།སེམས་ཅན་དག་པ་འཇིག་རྟེན་ལས་འདས་པ་ཁྱད་པར་དུ་འཕགས་པ་རྣམ་པར་ཐར་བའི་དཀྱིལ་འཁོར་དོན་ཡོད་པའི་ཞགས་པའི་རྣམ་པར་འཕྲུལ་པ་འཇིག་རྟེན་ལས་འདས་པའི་དཀྱིལ་འཁོར་གྱི་ཉེ་བར་སྤྱོད་པའི་ཆོ་ག་ཤོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ཀྱི་སྤྱན་སྔ་ནས་བསྐུལ་བ་ཐོབ་ནས། བཅོམ་ལྡན་འདས་ཀྱི་སྤྱན་སྔར། འཇིག་རྟེན་ལས་འདས་པའི་ཆོ་ག་དང་། དཀྱིལ་འཁོར་གྱི་ཉེ་བར་སྤྱོད་པའི་ཆོ་ག་དང་། སྒྲུབ་ཐབས་གསུངས་སོ། །གནས་བཟང་ས་གཞི་དགེ་བ་དང་། །ས་གཞི་གཙང་ཞིང་ནེའུ་གསིང་ལ། །ལྗོན་ཤིང་མེ་ཏོག་འབྲས་བུས་ཁྱབ། །མེ་ཏོག་འཁྲི་ཤིང་འགྲམ་དང་ནི། །ས་གཞི་མཉེན་ལ་དག་པ་དང་། །གང་དུ་ཆུ་བོ་འབབ་པ་དང་། །གཟི་བརྗིད་ལྡན་ཞིང་ཡིད་དགའ་བ། །ས་གཞི་སེམས་ནི་དགའ་བར་འོས། །ཡིད་ཀྱི་ཤིང་རྟ་རྒྱས་བྱེད་ཅིང་། །གོ་སྐབས་ལེགས་པར་གནས་པ་དང་། །ཤིན་ཏུ་དག་ཅིང་ཐུན་ཚགས་བྲལ། །རུས་པ་གསེག་མ་གྱོ་མོ་དང་། །ཕུབ་མ་སོལ་བ་ཡོངས་སུ་སྤངས། །གཙང་ཞིང་གཙང་ལ་ལེགས་དག་པའི། །ས་གཞི་ཡོངས་སུ་ཟླུམ་པ་དེར། །མཁས་པས་རྒྱར་ནི་གཟིངས་ཚད་དུ། །གཞལ་ནས་ཤིན་ཏུ་རྣམ་འབྱེས་ཤིང་། །གཙང་ཞིང་མཉེན་ལ་འཇམ་པར་ཕྱེ། །གནས་དེར་དཀྱིལ་འཁོར་ལེགས་པར་བསྒྲུབས། །སངས་རྒྱས་བྱང་ཆུབ་བླ་ན་མེད། །འཇིག་རྟེན་ལས་འདས་ཁྱད་འཕགས་པར། །དེ་བཞིན་གཤེགས་ཀུན་གྱིས་བྱིན་བརླབས། །ས་ཡི་ཆ་ལས་དཔངས་སུ་ནི། །མི་གང་ཚད་དུ་བརྐོ་བར་བྱ། །གཟུངས་དང་དཀྱིལ་འཁོར་དམར་པོའམ། །ཡང་ན་གུར་གུམ་ཁ་དོག་དང་། །ས་རྡུལ་དཀར་པོ་སྣུམ་པ་ནི། །མར་སར་འདྲ་བ་འཇམ་པ་ཡིན། །ས་ཡི་ཁྱད་པར་དབྱེ་བ་དེ། །དེ་བཞིན་གཤེགས་པ་ཀུན་གྱིས་བསྔགས། །བྱང་ཆུབ་སྙིང་པོ་ས་དེར་མཚུངས། །རིང་བསྲེལ་བཞུགས་པའི་མཆོད་རྟེན་དང་། །དེ་ནི་མཚུངས་པར་གྱུར་པ་ཡིན། །བརྐོས་པའི་ནང་དུ་མཁས་པ་ཡིས། །སླར་ཡང་ས་དེ་དགང་བར་བྱ། །ཇི་སྲིད་དོང་བུ་མཉམ་པར་གང་། །དེ་ནི་དཀྱིལ་འཁོར་ཡང་དག་པའོ། །ཉུང་དང་ལྷག་པ་བསྔགས་པ་མིན།