།ཆོས་ཀློག་པ་ལེགས་པར་ཁྲུས་བྱས་ཏེ། ལྷ་རྫས་ཀྱི་གོས་ཀྱིས་དཀྲིས་ཏེ། གཙང་མ་ལ་དྲི་རྣམ་པ་སྣ་ཚོགས་ཀྱིས་བསྒོས་པའི་གོས་གཙང་མ་སར་པ་བགོས་ཏེ། ཆོས་ཀྱི་སྟན་ཤིན་ཏུ་བརྒྱན་པ་ལྷ་རྫས་ཀྱི་སྟན་ལ་འདུག་ནས་ཚིག་འཇམ་པོ་ཚིག་མཉེན་པོས་བཀླག་པར་བྱའོ། །ནུབ་ཀྱི་ཕྱོགས་ཆ་ལ་དཀྱིལ་འཁོར་མཐོན་པོ་ལ་བདེ་བ་ཅན་གྱི་བཀོད་པ་བྲིས་པ་འོད་དཔག་མེད་དང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་། མཐུ་ཆེན་ཐོབ་པའི་གཟུགས་བྲི་བའི་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་པར་བྱའོ། །ཤར་གྱི་ཕྱོགས་ཆ་ལ་དཀྱིལ་འཁོར་གྲྭ་བཞི་མཐོན་པོ་བྱས་ལ་རྣམ་པར་གྲོལ་བའི་དཀྱིལ་འཁོར་ལ་ཤཱཀྱ་ཐུབ་པ་དང་། འཕགས་པ་རྡོ་རྗེ་འཆང་བ་དང་། དོན་ཡོད་པའི་ཞགས་པའི་ཁྲོ་བོའི་གཟུགས་བྲིས་པ་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །ལྷོའི་ཕྱོགས་ཆ་ལ་རི་འདྲ་བའི་གནས་མཐོན་པོ་བྱས་ལ་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་དང་། འཇམ་དཔལ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། དོན་ཡོད་པའི་ཞགས་པ་རས་ལ་བྲིས་པའི་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །བྱང་གི་ཕྱོགས་ཆ་ལ་ཁྲོ་བོའི་རྒྱལ་པོ་དང་། དེ་བཞིན་གཤེགས་པ་རྣམ་པར་སྣང་མཛད་དང་། བྱམས་པ་དང་། སའི་སྙིང་པོ་བྲིས་པའི་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །སྟེགས་བུའི་རྣམ་པར་མཐོན་པོར་བྱས་པ་ཐམས་ཅད་ལེགས་པར་བརྒྱན་པར་བྱའོ། །དར་གྱི་ཕྲེང་བས་བརྒྱན་པར་བྱའོ། །རྒྱན་ཐམས་ཅད་ཀྱིས་བརྒྱན་པ་དང་། བུམ་པ་གང་བ་གཞག་པ་དང་། དྲིས་དཀྱིལ་འཁོར་བྱ་བ་དང་། རོའི་མཆོག་རྣམ་པ་སྣ་ཚོགས་བཟའ་བའི་ངོ་བོ་རྣམ་པ་དུ་མའི་ཁ་ཟས་ཀྱི་རོ་འབུལ་བ་དང་། འབྲས་བུ་རྣམ་པ་སྣ་ཚོགས་དང་ལྡན་པའི་བསོད་སྙོམས་གཞག་པ་དང་། ཙནྡན་དང་། ཨ་ག་རུ་དང་། དུ་རུསྐ་དང་། ག་བུར་དང་། གླ་རྩི་དང་། གུར་གུམ་དང་བསྲེས་པའི་བདུག་པ་རས་ཀྱི་སྐུ་གཟུགས་ལ་དབུལ་བར་བྱའོ། །དེ་ནས་རིག་སྔགས་འཆང་བས་དུས་གསུམ་དུ་ཁྲུས་བྱ་ཞིང་། གོས་ལན་གསུམ་བརྗེས་ཏེ། དུས་གསུམ་དུ་བཟླས་བརྗོད་དང་ཆོ་ག་བྱའོ།