རྗེའུ་རིགས་དང་། དམངས་རིགས་གང་ལ་ལ་ཞིག་གམ། སེམས་ཅན་གཞན་གང་ཡང་རུང་བས་དོན་ཡོད་པར་རྣམ་པར་ལྟ་བའི་སྙིང་པོ་འདི་དང་། རྨད་དུ་བྱུང་བ་རྣམ་པར་ལྟ་བ་དོན་ཡོད་པའི་སྙིང་པོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྣམ་པར་གྲོལ་བའི་དཀྱིལ་འཁོར་དེ་བཞིན་གཤེགས་པ་ཐམས་ཅད་རྨད་དུ་བྱུང་བའི་དེ་ཁོ་ན་ཉིད་རྣམ་པར་འཕྲུལ་པ། རྣམ་པར་སྣང་མཛད་ཀྱི་བྱིན་གྱིས་བརླབས་པ། དམ་ཚིག་ཆེན་པོ་དཀྱིལ་འཁོར་གྱི་མིང་འཛིན་པ་ཙམ་གྱིས་ཀྱང་དགེ་བའི་རྩ་བ་ཆེན་པོ་སོགས་པར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་དང་ལྡན་པར་ཡོངས་སུ་འཛིན་པར་ཡང་འགྱུར་རོ། །གང་གཱའི་ཀླུང་འབུམ་ཕྲག་བྱེ་བ་ཁྲག་ཁྲིག་དགུ་བཅུ་རྩ་གཉིས་ཀྱི་བྱེ་མའི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་དུ་མཐོང་བ་དང་། མངོན་དུ་ཆོས་ཐོས་པ་དང་། མངོན་དུ་དབྱངས་ཐོས་པ་དང་། མངོན་དུ་ལུང་བསྟན་པ་ཐོས་པར་འགྱུར་བའི་སེམས་ཅན་ཆེན་པོ་དེ་དག་གིས་ནི་བསོད་ནམས་ཀྱི་ཕུང་པོ་ཤིན་ཏུ་ཆེ་བ་དང་། དགེ་བའི་རྩ་བ་ཆེན་པོ་ཡོངས་སུ་གཟུང་བར་འགྱུར་རོ། །སེམས་ཅན་དེ་གཟུངས་གང་ཡིན་པ་དང་། དཀྱིལ་འཁོར་དང་། ཆོ་ག་དང་། མིང་སྣ་ཚོགས་ད་ལྟར་ཐོས་པ་དང་། ཡང་ན་ཀློག་པ་དང་། ཡང་ན་ལྟ་བ་ཙམ་མཐོང་བ་ནི་དེ་དང་མཉམ་པ་ཡིན་ཏེ། རིགས་ཀྱི་བུ་ཕོའམ། རིགས་ཀྱི་བུ་མོ་དེ་ནི་བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་དང་ལྡན་པར་འགྱུར་བ་ཡང་དེ་དང་མཉམ་པ་ཡིན་ན། དཀའ་བ་བྱེད་པ་ལྟ་སྨོས་ཀྱང་ཅི་དགོས་ཏེ། དེ་བཞིན་གཤེགས་པ་དང་མཉམ་པ་ཉིད་དུ་ཐོས་པ་དང་མཐོང་བར་འགྱུར་རོ། །གང་དག་གཟུངས་འདིའི་དཀྱིལ་འཁོར་འབད་དེ་སྟོབས་དང་བརྩོན་འགྲུས་ཕ་རོལ་གནོན་པར་བྱེད་པ་དང་། ཚོལ་བ་དང་། འདྲི་བ་དང་། ཀློག་པ་དང་། བཟླས་བརྗོད་ཀྱི་ཆོ་ག་བྱེད་པ་དང་། དཀྱིལ་འཁོར་གྱི་ཆོ་གས་སྒྲུབ་པར་བྱེད་པ་དང་། འབད་པར་བྱེད་པ་དེ་ནི་དཀའ་བ་ཆེན་པོ་ལ་ཞུགས་པ་ཡིན་ཏེ། དེ་དང་མཉམ་པ་ཡིན་ནོ། །དཀའ་བ་གང་ཞེ་ན། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བསྐལ་པ་གྲངས་མེད་པ་གསུམ་དུ་དཀའ་བ་ལ་ཞུགས་པ་དང་།