།མིག་ལ་བསྐུས་ན་ནམ་མཁའ་ལ་འགྲོ་ཞིང་ཁྱིམ་ཐམས་ཅད་ཀྱི་སྒོ་ཕྱེ་བར་མཐོང་སྟེ། ཁྱིམ་བདག་ཐམས་ཅད་ཀྱི་དཔོན་པོ་དང་། རྒྱལ་པོར་འགྱུར་རོ། །དཔྲལ་བ་ལ་ཐིག་ལེ་བྱས་ན་མི་སྣང་བར་འགྱུར་རོ། །ཁར་བཅངས་ན་གང་དང་སྨྲས་པ་དེ་ནོར་གྱི་དབང་དང་བདག་གི་དབང་དུ་འགྱུར་རོ། །ཡང་ན་བ་སེར་སྐྱའི་ཞུན་མར་དང་། མར་དཀར་དང་། འོ་མ་དང་། བཅུད་ཀྱིས་ལེན་གྱི་མཆོག་འབར་བ་དང་ལྷན་ཅིག་བསྐོལ་ཏེ་ཁ་ར་བཞིན་དུ་ལེགས་པར་ཚོས་པ་དང་བླངས་ལ་དོན་ཡོད་པའི་རྒྱལ་པོའི་སྙིང་པོ་བརྒྱ་སྟོང་བཟླས་བརྗོད་བྱས་ཏེ། རིག་སྔགས་འཆང་བ་བདག་ཉིད་བསྐུས་པ་ཙམ་གྱི་མོད་ལ་ཐམས་ཅད་རིག་འཛིན་གྱི་འཁོར་ལོས་སྒྱུར་བར་འགྱུར་རོ། །བསྐལ་བ་ཆེན་པོ་བཅུར་འཚོ་བར་འགྱུར་རོ། །བར་གྱི་བསྐལ་པར་སངས་རྒྱས་བཅོམ་ལྡན་འདས་མཐོང་བར་འགྱུར་རོ། །བྱང་ཆུབ་ཀྱི་སྙིང་པོ་མཆོག་ཏུ་ལུང་བསྟན་པ་ཐོབ་པར་འགྱུར་རོ། །ཐིག་ལེ་བྱས་ན་ནམ་མཁའ་ལ་འཕུར་བར་འགྱུར་རོ། །ཨོཾ་ཞེས་བྱ་བའི་སྒྲས་ཚངས་པ་གནས་ནས་ཕྱིར་འབྱུང་བར་འགྱུར་རོ། །སེ་གོལ་གཏོགས་པ་ཙམ་གྱིས་འོག་མིན་གྱི་གནས་ཀྱི་བར་དུ་འགྲོ་ཞིང་ཕྱིར་ཡང་འོང་བར་འགྱུར་རོ། །ནམ་གྱི་ཚེ་འཆི་བའི་དུས་བྱས་པར་འགྱུར་པ་དེའི་ཚེ་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་འགྱུར་རོ། །འདི་ནི་སྐྱེ་བ་ཐ་མ་ཡིན་ཞིང་མངལ་ན་གནས་པ་ལས་ཡོངས་སུ་ཐར་བ་ཡིན་ནོ། །དེ་ནས་དོན་ཡོད་པའི་རིལ་བུ་བརྗོད་པར་བྱ་སྟེ། རིག་སྔགས་འཆང་སྒྲུབ་པར་བྱེད་པ་ལེགས་པར་བསྒྲུབས་ན་རིག་སྔགས་འཆང་བ་ལེགས་པར་ཁྲུས་བྱས་ཤིང་གོས་གཙང་མ་བགོས་ཏེ་གཙང་བར་བྱའོ། །པདྨ་དང་། ལིག་བུ་མིག་དང་། ནཱ་ག་གེ་སར་དང་། གིའུ་ཝང་དང་། ཨུད་ཏ་མ་ར་ཎི་དང་། སྐྱེར་ཁཎྜ་དང་། ཨ་ག་རུ་རྣམས་དེ་བཞིན་དུ་དེ་དག་ཆ་མཉམ་སྟེ་ཞིབ་མོར་བཏགས་ལ་ཁར་དང་སྦྱར་ཏེ་གསེར་དང་དངུལ་གྱིས་དཀྲི་ཞིང་ཟངས་ཀྱིས་ཀྱང་དཀྲིས་ཏེ། ཙནྡན་དཀར་པོའི་ག་བ་ཚེ་ནང་དུ་བཅུག་ལ་ལག་པའི་སྙིམ་པར་བཅང་བར་བྱའོ། །ཟླ་བ་ཡར་གྱི་ངོ་ཚེས་བརྒྱད་དང་། བཅུ་བཞི་ལ་ཞག་གཅིག་སྨྱུང་བ་བྱས་ཏེ། འཕགས་པ་སྤྱན་རས་གཟིགས་དབང་ཕྱུག་གི་རས་ཀྱི་སྐུ་གཟུགས་ཀྱི་སྤྱན་སྔར་དོན་ཡོད་པའི་རྒྱལ་པོའི་སྙིང་པོ་སྟོང་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱ།