དེ་ལྟ་བས་ན་མཁས་པས་སུ། །རྟག་ཏུ་ཀུན་ནས་མཚོན་བཅངས་ན། །སངས་རྒྱས་རྣམས་ནི་དགྱེས་འགྱུར་ཏེ། །སྲས་ཀྱི་ཐུ་བོར་སོམ་ཉི་མེད། །ཕྱག་རྒྱ་རིམ་བྱེད་དམ་པ་འཆང་བ་གང་། །འཇིག་རྟེན་མགོན་པོ་སྲས་ཀྱི་ཐུ་བོར་འགྱུར། །དོན་ཡོད་ཞགས་པའི་སྙིང་པོ་གསང་བ་ཡི། །རྣམ་པར་གྲོལ་བའི་སྙིང་པོ་བླ་ན་མེད། །ཕྱག་རྒྱ་དང་ནི་གསང་སྔགས་དམ་པ་དག །འདི་འཆང་བ་ལ་མྱུར་དུ་འགྲུབ་པར་འགྱུར། །དེ་ནས་དོན་ཡོད་པ་ལས་ཐམས་ཅད་པ་དང་། རྗེས་སུ་མཐུན་པའི་ཞགས་པ་བདུན་བཤད་པར་བགྱི་སྟེ། དེ་ཉིད་གྲུབ་པས་ཅི་ལྟ་བུའི། །ཆོ་གའི་ཆོ་ག་བསྒྲུབ་པ་བཞིན། །སོ་སོ་སོ་སོར་འཚམ་པ་ཡི། །དེ་དག་ཀུན་ནི་རྟོགས་པར་བགྱི། །དེ་ཉིད་གྲུབ་པའི་ཅི་ལྟ་བུའི། །མཚན་ཉིད་གཟུགས་ནི་ཅི་བཞིན་པ། །དེ་ཉིད་བསྒྲུབས་པས་ཞགས་པ་ནི། །སྐུད་པ་ལྔ་ལས་འགྲུབ་འགྱུར་ཏེ། །གསང་སྔགས་འཛིན་པས་མོད་ལ་ནི། །འགྲུབ་པར་འགྱུར་ལ་སོམ་ཉི་མེད། །རས་སྐུད་པདྨའི་སྐུད་པ་དང་། །ཨརྐ་ཁ་ཆེ་དར་དག་གིས། །སྐུད་པ་ཤུན་པའི་སྐུད་པ་སྟེ། །སྐུད་པ་འདི་དག་བཀལ་ནས་དེ་ཁོ་ན་ཉིད་ཀྱི་ཆོ་ག་དང་ཆོ་ག་ཞིབ་མོ་བསྒྲུབས་པས་ཞགས་པ་རས་སྐུད་ཀྱི་རྒྱུ་ལས་བླངས་ཏེ། ཚད་བཞིན་བཀལ་ནས་རྟག་ཏུ་སྨྱུང་བ་བགྱིས་ལ་ལེགས་པར་བཀྲུས་པ། གོས་གཙང་མ་ཅན་ཚངས་པར་སྤྱོད་པས་ཟས་དཀར་གསུམ་འཚལ་ནས་གནས་གཙང་མའི་ཕྱོགས་སུ་དོན་ཡོད་པའི་ཞགས་པའི་སྙིང་པོ་མདོར་ན་བྱམས་པའི་སེམས་དང་ལྡན་པས་དྲན་པར་བགྱིའོ། །དེ་ནས་ཤིན་ཏུ་མཉམ་པར་གཞག་པས་བརྒྱད་བསྒྲིལ་དུ་བཀལ་ཏེ། དོན་ཡོད་རྒྱལ་པོ་ཐལ་མོ་སྦྱར་བས་པདྨ་ཁ་ཕྱེ་བ་ཐོགས་པ་རལ་པའི་ཐོར་ཚུགས་ཀྱིས་བཞུགས་པ། རྒྱན་ཐམས་ཅད་ཀྱིས་བཀླུབས་པའི་ལུས་ཕྱེད་པ་སོར་བཞི་བའི་ཚད་བགྱིའོ། །བགྱིས་ནས་གཟུགས་རྣམ་པ་གསུམ་དུ་བགྱིས་ཏེ། ངེས་པའི་གཟུགས་དང་། ཁྲོ་གཉེར་གྱི་བཞིན་དང་། ཁྲོ་བོའི་རྒྱལ་པོའི་གཟུགས་ཏེ། དངུལ་ལམ་གསེར་ལས་བགྱིའོ། །དེ་ནས་ཞགས་པ་སྲིད་ཀྱི་ཚད་ཁྲུ་བཅུ་དྲུག་པ་ཞགས་པའི་ཐོར་ཏོ་གཅིག་རྡོ་རྗེ་རྩེ་གསུམ་པ་དང་། སྐྱུ་རུ་ར་ལྷན་ཅིག་སྦྲེལ་བ་གདགས་པར་བགྱིའོ། །