ཆུ་དང་ཡུངས་ཀར་བསྲེས་པ་ལ་ལན་བདུན་བཟླས་བརྗོད་བྱས་ན་ཐམས་ཅད་དུ་སླར་གཤེགས་སུ་གསོལ་བའི་སྔགས་བྱས་པར་འགྱུར་རོ། །གསང་སྔགས་རིམ་པར་ཕྱེ་བའི་ཆོ་ག་དང་བསྒྲུབ་པའི་ཆོ་གའོ།། །།དེ་ནས་ལྷ་མོ་ཆེན་མོ་སྒྲོལ་མ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་ལ་མགོ་བོས་ཕྱག་འཚལ་ནས་ལྷའི་མཆོད་པའི་སྤྲིན་ཆེན་པོས་མཆོད་དེ། ལན་གསུམ་བསྐོར་བ་བྱས་ནས་མགོ་བཏུད་དེ་ཐལ་མོ་སྦྱར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །བཅོམ་ལྡན་འདས་རིག་སྔགས་ཆེན་པོ་འཇིག་རྟེན་དུ་ཆེར་བསྟན་ལགས་སོ། །གསང་བ་ཆེན་པོའི་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོ་དང་། དོན་ཡོད་པའི་ཞགས་པ་པདྨ་གཙུག་ཏོར་གྱི་རིག་སྔགས་ཀྱི་རྒྱལ་པོ་ཆེན་པོའི་སྙིང་པོ་རིག་སྔགས་འཆང་ཐམས་ཅད་ཀྱི་དོན་དང་། སེམས་ཅན་ཐམས་ཅད་ལ་ཕན་པ་དང་། བདེ་བར་བགྱི་བའི་སླད་དུ་འཛམ་བུའི་གླིང་དུ་གཞག་ལགས་སོ། །བཅོམ་ལྡན་འདས་བདག་གིས་ཀྱང་དོན་ཡོད་པ་པདྨ་གཙུག་ཏོར་གྱི་རིག་སྔགས་ཀྱི་རྒྱལ་པོ་དེའི་སྙིང་པོ་དང་། ཆོ་ག་ཞིབ་མོ་དོན་ཡོད་པར་སྒྲོལ་བ་དྲི་མ་མེད་པ་པདྨ་གཙུག་ཏོར་གྱི་ཞགས་པ་ཞེས་བགྱི་བ་རིག་སྔགས་ཀྱི་རྒྱལ་པོའི་སྙིང་པོ་བཤད་པར་བགྱི་སྟེ། རིག་སྔགས་འཆང་གང་གིས་དྲན་པ་ཙམ་གྱིས་བདག་བཀུག་ཅིང་གཡར་དྲངས་པར་འགྱུར། རིག་སྔགས་འཆང་གི་རིག་སྔགས་སྒྲུབ་ཅིང་ཡོངས་སུ་སྤྱོད་པ་ལ་རིམ་གྲོ་བགྱི་བ་དང་། རིག་སྔགས་འཆང་སྒྲུབ་པའི་དངོས་གྲུབ་མཆོག་སྩོལ་བར་བགྱི་བ་དང་། བསམ་པ་ཐམས་ཅད་ཡིད་བཞིན་དུ་ཡོངས་སུ་བསྐང་བར་བགྱི་བ་དེ་བདག་གིས་བཅོམ་ལྡན་འདས་ཀྱི་སྤྱན་སྔར་འཁོར་མང་པོ་འདུས་པའི་མངོན་སུམ་དུ་རིག་སྔགས་ཀྱི་རྒྱལ་པོ་བཤད་པར་བགྱིའོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ལྷ་མོ་སྒྲོལ་མ་ལ་འདི་སྐད་ཅེས་བཀའ་སྩལ་ཏོ། །ལྷ་མོ་ཆེན་མོ་སྒྲོལ་མ་རང་གི་རིག་སྔགས་ཀྱི་རྒྱལ་པོ་དེ་བཞིན་གཤེགས་པ་ངའི་བྱིན་གྱི་རླབས་ཀྱི་ཕྱག་རྒྱས་བྱིན་གྱིས་བརླབས་ཀྱིས་ཤོད་ཅིག།