ནག་པོ་ཆེན་པོ་དང་། དབང་ཕྱུག་དང་། དབང་ཕྱུག་ཆེན་པོ་དང་ཚངས་རིས་ཀྱི་ལྷའི་བུ་དང་། རྒྱལ་པོ་ཆེན་པོ་བཞི་དང་། ནོར་བུ་བཟང་པོ་དང་། གང་བ་བཟང་པོ་དང་། སྟོབས་ཀྱི་ལྷ་དང་། གཤིན་རྗེ་དང་། ཆུ་ལྷ་དང་། ལུས་ངན་གྱི་ལྷ་རྣམས་དང་། གཞོན་ནུའི་ལྷ་རྣམས་གདུགས་ཀྱི་ཡུབ་ནས་བཟུང་ནས། བཅོམ་ལྡན་འདས་ལ་མཆོད་པ་བྱེད་པར་གྱུར་ཏོ། །ལྷའི་གཞལ་མེད་ཁང་ཆེན་པོ་ལྷའི་རྣམ་པར་སྤྲུལ་པའི་མཆོད་པའི་སྤྲིན་གྱིས་མཆོད་པ་བྱེད་དོ། །གདུགས་ཀྱི་རྣམ་པའི་ཁོར་ཡུག་གི་ནང་དུ་དགའ་ལྡན་གྱི་ལྷ་དང་། འོག་མིན་གྱི་ལྷ་དང་། ལྷའི་གནས་ཐམས་ཅད་དུ་ལྷའི་བུས་ཡོངས་སུ་བསྐོར་བ་གང་ཡིན་པ་དེ་ནམ་མཁའ་ལ་མཆོད་པའི་སྤྲིན་ཆེན་པོས་བཅོམ་ལྡན་འདས་ཤཱཀྱ་ཐུབ་པ་དང་། སྤྱན་རས་གཟིགས་ཀྱི་དབང་ཕྱུག་འཁོར་གྱི་དཀྱིལ་འཁོར་ལ་མཆོད་པ་བྱེད་དོ། །སའི་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་གང་ཡིན་པ་རྣམས་དང་། ས་གཞིའི་ལྷ་དང་། ཆུའི་ལྷ་དང་། ནགས་ཀྱི་ལྷ་དང་། ལོ་ཐོག་གི་ལྷ་དང་། སྨན་གྱི་ལྷ་གང་ཡིན་པ་དེ་རྣམས་ཐམས་ཅད་སའི་མཐིལ་གྱི་གཞལ་ཡས་ཁང་དེ་སྦྱོང་བར་བྱེད་པར་གྱུར་ཏེ། དྲི་སྣ་ཚོགས་པའི་ཆུས་ཆག་ཆག་འདེབས་ཤིང་། དྲི་སྣ་ཚོགས་པའི་ཕྱེ་མས་བྱུག་པར་བྱེད། མེ་ཏོག་སྣ་ཚོགས་གཅལ་དུ་འགྲེམས་ཤིང་། བདུག་པ་སྣ་ཚོགས་ཀྱིས་བདུགས་ནས་སའི་དཀྱིལ་འཁོར་ཡང་དག་པར་བརྒྱན་པར་གྱུར་ཏོ། །དེ་ལྟར་རྣམ་པར་འཕྲུལ་པའི་གོ་སྐབས་རྒྱ་ཆེན་པོ་ནི་དེ་བཞིན་གཤེགས་པའི་ཁྱུ་མཆོག་དེ་བཞིན་གཤེགས་པའི་དམ་ཚིག་བྱིན་གྱིས་བརླབ་པའོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས། དེ་ལྟ་བུའི་རྫུ་འཕྲུལ་གྱི་རྣམ་པར་འཕྲུལ་པ་ཆེན་པོ་ཡངས་པ་རྒྱ་ཆེན་པོ་མཐོང་ནས། ཤིན་ཏུ་ཡ་མཚན་པ་ཐོབ་ཅིང་རྨད་དུ་བྱུང་བ་ཐོབ་སྟེ། འདི་ལྟར་སེམས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་བསྟན་པ་ནི་ཤིན་ཏུ་ཡ་མཚན་ནོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་སླར་ཡང་གསོལ་བ་བཏབ་བོ། །བཅོམ་ལྡན་འདས་སྐབས་དབྱེ་བར་མཛོད་ཅིག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ་དོགས་པ་བསལ་བ་དང་།