དོན་ཡོད་པའི་ཞགས་པའི་སྙིང་པོའི་མདོ་ལན་ཅིག་བརྗོད་ཅིང་དྲན་པར་བྱས་ན་ཀླུ་དང་། ཀླུ་མོ་དང་། ཀླུའི་བུ་ཕོ་དང་། ཀླུའི་བུ་མོ་ཐམས་ཅད་གནས་ཀུན་ནས་བྱུང་ནས་རིག་སྔགས་འཆང་གི་རྐང་པ་གཉིས་ལ་འདུད་ཅིང་གང་བསྒོ་བ་དེ་དག་ཐམས་ཅད་བྱེད་ལ་འདོད་པ་ཐམས་ཅད་སྦྱིན་ཞིང་དབང་དུ་འགྱུར་རོ། །ལན་གསུམ་སྦྱར་ན་ཀླུའི་རྒྱལ་པོ་རྒྱ་མཚོའང་འོང་ངོ་། །ཀླུའི་རྒྱལ་པོ་དགའ་བོ་དང་། ཉེ་དགའ་བོ་ཡང་འོང་ཞིང་ཐམས་ཅད་བསྒོ་བ་བཞིན་བྱེད་ལ་དབང་དུ་གྱུར་ནས་འདུག་གོ། །གནོད་སྦྱིན་དང་། སྲིན་པོ་དགུག་པར་འདོད་པས་དུར་ཁྲོད་ཀྱི་ནང་དུ་མི་རོ་བསྲེགས་པའི་སོལ་བས་བདུགས་ལ། གསང་སྔགས་རྩ་བ་གསང་མཐོན་པོས་ལན་བདུན་བརྗོད་ཅིང་དྲན་ན་གནོད་སྦྱིན་དང་སྲིན་པོ་དག་རྒྱུག་ཅིང་འོང་ལ། རིག་སྔགས་འཆང་གི་རྐང་པ་གཉིས་ལ་བཏུད་ནས་རྗེ་བཙུན་བཀའ་སྩོལ་ཅིག་ཅེས་ཟེར་བ་དང་། དེའི་ཚེ་རིག་སྔགས་འཆང་གིས་དེ་བསྒོ་བ་ཇི་ལྟ་བ་བཞིན་དུ་བྱས་ན་བསྒོ་བ་ཐམས་ཅད་བྱེད་ལ་མངག་པའི་ལས་བྱེད་པར་འགྱུར་ཞིང་ཇི་སྲིད་འཚོའི་བར་དུ་འདུག་གོ། །ཐོད་པ་སྦྱར་བ་ལ་ལན་བདུན་བཟླས་བརྗོད་བྱས་ནས་ཐོད་པ་བཀང་བའི་བདུག་པས་བདུགས་ན་འབྱུང་པོ་ཐམས་ཅད་ཀུན་ནས་འོང་ཞིང་ཐམས་ཅད་དབང་དུ་འགྱུར་ལ། ལས་བྱེད་པར་འགྱུར་རོ། །གནོད་སྦྱིན་མོ་དབབ་པར་འདོད་པས་བཙག་གིས་གནོད་སྦྱིན་མོ་བྲིས་ལ། བ་ལང་གི་ལྕི་བའི་དཀྱིལ་འཁོར་བྱས་པར་ཕྱེས་པ་པདྨའི་རི་མོ་བྲི་ཞིང་ཕྱེའི་གཏོར་མ་པདྨ་ལྟ་བུར་བྱས་པ་བཞག་ལ་བདུག་པ་འདིས་བདུག་ཅིང་། གསང་སྔགས་བརྒྱ་རྩ་བརྒྱད་བཟླས་བརྗོད་བྱ། ཡུངས་ཀར་ལ་ལན་བདུན་བཟླས་བརྗོད་བྱས་ན་གནོད་སྦྱིན་མོ་ལ་བརྡེག་པ་བྱས་ན་གནོད་སྦྱིན་མོ་རང་གི་གཟུགས་ཀྱིས་མདུན་དུ་འདུག་ཅིང་། ལྷའི་འཇིག་རྟེན་གྱི་བར་དུ་འགྲོ་ལ་སླར་ཡང་འོང་སྟེ། དོན་གསང་བ་ཐམས་ཅད་བསྒོ་བ་ཙམ་གྱིས་བྱེད་པར་འགྱུར་རོ། །ཡང་ན་མའམ་ཆུང་མའམ། སྲིང་མོ་ཡིན་ནོ་ཞེས་སྨྲ་བར་བྱ་སྟེ། གལ་ཏེ་མར་བྱས་ན་བུ་ལ་སྡུག་པ་ལོངས་སྤྱོད་དང་། གཞལ་མེད་ཁང་ཐམས་ཅད་ཀྱི་ནང་དུ་འཇུག་ལ་རྒྱལ་པོའི་བུ་བཞིན་ཡོངས་སུ་སྐྱོང་བར་བྱེད་དོ། །གལ་ཏེ་སྲིང་མོར་བྱས་ན་རྣམ་ཐོས་ལ་འགྲན་པར་འགྱུར་རོ།