།དེ་བཞིན་གཤེགས་པ་ཚེ་དཔག་མེད་ཀྱིས་དབུགས་འབྱིན་པར་མཛད་ཅིང་ཕྱག་སྤྱི་བོར་འཇོག་པར་མཛད་དེ། ཚེ་དཔག་ཏུ་མེད་པར་འགྱུར་རོ། གལ་ཏེ་སེམས་ཅན་གཞན་རིགས་ཀྱི་བུའམ། རིགས་ཀྱི་བུ་མོའམ། དགེ་སྦྱོང་ངམ། བྲམ་ཟེའམ། སྐྱེས་པའམ། བུད་མེད་དམ། ཁྱེའུའམ། བུ་མོའམ། ཐ་ན་དུད་འགྲོའི་སྐྱེ་གནས་སུ་སོང་བ་གང་ཞིག་སྡིག་པ་དང་། སྒྲིབ་པ་ཟད་པར་འདོད་ན་རིག་སྔགས་འཆང་ཁྲུས་བྱས་ལ་གོས་གཙང་མ་བགོས། སྨྱུང་བ་བྱས་པ་དེས་དཀྱིལ་འཁོར་ལ་མངོན་དུ་ཕྱོགས་པར་བཞག་ལ། རིག་སྔགས་འཆང་ཆོ་ག་བྱེད་པས་གསང་སྔགས་རྗེས་སུ་དྲན་པར་བྱས་ནས་རྨ་བྱའི་སྒྲོས་བྱབ་པར་བྱའོ། དེ་ཙམ་གྱིས་ཡོན་ཏན་གྱི་ཁྱད་པར་ཐོབ་པར་འགྱུར་ཏེ། སྡིག་པ་དང་། སྒྲིབ་པ་ཐམས་ཅད་ཟད་པར་འགྱུར། ནད་ཐམས་ཅད་དང་། གདུག་པ་ཐམས་ཅད་དང་། །ན་བ་ཐམས་ཅད་དང་། མཚམས་མེད་པ་ཐམས་ཅད་ཟད་པར་འགྱུར་ཏེ། ཐེ་ཚོམ་མེད་དོ། །སྒྲིབ་པ་དང་བྲལ་བ་ཉིད་ཐོབ་པར་འགྱུར་ཞིང་ཚིག་གཟུང་བར་འོས་པར་འགྱུར། ལྷ་ཐམས་ཅད་ཀྱིས་གཟུང་ཞིང་ཀུན་ནས་བསྲུང་བར་འགྱུར། དེ་བཞིན་གཤེགས་པའི་གསུང་ཐོབ་པར་འགྱུར། འཕགས་པ་སྤྱན་རས་གཟིགས་དབང་ཕྱུག་གཟིགས་བཞེད་པར་འགྱུར། ཚེ་རིང་བ་དང་། སྒྲིབ་པ་དང་། ནད་དང་བྲལ་བར་འགྱུར། ཚེ་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར། ཚེ་རབས་སུ་ཚེ་རབས་དྲན་པར་འགྱུར། དགེ་བའི་རྩ་བ་བསོད་ནམས་ཀྱི་ཚོགས་ཐམས་ཅད་དང་ལྡན་པར་འགྱུར་ཏེ། སྙིང་རྗེ་དང་། བྱམས་པ་ཆེན་པོ་ཡིད་ལ་བྱ་བ་རྩེ་གཅིག་ཏུ་བྱ་ཞིང་སྨྱུང་བ་དང་། བཟླས་བརྗོད་བྱའོ། །སྡིག་པ་དང་སྒྲིབ་པ་ཟད་པར་བྱ་བའི་དཀྱིལ་འཁོར་ཆེན་པོའི་ཆོ་གའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། །བམ་པོ་བཅུ་བདུན་པ། དེ་ནས་རྟག་ཏུ་བཟླས་པའི་དཀྱིལ་འཁོར་གྱི་ཆོ་ག་བཤད་པར་བྱ་སྟེ། དཀྱིལ་འཁོར་གྱི་ཚད་ཇི་ལྟ་བ་བཞིན་དུ། ལེགས་པར་ཕྱེ་བ། གྲུ་བཞི་པ། རྒྱར་གཟིངས་ཀྱི་ཚད་ཀྱིས་ཤིན་ཏུ་རྣམ་པར་ཕྱེ་བ་བྱ་སྟེ། དྲིའི་ཚོན་རྩི་རྣམ་པར་བཀྲ་བ་ཀུན་ནས་པདྨའི་ཕྲེང་བ་དང་། རྡོ་རྗེའི་གེ་སར་ལ་བརྟེན་པའི་དབུས་སུ་པདྨ་བྱའོ།