།དེས་ཀྱང་འཁོར་ཆེན་པོར་ཀུན་དུ་འོངས་པའི་བྱང་ཆུབ་སེམས་དཔའི་ཚོགས་ཆེན་པོ་དེ་རྣམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིར་མི་ལྡོག་པ་ཉིད་ལ་རབ་ཏུ་བཀོད་པར་གྱུར་ཏོ། །རིག་སྔགས་འཆང་གི་འཁོར་གང་ཡིན་པ་ཐམས་ཅད་ཀྱང་དོན་ཡོད་པ་པདྨའི་གཙུག་ཏོར་ཆེན་པོའི་སྙིང་པོ་གསང་བ་དོན་ཡོད་ཞགས་པའི་དངོས་གྲུབ་སོ་སོར་ཐོབ་པར་གྱུར་ཏོ། །ཀླུའི་རྒྱལ་པོའི་འཁོར་གང་ཡིན་པ་དེ་རྣམས་ཐམས་ཅད་ཀྱང་ཡིད་བཞིན་གྱི་ནོར་བུའི་རྒྱལ་མཚན་སོ་སོར་སྣང་བར་གྱུར་ཏོ། །ལྷའི་འཁོར་གང་ཡིན་པ་དེ་རྣམས་ཐམས་ཅད་ཀྱང་འོད་འབར་བའི་ཏིང་ངེ་འཛིན་སོ་སོར་ཐོབ་བོ། །གནོད་སྦྱིན་དང་སྲིན་པོ་གང་ཡིན་པ་དེ་རྣམས་ཐམས་ཅད་རིན་པོ་ཆེའི་གཞལ་མེད་ཁང་དུ་གནས་པར་གྱུར་ཏོ། །འབྱུང་པོའི་འཁོར་གང་ཡིན་པ་དེ་རྣམས་ཐམས་ཅད་གཟི་བརྗིད་དྲི་མ་མེད་པའི་ཏིང་ངེ་འཛིན་སོ་སོར་ཐོབ་པར་གྱུར་ཏོ། །ལྷ་མ་ཡིན་གྱི་འཁོར་གང་ཡིན་པ་དེ་རྣམས་ཐམས་ཅད་རྡོ་རྗེའི་གོ་ཆ་དང་རྡོ་རྗེ་རྒྱལ་མཚན་གྱི་ཡ་ལད་བགོས་པར་གྱུར་ཏེ། ནམ་མཁའ་ལྡིང་གི་འཁོར་གང་ཡིན་པ་ཐམས་ཅད་རྡོ་རྗེ་མཆུ་རྩེ་མོ་ཆེན་པོའི་སྟོབས་ཀྱི་ཤུགས་རྗེས་སུ་ཐོབ་པར་གྱུར་ཏོ། །མིའམ་ཅི་དང་། ལྟོ་འཕྱེ་ཆེན་པོའི་འཁོར་གང་ཡིན་པ་ཐམས་ཅད་ཀྱང་ལུས་དང་ངག་དང་ཡིད་ཡོངས་སུ་དག་པར་གྱུར་ཏོ། །དགེ་བསྙེན་དང་། དགེ་བསྙེན་མ་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ཡིན་པ་དེ་རྣམས་ཐམས་ཅད་སྐྱེ་བ་དང་། རྒ་བ་དང་། འཆི་བའི་སྡུག་བསྔལ་ལས་ཡོངས་སུ་གྲོལ་བར་གྱུར་ཏོ། །བཅོམ་ལྡན་འདས་ཀྱིས་ཀྱང་སྐུ་ལས་ཉི་མའི་ཏོག་ཅེས་བྱ་བའི་འོད་ཟེར་ཆེན་པོ་རྣམ་པར་སྤྲོས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀར་རྗེས་སུ་ཞུགས་སོ། །སྤྱན་རས་གཟིགས་དབང་ཕྱུག་གི་ཐུགས་ཀར་ཞུགས་མ་ཐག་ཏུ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དོན་ཡོད་ཞགས་པའི་པདྨ་གཙུག་ཏོར་གྱི་གསང་བའི་རྣམ་པར་འཕྲུལ་པ་ལྟོས་ཤིག །ལག་ན་རྡོ་རྗེས་གསོལ་པ། བཅོམ་ལྡན་འདས་བདག་གིས་མཐོང་ལགས་སོ། །སེམས་དཔའ་དག་པ་བདག་གིས་མཐོང་ལགས་སོ། །སེམས་དཔའ་ཆེན་པོ་དག་པ་འདིའི་རྣམ་པར་འཕྲུལ་པ་བསམ་གྱིས་མི་ཁྱབ་པ་པདྨའི་དབང་ཕྱུག་དོན་ཡོད་པའི་ཞགས་པའི་སྙིང་པོ་པདྨ་གཙུག་ཏོར་གྱི་གསང་བའི་སྙིང་པོའི་དཀྱིལ་འཁོར་ཤིན་ཏུ་ཟབ་པ། ཤིན་ཏུ་རྒྱ་ཆེ་བ། རྨད་དུ་བྱུང་བ་ཆེན་པོ་དངོས་གྲུབ་མཆོག་སྒྲུབ་པར་བྱེད་པ་ནི་བཅོམ་ལྡན་འདས་མཐའ་དག་རྒྱས་པར་གསུངས་ཤིག