།སྟོང་རྩ་བརྒྱད་ཚང་ན་རིག་སྔགས་འཆང་བའི་ལུས་འབར་བར་འགྱུར་རོ། །ཕྱོགས་བཅུའི་སངས་རྒྱས་མང་པོའི་སྐུ་མཐོང་བར་འགྱུར་རོ། །དེ་བཞིན་གཤེགས་པའི་སྐུ་དེ་དག་གིས་རིག་སྔགས་འཆང་བ་ལ་ལེགས་སོ་ཞེས་བྱ་བའི་སྒྲ་འབྱིན་ཏེ། རིག་སྔགས་འཆང་བ་ལེགས་སོ་ལེགས་སོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་མཆོག །རྣམ་པར་གྲོལ་བའི་དཀྱིལ་འཁོར་འཇིག་རྟེན་ལས་འདས་པའི་སྦྱིན་སྲེག་གི་ཆོ་ག་ཡིན་ནོ། །འདི་ནི་བདུད་ཐམས་ཅད་རབ་ཏུ་འཇོམས་པའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་གནོད་སྦྱིན་དང་། སྲིན་པོ་དང་། འབྱུང་པོ་དང་། བརྗེད་བྱེད་དང་། བགེགས་དང་། ལོག་འདྲེན་ཚར་གཅོད་པའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་བྱང་ཆུབ་ཀྱི་སྙིང་པོར་སོང་སྟེ། ཆོས་ཀྱི་འཁོར་ལོ་བསྐོར་བའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་བྱང་ཆུབ་ཀྱི་ལམ་བླ་ན་མེད་པ་ཡིན་ནོ། །དེ་ནས་དེ་བཞིན་གཤེགས་པའི་སྐུ་དེ་དག་ཐམས་ཅད་ཀྱིས་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། རིག་སྔགས་འཆང་བའི་མགོའི་སྤྱི་བོ་ལ་ཕྱག་འཇོག་པར་མཛད་དོ། །འཕགས་པ་སྤྱན་རས་གཟིགས་དབང་ཕྱུག་གི་རང་གི་ངོ་བོ་ཉིད་ཀྱི་རྒྱན་ཐམས་ཅད་ཀྱིས་བརྒྱན་པ། དོན་ཡོད་པའི་ཞགས་པ་དང་། ཚངས་པའི་ཆ་བྱད་འཆང་བ། དབུ་ལྕང་ལོ་ཅོད་པན་གྱིས་བརྒྱན་པ། པདྨ་དང་། མདུང་རྩེ་གསུམ་པ་དང་། ཞགས་པ་ཐོགས་པ། རིག་སྔགས་འཆང་བའི་མདུན་ན་བཞུགས་ཏེ་བཀའ་སྩོལ་པ། རིག་སྔགས་འཆང་བ་ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་འཇིག་རྟེན་ལས་འདས་པའི་སྦྱིན་སྲེག་གི་ཆོ་ག་ཆེན་པོ་གྲུབ་པ་ལེགས་སོ་ལེགས་སོ། །ཟུང་ཤིག་དང་། མཆོག་ཇི་ལྟ་བ་དང་། ཇི་ལྟར་འདོད་པ་དེ་ཐམས་ཅད་སྦྱིན་ནོ། །དེ་ནས་རིག་སྔགས་འཆང་བས་ཇི་ལྟར་འདོད་པའི་མཆོག་སྨྲས་ན་དེ་ཐམས་ཅད་ཐོབ་པར་འགྱུར་རོ། །འཕགས་པ་སྤྱན་རས་གཟིགས་ཀྱི་དབང་ཕྱུག་གིས་ཕྱག་བརྐྱང་སྟེ། རིག་སྔགས་འཆང་བའི་མགོའི་སྤྱི་བོ་ལ་ཕྱག་བཞག་པ་དང་། ཕྱག་བཞག་མ་ཐག་ཏུ་རིག་སྔགས་འཆང་ནམ་མཁའ་ལ་འགྲོ་བར་འགྱུར་རོ། །