།དོན་ཡོད་རྒྱ་ཆེར་སྣང་བ་ཞེས་བགྱི་བའི་རྫུ་འ་ཕྲུལ་འཐོབ་པར་འགྱུར་རོ། །རྫུ་འཕྲུལ་གང་གི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་དཔུང་པ་བསྐུམ་པ་ལས་བརྐྱང་བ་ཙམ་གྱིས་མཆི་ཞིང་སླར་ལྡོག་པར་འགྱུར། བཟླས་བརྗོད་བརྒྱ་སྟོང་བགྱིས་ལ་ཕྱག་རྒྱ་བརྒྱ་སྟོང་བཅིངས་ན། ཚེ་འདི་ཉིད་ལ་འཕགས་པ་སྤྱན་རས་གཟིགས་དབང་ཕྱུག་དང་འདྲ་བར་འགྱུར་རོ། །སྒྱུ་མ་ལྟ་བུའི་ཏིང་ངེ་འཛིན་གྱིས་རྣམ་པར་རོལ་པའི་དོན་ཡོད་པའི་མིག་ཡོངས་སུ་དག་པ་འཐོབ་པར་འགྱུར་རོ། །དབང་ཕྱུག་དང་དབང་ཕྱུག་ཆེན་པོ་དང་། ཚངས་པ་དང་། ལྷའི་བུ་དང་། དྲག་པོ་དང་། དབང་པོ་དང་། ཉི་མ་དང་། ཟླ་བ་དང་། གཞོན་ནུ་དང་། གཤིན་རྗེ་དང་། ཆུ་ལྷ་དང་། ལུས་ངན་ལ་སོགས་པའི་གཟུགས་སྣ་ཚོགས་མཐོང་བར་འགྱུར་རོ། །ཀླུའི་རྒྱལ་པོའི་གཟུགས་རྣམ་པ་སྣ་ཚོགས་ཀྱི་བར་དུ་མཐོང་བར་འགྱུར་རོ། །ཇི་ལྟ་ཇི་ལྟར་སེམས་ཅན་རྣམས་འདུལ་བར་འགྱུར་བ་དེ་ལྟ་དེ་ལྟ་བུའི་གཟུགས་མཐོང་བར་འགྱུར་ཏེ། འདི་ནི་འཇིག་རྟེན་པའི་བཟླས་བརྗོད་སྒྲུབ་པ་འབུམ་ལགས་སོ། །འབུམ་བཟླས་པས་འཇིག་རྟེན་ལས་འདས་པ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན། དེ་བཞིན་གཤེགས་པ་ཐམས་ཅད་མངོན་སུམ་དུ་སྣང་བའང་མཐོང་བར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ལུང་བསྟན་པ་འཐོབ་པར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ཕྱིར་མི་ལྡོག་པར་བྱིན་གྱིས་རླབས་ཀྱིས་བྱིན་གྱིས་བརླབས་པར་འགྱུར་རོ། །ཕྱག་རྒྱ་བཅིངས་ཏེ་སྐྱིལ་མོ་ཀྲུང་བཅས་ནས། སེམས་ཅན་ཐམས་ཅད་ལ་བརྩེ་བ་དང་། འབྱུང་པོ་ཐམས་ཅད་ལ་བྱམས་པ་དང་། སྙིང་རྗེའི་སེམས་ཀྱི་རང་བཞིན་གྱིས་དོན་ཡོད་པའི་ཞགས་པའི་སྙིང་པོ་ལན་ཅིག་བཟླས་བརྗོད་བགྱིའོ། །བཟླས་བརྗོད་བགྱིས་མ་ཐག་ཁོ་ནར་ལན་དྲུག་བརྒྱ་བཞི་བཅུར་བཟླས་བརྗོད་བགྱིས་པར་འགྱུར་རོ། །དེ་བཞིན་གཤེགས་པ་ཐམས་ཅད་དབུགས་འབྱིན་པ་མཛད་ཅིང་དྲན་པ་དང་། བློ་གྲོས་དང་། གཟི་བརྗིད་ལུས་ལ་འཇུག་པར་བགྱིད་དོ། །བཟླས་བརྗོད་བགྱིས་པ་ཙམ་གྱི་མོད་ལ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ།