།སྒྲོལ་མ་བདུན་ནི་འདུ་བར་འགྱུར། །དེ་བཞིན་ཕ་རོལ་ཕྱིན་བཅུ་དག །མགྲིན་སྔོན་དེ་བཞིན་གོས་དཀར་ཅན། །དེ་བཞིན་པདྨ་གར་གྱི་དབང་། རྒྱལ་དང་རྣམ་རྒྱལ་ཉིད་དང་ནི། །ལྕགས་སྒྲོག་རྡོ་རྗེ་ལྕགས་སྒྲོག་དང་། །ལྷ་མོ་ཁྲོ་གཉེར་མཱ་མ་ཀཱི། །དཔེ་མེད་ཕོ་ཉ་མོ་དང་ནི། །འཇིགས་མེད་དཔལ་དང་དབྱངས་ཅན་དང་། །པདྨ་ཀོ་ཏི་ཨུཏྤ་ལ། །པདྨའི་སོ་ཅན་དེ་བཞིན་དུ། །ཏི་སེ་ཡི་ནི་རྩེ་མོ་ན། །འཕྲོག་མ་འབྱུང་པོའི་མ་དག་དང་། །དེ་བཞིན་ལག་ན་རྡོ་རྗེ་བཅུ། །མཐུ་ཆེན་དེ་བཞིན་རིག་འཛིན་དབང་། །རྡོ་རྗེ་འཆང་ཆེན་དེ་བཞིན་དུ། །བཅུ་གསུམ་ལྷ་དབང་ལྷན་ཅིག་དང་། །སུམ་ཅུ་གཉིས་ནས་ལྷ་དག་ནི། །གསང་སྔགས་ཕྱག་རྒྱ་བཅིངས་ཙམ་གྱིས། །དེ་དག་ཐམས་ཅད་འདུ་བར་འགྱུར། །ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་རྣམ་པར་གཟིགས་ཤིང་སྟོན་པར་མཛད་དོ། །དེའི་མོད་ལ་བྱང་ཆུབ་སེམས་དཔའ་རྣམས་ཀྱིས་རྣམ་པར་གཟིགས་ཤིང་རྟག་ཏུ་མཆོག་སྩོལ་བར་འགྱུར་རོ། །རྟག་ཏུ་མགོན་པོ་འཕགས་པ་སྤྱན་རས་གཟིགས་དབང་ཕྱུག་སྤྱན་སྟོང་དང་། ཕྱག་རྒྱ་སྣ་ཚོགས་པ་འཛིན་པ་ལྟ་འཚལ་བར་འགྱུར་རོ། །ཕྱག་རྒྱ་བཅིངས་པ་ཙམ་གྱིས་ནི། །བྲམ་ཟེའི་ཆ་ལུགས་དོན་ཡོད་ཞགས། །མཐོང་བར་འགྱུར་ཏེ་སོམ་ཉི་མེད། །མགྲིན་སྔོན་དང་ནི་རྟ་མགྲིན་དང་། །དེ་བཞིན་རྒྱ་མཚོའི་ཀློང་དང་ནི། །མགོན་པོའི་ཞལ་ནི་བཅུ་གཅིག་དང་། །དེ་བཞིན་ཞལ་ནི་བཞི་དག་དང་། །མགོན་པོ་འཇིགས་པ་བརྒྱད་འཕྲོག་དང་། །དེ་བཞིན་གཟིགས་པ་བསམ་མི་ཁྱབ། །རྣམ་པ་སྣ་ཚོགས་གཟུགས་དང་ནི། །སྒྱུ་མ་ལྟ་བུའི་ཏིང་ངེ་འཛིན། །ཕྱག་རྒྱ་བཅིངས་པ་ཙམ་གྱིས་ནི། །མགོན་པོ་ཐམས་ཅད་སྟོན་པར་མཛད། །བདེ་བ་ཅན་གྱི་འཇིག་རྟེན་ཁམས། །རྒྱལ་བ་འདྲེན་པ་འོད་དཔག་མེད། །བྱང་ཆུབ་སེམས་དཔའི་ཚོགས་བསྐོར་བ། །མགོན་པོ་མོད་ལ་མཐོང་བར་འགྱུར། །གཞན་ཡང་སངས་རྒྱས་སྟོང་གི་ཞིང་དག་ནི། །ཆུ་བོ་གང་གཱའི་བྱེ་མ་དང་མཉམ་པའི། །དེ་བཞིན་གཤེགས་འབུམ་བྱེ་བ་བརྒྱ་ཕྲག་སྟོང་། །བྱང་ཆུབ་སེམས་དཔའི་ཚོགས་བཅས་ཡོངས་བསྐོར་མགོན།