཉིད་ཀྱི་དངོས་པོ་པདྨའི་ཟེ་འབྲུའི་དབུས་སུ་རིག་སྔགས་ཀྱི་རྒྱལ་པོ་འཕགས་པར་བལྟས་ནས། དོན་ཡོད་པ་ཡིད་བཞིན་ནོར་བུའི་འོད་ཅེས་བྱ་བ་ནོར་བུ་རིན་པོ་ཆེ་ཆེན་པོ་རིག་སྔགས་ཀྱི་རྒྱལ་པོ་བཅོམ་ལྡན་འདས་ལ་ཕུལ་བར་གྱུར་ཏོ། །ཨོཾ་ཨ་མོ་གྷ་ཙིནྟཱ་མ་ཎི་བར་ད་པདྨེ་ཛྭ་ལ་ཛྭ་ལ་ན་བྷུ་ཛེ་ཧཱུྃ།