དོན་ཡོད་པ་ཡི་ཕྱག་རྒྱ་ནི། །ཁྱད་པར་འཕགས་པ་གཞན་ཡང་བསྟན། །རྡོ་རྗེ་ཐལ་མོ་སྦྱར་ནས་སོར་མོ་རྣམས་མཉམ་པར་བཞག་སྟེ། སྲིན་ལག་ཁ་གདེངས་ལ་སོར་མོ་རྣམས་ཡིད་ཙམ་བསྐུམས་པ་ནི། དོན་ཡོད་སྣ་ཚོགས་རྒྱལ་པོ་ཡི། །པདྨའི་ཕྱག་རྒྱ་ཆེན་པོར་བསྒྲགས། །ཕྱག་རྒྱ་འདི་ནི་ལས་ཀུན་དང་། །འཇུག་པའི་ལས་ཀུན་སྦྱར་བ་དང་། །དཀྱིལ་འཁོར་ཕྱག་རྒྱ་མཆོག་ཀུན་གསུངས། །ཕྱག་རྒྱ་འདི་ནི་བཟུང་ཙམ་དང་། །གསང་སྔགས་དམ་པས་བསྲུངས་བགྱིས་ནས། །རིག་སྔགས་འཆང་བ་འཇུག་པར་འགྱུར། །དུས་གསུམ་གཤེགས་པ་རྣམ་ཐར་པའི། །དཀྱིལ་འཁོར་དམ་པ་གྲུབ་པར་འགྱུར། །ཨོཾ་བཛྲེ་བཛྲ། ཨ་དྷི་ཥྛི་ཏེ་པདྨེ་བི་ཤྭ་རཱུ་པ་དྷ་རེ། དྷ་ར་དྷ་ར་ཧཱུྃ། པྲ་བེ་ཤ་ཏུ་སྟྲཻ་ཡ་དྷྭཱ་ནུ་ག་ད་ན་དྷ་རི་ཏུ་ཊི་སྭཱ་ཧཱ། ཕྱག་རྒྱ་འདི་ནི་བཅིངས་ཙམ་གྱིས། །དེ་ཉིད་གྲུབ་པས་ཕྱོགས་བཅུ་ཡི། །སངས་རྒྱས་ཞིང་ནི་རྣམ་དྲུག་ཏུ། །གཡོ་བར་འགྱུར་བ་སོམ་ཉི་མེད། །ཕྱག་ན་པདྨའི་ལུས་འབར་ནས། །མགུ་བ་ཆེན་པོ་འབྱུང་བར་འགྱུར། །རིག་སྔགས་འཆང་ལ་འཛུམ་བཞིན་གྱིས། །རྟག་ཏུ་ལྟ་ཞིང་མདུན་ན་མཆིས། །སངས་རྒྱས་ཀྱི་ནི་ཞིང་ཀུན་དང་། །མཐོ་རིས་སྒོ་རྣམས་འབྱེད་པར་འགྱུར། །སུམ་ཅུ་རྩ་གཉིས་གནས་རྣམས་ན། །གནས་པའི་ལྷ་རྣམས་སྒོ་འབྱེད་ཅིང་། །སུམ་ཅུ་རྩ་གསུམ་གནས་སྒོ་ན། །གནས་པ་ཐམས་ཅད་སྒོ་འབྱེད་དོ། །བདེ་ཅན་འཇིག་རྟེན་ཁམས་དག་ནི། །སྒོ་ན་གནས་པ་སྒོ་འབྱེད་དོ། །ཕྱག་རྒྱ་འདི་ནི་བཅིངས་ཙམ་གྱིས། །གནས་ཀུན་ཏུ་ནི་འཇུག་པར་འགྱུར། །ཕྱག་རྒྱ་སྡིག་པ་ཐམས་ཅད་འཕྲོག །ཉེ་བའི་ཉོན་མོངས་ཐམས་ཅད་འཇོམས། །སྡུག་བསྔལ་ཀུན་ལས་རྣམ་པར་གྲོལ། །གནོད་པ་ཐམས་ཅད་འཇིག་པར་བགྱིད། །དམྱལ་བ་བཅུ་དྲུག་རྣམས་ལས་ཐར། །ཕྱག་རྒྱ་བཅིངས་པ་ཙམ་གྱིས་ནི། །མི་བཟད་འཇིགས་པ་བརྒྱད་རྣམས་དང་། །ཉེས་བྱས་ཐམས་ཅད་འཇིག་པར་བྱེད། །དམྱལ་བའི་སྒོ་ནི་གཅད་པར་འགྱུར། །མི་བཟད་འཇིགས་ལས་བསྒྲལ་བར་འགྱུར། །ཕྱག་རྒྱ་འདི་ནི་མཐོང་ཙམ་གྱིས། །མཚམས་མེད་ལྔ་ནི་བགྱིས་པ་དང་།