།དེའི་འོག་ཏུ་དཀར་ཤམ་མ་གོས་དཀར་པོ་འཆང་བ་བྱའོ། །གཡོན་དུ་སྲིན་མོ་ཆེན་མོ་རལ་པ་གཅིག་མ་བྱ་སྟེ། ཕྱག་བརྒྱད་པ་དྲག་མོ་དྲག་ཏུ་རྒོད་པའི་ཕོ་ཉ་མོ་བྱའོ། །བཞིན་ཁྲོ་གཉེར་ཅན་ཐམས་ཅད་སྐྱིལ་ཀྲུང་ཕྱེད་པས་བཞུགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ་ཐམས་ཅད་པདྨའི་གདན་ལ་བཞུགས་པ་བྱའོ། །སྟེང་དུ་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ལྷའི་དབང་པོ་རྣམས་ནམ་མཁའ་ནས་བཅོམ་ལྡན་འདས་དང་བཅོམ་ལྡན་འདས་ལ་མཆོད་པ་བྱེད་བཞིན་པ་བྱའོ། །འོག་ཏུ་པདྨ་ལ་གཤིན་རྗེ་དང་ཆུ་ལྷ་དང་། ལུས་ངན་དང་གཞོན་ནུ་རྣམས་ཁྲུས་བྱ་སྟེ་སྐྱིལ་ཀྲུང་ཕྱེད་པས་བཞུགས་པ་བྱའོ། །རྒྱལ་པོ་ཆེན་པོ་བཞི་རྣམས་བྱ་སྟེ། དྲག་པོའི་གཟུགས་སྐྱིལ་ཀྲུང་ཕྱེད་པས་བཞུགས་ཏེ་དེ་རྣམས་ཐམས་ཅད་ཀྱང་པདྨ་འཛིན་པའི་གཟུགས་སུ་བྱའོ། །རིག་སྔགས་འཆང་ནི་བཅོམ་ལྡན་འདས་དང་འཕགས་པ་སྤྱན་རས་གཟིགས་དབང་ཕྱུག་གི་ཞབས་དྲུང་དུ་པདྨའི་གདན་ལ་རིག་སྔགས་འཆང་པུས་མོ་བཙུགས་པ་བྱ་སྟེ། པོག་ཕོར་དང་ལག་ན་མེ་ཏོག་གི་ཕོར་པ་དང་། བགྲང་ཕྲེང་འཛིན་པ་བཅོམ་ལྡན་འདས་ཀྱི་ཞལ་ལ་ལྟ་བར་བྱེད་བཞིན་པ་བྱའོ། །དེ་ལྟ་བུའི་རས་རིས་ཀྱི་བྱ་བ་པདྨ་ཡངས་པའི་དཀྱིལ་འཁོར་མཐའ་དང་། རས་རིས་དཀྱིལ་འཁོར་མཐའ་དག་གི་ནང་དུ་གཏོགས་པར་འགྱུར་རོ། །མཐོང་བ་ཙམ་གྱི་མོད་ལ་སྡུག་བསྔལ་དང་སྡིག་པ་དང་ངན་འགྲོ་ཐམས་ཅད་རྣམ་པར་ཉམས་པར་བྱེད་དོ། །ཐམས་ཅད་རབ་ཏུ་ཞི་བར་འགྱུར་རོ། །འགྲོ་བ་ཐམས་ཅད་གཅོད་པར་འགྱུར་རོ། །ཉེས་པར་བྱས་པ་ཐམས་ཅད་འཇོམས་པར་ཡང་འགྱུར་རོ། །སྡིག་པ་དང་སྒྲིབ་པ་ཐམས་ཅད་དང་མཚམས་མེད་པ་ལྔ་ལས་རྣམ་པར་ཐར་བར་བྱེད་དོ། །མཐོང་བ་ཙམ་གྱི་མོད་ལ་དོན་ཡོད་པའི་དངོས་གྲུབ་སོ་སོར་ཐོབ་བོ། སེམས་ཅན་ཐམས་ཅད་ཀྱིས་ཀུན་དུ་བསྐོར་བར་བྱ་བ་དང་མཆོད་པར་བྱ་བའི་འོས་སུ་འགྱུར་རོ། །དགོངས་པ་ཐམས་ཅད་ལེགས་པར་གྲུབ་པར་བྱེད་པར་འགྱུར་རོ། །བདེ་བར་བྱེད་པར་འགྱུར་རོ། །ནོར་དང་། གཟུགས་བྱེད་པ་དང་། བཀྲ་ཤིས་དང་། ལོངས་སྤྱོད་དང་། རིགས་དང་། དབང་ཕྱུག་དང་། སྟོབས་དང་། སྤོབས་པ་དང་། བསོད་ནམས་དང་། སྐལ་བ་བཟང་པོར་བྱེད་པ་དང་། བདག་ཉིད་ཆེན་པོའི་ཡོན་ཏན་གྱི་བྱེ་བྲག་འཕེལ་བ་དང་བསོད་ནམས་བསགས་པ་དང་།