།ཉིན་མཚན་དུ་གོས་གཙང་མ་བགོ་ཞིང་བཅིང་བར་བྱ། ཤིན་ཏུ་དྲི་མ་མེད་པའི་སེམས་དུ་འགྱུར་བར་བྱ། བྱམས་པ་དང་། སྙིང་རྗེ་མཆོག་ཏུ་འགྱུར་བར་བྱ་ཞིང་། དེ་ནས་ནོར་བུའི་རྫས་སྨྲས་པོ་ཞེས་སོ། །ནོར་བུའི་དཀྱིལ་འཁོར་གྱི་ཆོ་གའོ།། །།དེ་ནས་ལྡོང་རོས་ཀྱི་མིག་སྨན་གྱི་ཆོ་གའི་དཀྱིལ་འཁོར་བཤད་པར་བྱ་སྟེ། རྒྱར་གཟིངས་ཀྱི་ཆའི་མཐར་ཐུག་པས་དཀྱིལ་འཁོར་གྲུ་བཞི་པ་བྱས་ཏེ། དྲི་སྣ་ཚོགས་དང་། རྣམ་པར་བཀྲ་བའི་རིག་སྔགས་འཆང་ནི། གྲྭ་རྣམས་སུ་མཁས་པར་བྲི་བར་བྱའོ། །དབུས་ཀྱི་དཀྱིལ་འཁོར་གྱི་སྙིང་པོར། པདྨ་འདབ་མ་ཕྱེད་ཁ་བྱེ་བའོ། །ལག་པ་གཉིས་ཀྱི་དབུས་སུ་པདྨ་གེ་སར་རྒྱས་པ་འཆང་བའོ། །ཤར་གྱི་སྒོ་རྣམ་པར་ཕྱེ་བ་བྱ་སྟེ། ལྡོང་རོས་དངུལ་གྱི་སྣོད་དུ་བཞག་ནས་དཀྱིལ་འཁོར་དུ་པདྨའི་སྟེང་དུ་དགོད་པར་བྱའོ། །སྣོད་ཀྱི་ཁོར་ཡུག་ཏུ། དར་དམར་པོའི་གོས་བཟང་པོས་གཡོག་པར་བྱའོ། །ཡང་ན་པདྨའི་འདབ་མའམ། ཡང་ན་བྱང་ཆུབ་ཤིང་གི་འདབ་མའམ། ཡང་ན་ཤིང་འཛམ་བུའི་འདབ་མས་གཡོག་པར་བྱའོ། །ཨ་ག་རུའི་བདུག་པ་དབུལ་བར་བྱའོ། །འཕགས་པ་སྤྱན་རས་གཟིགས་དབང་ཕྱུག་དོན་ཡོད་ཞགས་པའི་གཟུགས་འཛིན་པ་པདྨའི་འདབ་མའི་དྲུང་དུ་དགོད་པར་བྱའོ། །མེ་ཏོག་དང་། དྲིས་མཆོད་པ་བྱ། རིག་སྔགས་འཆང་གིས་དཀར་གསུམ་ཟོས་ལ་འཕགས་པའི་ཡན་ལག་བརྒྱད་ཀྱི་བསྙེན་གནས་སུ་འགྱུར་བར་བྱའོ། །ཡང་ན་ཉིན་མཚན་དུ་སྨྱུང་བར་གནས་པ་བྱ། ཟླ་བ་ཡར་ངོ་འམ། ཚེས་བཅོ་ལྔའི་ཉའམ། ཚེས་བཅུ་བཞི་འམ། ཚེས་བརྒྱད་ལ། གཙང་མར་ཁྲུས་བྱས་ཏེ། གོས་གཙང་མ་བགོ་བར་བྱ། དོན་ཡོད་ཞགས་པའི་སྙིང་པོ་བརྒྱ་རྩ་བརྒྱད་བཟླས་ཤིང་། སྙིང་པོ་བརྒྱ་རྩ་བརྒྱད་ཀྱང་བཟླས་པར་བྱ། ཡི་གེ་གཅིག་པ་སྟོང་ཕྲག་བཅུར་བཟླས་ལ། དཀྱིལ་འཁོར་ཉེ་བར་སྤྲས་ཤིང་མེ་ཏོག་དང་། བདུག་པ་དང་། དྲི་དང་། མར་མེ་དང་། གཏོར་མ་དབུལ་བར་བྱའོ། །དེ་ནས་ཡུངས་ཀར་ལ་ལན་ཉི་ཤུ་རྩ་གཅིག་བཟླས་པར་བྱ་སྟེ། དཀྱིལ་འཁོར་གྱི་སྟེང་དུ་འཕང་བར་བྱའོ། །འཕངས་པ་ཙམ་གྱི་མོད་ལ། འཕགས་པ་སྤྱན་རས་གཟིགས་དབང་ཕྱུག་གི་ལུས་ལས་འོད་ཟེར་སྣ་ཚོགས་འབྱིན་པར་བྱེད་དོ།