གསང་སྔགས་རིམ་པར་ཕྱེ་བ་དང་། སྙིང་པོའི་མཐུ་རབ་ཏུ་འཇུག་པར་འགྱུར་རོ། །དམ་ཚིག་གི་དཀྱིལ་འཁོར་གསང་བར་རབ་ཏུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཆོ་ག་ཞིབ་མོའི་རྗེས་སུ་འཇུག་པར་འགྱུར་རོ། །རིག་སྔགས་ཀྱི་རྒྱལ་པོ་འདི་ལན་ཅིག་བཟླས་པ་དེ་རྣམས་ཀྱང་། དེ་བཞིན་གཤེགས་པ་རྣམས་ཀྱི་དྲུང་དུ། འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྙིང་པོ་དང་། ཕྱག་རྒྱ་དང་། གསང་བའི་དཀྱིལ་འཁོར་གྱི་དམ་ཚིག་དང་། གསང་སྔགས་ཆེན་པོ་རིམ་པར་ཕྱེ་བའི་སྒྲུབ་པ་ལ་རྗེས་སུ་འཇུག་པར་འགྱུར་རོ། །དེ་ཅིའི་ཕྱིར་ཞེ་ན། ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་ནི། རྫུ་འཕྲུལ་ཆེ་བའི་ཕྱིར་ཏེ། འདི་ལྟ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཀྱི་དྲུང་དུ། སྙིང་པོ་དང་། ཕྱག་རྒྱ་རིམ་པར་ཕྱེ་བ་དང་། དཀྱིལ་འཁོར་གསང་བ་ལ་རབ་ཏུ་ཞུགས་ཤིང་དབང་བསྒྱུར་བའི་རྗེས་སུ་ཞུགས་པ་ནི་རིག་སྔགས་ཀྱི་རྒྱལ་པོའི་སྙིང་པོར་གྱུར་པ་གཅིག་པུའོ། །འདི་ལྟ་སྟེ། འོ་མ་དང་ཆུ་ཡང་དག་པར་འབྱུང་བ་བཞིན་ནོ། །སྙིང་པོ་གཅིག་པོ་འདི། རིགས་ཐམས་ཅད་ཀྱི་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོའི་རྗེས་སུ་ཞུགས་པའོ། །དེས་ན་ལག་ན་རྡོ་རྗེ་ཁྱོད་ཀྱིས་རིག་སྔགས་ཀྱི་རྒྱལ་པོ་འདི། ཀུན་ནས་རྗེས་སུ་འཇུག་པ་ཞེས་བྱའོ། །ལག་ན་རྡོ་རྗེ་རྒྱུ་དེས་ན། རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རིག་སྔགས་ཀྱི་རྒྱལ་པོ་འདི། མིང་ལན་ཅིག་གཟུང་བ་ཙམ་གྱིས་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་དྲུང་དུ། གསང་བ་ཐམས་ཅད་ཀྱི་སྙིང་པོ་དང་། གཟུངས་དང་། གསང་སྔགས་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོ་རབ་ཏུ་སྟོན་པ་དང་། མཚན་གཟུང་བར་བྱས་པར་འགྱུར་རོ། །དུས་གསུམ་དུ་གཤེགས་པའི་དེ་བཞིན་གཤེགས་པ་དེ་རྣམས་ཀྱི་དྲུང་དུ། བསོད་ནམས་ཀྱི་ཕུང་པོ་ཆེན་པོ་ཡོངས་སུ་གཟུང་བར་འགྱུར་རོ།