།།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་མིག་མི་འཛུམས་པར་བཅོམ་ལྡན་འདས་ཀྱི་ཞལ་དུ་བལྟས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ན་བདག་ལ་པདྨ་ཡངས་པའི་དཀྱིལ་འཁོར་པདྨའི་རིགས་ཀྱི་སྙིང་པོར་གྱུར་པ་གསང་བ་དེ་ཁོ་ན་ཉིད་བསྟན་པ་མཆིས་ཏེ། རྣམ་པར་ཐར་པའི་དཀྱིལ་འཁོར་གྱི་གསང་བའི་དོན་ཡོད་པའི་ཞགས་པའི་སྙིང་པོ་ཁྲོ་བོའི་རྒྱལ་པོ་རིག་སྔགས་ཀྱི་རྒྱལ་པོའི་སྙིང་པོ་བཅོམ་ལྡན་འདས་ཀྱི་སྤྱན་སྔར་ངོ་བོ་ཐ་དད་པ་དང་། ཕྱག་རྒྱ་ཐ་དད་པར་དང་། སྔགས་ཐ་དད་པ་དང་། དཀྱིལ་འཁོར་དང་། གཟུགས་བྲི་བ་ཡོངས་སུ་བསྒྲགས་པར་བགྱི། སེམས་ཅན་ཐམས་ཅད་རྗེས་སུ་གཟུང་བའི་སླད་དུ། རིག་སྔགས་འཆང་བ་རྣམས་ཀྱི་དེ་ཁོ་ནར་གྱུར་པ་ནི་འདི་ལགས་ཏེ། རིག་སྔགས་འཆང་བ་ཐམས་ཅད་ཀྱི་གནས་གསང་བའི་དཀྱིལ་འཁོར་པདྨ་ཡངས་པའི་དམ་ཚིག་དོན་ཡོད་པའི་ཞགས་པ་བསྒྲུབ་པའི་ཆོ་ག་རྗེས་སུ་སྩལ་བར་བགྱི་ན་བཅོམ་ལྡན་འདས་དེ་བདག་ལ་གནང་བར་མཛད་ཅིང་། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་བྱིན་གྱིས་བརླབས་པ་དང་། དེ་བཞིན་གཤེགས་པའི་རིགས་དང་། པདྨའི་རིགས་དང་། ནོར་བུའི་རིགས་དང་། རྡོ་རྗེའི་རིགས་དང་། སྤྱིའི་དམ་ཚིག་འགྲུབ་པར་འགྱུར། སྤྱིའི་བྱིན་གྱིས་བརླབས་དང་། རིག་སྔགས་ཀྱི་རྒྱལ་པོའི་དཀྱིལ་འཁོར་དང་། གཟུགས་བྲི་བ་དང་། ཕྱག་རྒྱ་རིམ་པར་ཕྱེ་བ་ལ་རྗེས་སུ་འཇུག་པར་འགྱུར། ཆོ་ག་ཞིབ་མོ་སྒྲུབ་པ་ཐམས་ཅད་ཀྱི་དངོས་གྲུབ་དེ་ཁོ་ན་ཉིད་དུ་འགྱུར། དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་དང་། བྱང་ཆུབ་སེམས་དཔའི་དཀྱིལ་འཁོར་དུ་འཇུག་པའི་དམ་ཚིག་བྱིན་གྱིས་བརླབས་ཀྱི་དེ་ཁོ་ན་ཉིད་དུ་འགྱུར་ལགས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སྙིང་རྗེ་ཆེན་པོ་དང་ལྡན་པ་དོན་ཡོད་པའི་ཞགས་པའི་དམ་ཚིག་རྣམ་པར་ཐར་པ་ཆེན་པོའི་དཀྱིལ་འཁོར་རྣམ་པར་འཕྲུལ་པ། བྱང་ཆུབ་སེམས་དཔའ་ཐམས་ཅད་ཀྱི་དམ་ཚིག་དཀྱིལ་འཁོར་ཆེན་པོ་དང་།