།ཕྱག་རྒྱ་འདི་དག་བཅིང་བགྱིས་ཞིང་། །མཉམ་པར་གཞག་ནས་གསང་སྔགས་བཟླས། །བཅིངས་པ་ཙམ་གྱི་མོད་ནས་ནི། །སྐྱིལ་ཀྲུང་རྡོ་རྗེ་ལྷུན་མཉམ་འགྱུར། །ཀུན་ནས་གོ་ཆར་གྱུར་ནས་ནི། །བགེགས་དང་ལོག་འདྲེན་ཐམས་ཅད་དང་། །གནོད་སྦྱིན་སྲིན་པོ་འབྱུང་པོར་བཅས། །ལྷ་མིན་མཁའ་ལྡིང་གིས་མི་མཐོང་། །ཕྱོགས་དང་ཕྱོགས་ཀྱི་མཚམས་དག་ཏུ། །དེ་དག་ཐམས་ཅད་རྒྱང་རིང་འབྲོས། །བགེགས་མེད་པར་ནི་ལས་འགྲུབ་པས། །བཟླས་པའི་ལས་ལ་སོམ་ཉི་མེད། །ཨོཾ་ཨ་མོ་གྷ་བཛྲ་དྲྀ་ཌྷ་པདྨེ་ཤྭ་ར་ཧཱུྃ། ཐལ་མོ་མཉམ་པར་སྦྱར་ལ་མཛུབ་མོ་དང་གུང་མོ་བཀུག་ནས། མཐེ་བོ་པདྨ་ཁ་ཕྱེ་བ་ལྟར་བགྱིས་ཏེ། དོན་ཡོད་པའི་དབང་ཕྱུག་རྒྱལ་པོའི་ཕྱག་རྒྱའོ། །འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་གསང་སྔགས་དང་ཕྱག་རྒྱ་བཅིང་བར་བགྱིའོ། །ཨོཾ་པདྨེ་ཤྭ་ར་ཨ་མོ་གྷ་བར་དཱ། བི་རི་བི་རི་སྭཱ་ཧཱ། འདིས་ཐོག་མར་བཟླས་བརྗོད་ཉི་ཤུ་རྩ་གཅིག་བགྱིའོ། །དེའི་འོག་ཏུ་ཕྱག་རྒྱ་བཅིངས་ནས། དོན་ཡོད་པའི་ཞགས་པའི་སྙིང་པོ་དེ་ཁོ་ན་ཉིད་སེམས་པའི་བསམ་པ་རྩེ་གཅིག་ཏུ་བཟླས་བརྗོད་བགྱིའོ། །ལན་ཅིག་བཟླས་པ་ཙམ་གྱི་མོད་ལ། དུས་གསུམ་དུ་རྒྱུན་དུ་གཤེགས་པའི་སངས་རྒྱས་འབུམ་ཕྲག་བརྒྱ་སྟོང་གང་གཱའི་ཀླུང་གི་བྱེ་མ་སྙེད་དང་མཉམ་པ་གཡོ་བར་འགྱུར་ཞིང་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས། རིག་སྔགས་འཆང་དེ་ལ་ལེགས་སོ་ཞེས་བགྱི་བ་སྩོལ་བར་འགྱུར་རོ། །དབུགས་འབྱིན་པར་མཛད་དོ། །རིག་སྔགས་འཆང་དེ་ལ་འོད་ཟེར་སྣ་ཚོགས་གཏོང་བར་མཛད་དོ། །མགོན་པོ་འཕགས་པ་སྤྱན་རས་གཟིགས་དབང་ཕྱུག་དྲན་པར་བགྱིས་པ་ཙམ་གྱི་མོད་ལ་མདུན་དུ་མཆིས་པར་འགྱུར་རོ། །འདི་ལྟར་བཅིངས་པ་ཙམ་གྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཕ་རོལ་ཏུ་ཕྱིན་པ་བཅུ་དང་ལྡན་པར་འགྱུར་རོ། །སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་ལྡན་པར་འགྱུར་རོ། །དེ་བཞིན་གཤེགས་པའི་སྟོབས་བཅུ་དང་ལྡན་པར་འགྱུར་རོ། །མི་འཇིགས་པ་བཞི་ཐོབ་པར་འགྱུར་རོ། །འཕགས་པའི་ལམ་ཡན་ལག་བརྒྱད་ཡོངས་སུ་དག་པ་ཐོབ་པར་འགྱུར་རོ།