སྒྱུ་མ་ལྟ་བུའི་ཏིང་ངེ་འཛིན་གྱིས་གཟུགས་རྣམ་པ་སྣ་ཚོགས་པ་ཡང་དག་པར་མཐོང་བ་དང་། སྒྱུ་མ་ཡང་དག་པར་མཐོང་བའི་ཏིང་ངེ་འཛིན་གྱི་རྣམ་འཕྲུལ་དེ་ཐམས་ཅད་རྗེས་སུ་འཛིན་པར་འགྱུར་ཞིང་། ཐམས་ཅད་དུ་རྗེས་སུ་ཞུགས་པར་འགྱུར་ལ། ཐམས་ཅད་དུ་དམ་ཚིག་རྟོགས་པར་ཁོང་དུ་ཆུད་པར་འགྱུར་ཏེ། ཐམས་ཅད་དུ་ཕྱག་རྒྱ་དང་། དཀྱིལ་འཁོར་དང་གསང་སྔགས་ཀྱི་ཆོ་ག་ཞིབ་མོའི་རྗེས་སུ་རབ་ཏུ་གནས་པར་འགྱུར་རོ། །ཐམས་ཅད་དུ་ཏིང་ངེ་འཛིན་གྱི་རྣམ་པར་འཕྲུལ་བ་རྒྱལ་མཚན་གྱི་མཆོག་གཅེས་བྱ་བ་ལ་གནས་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་རྗེས་སུ་སོན་ཅིང་རྗེས་སུ་ཞུགས་པར་འགྱུར་རོ། །དོན་ཡོད་པའི་རིག་སྔགས་ཀྱི་དངོས་གྲུབ་ཡོངས་སུ་རྫོགས་པ་ལ་རབ་ཏུ་གནས་པར་འགྱུར་རོ། །དོན་ཡོད་པའི་རྣམ་པར་འཕྲུལ་པ་དང་ལྡན་པར་འགྱུར་རོ། །དོན་ཡོད་པའི་གཟུགས་དང་། ཁ་དོག་དང་། རྟགས་དང་། དབྱིབས་དང་མཐུན་པར་འགྱུར་རོ། །དོན་ཡོད་པའི་ཡོན་ཏན་ཡོངས་སུ་བསྒྲགས་པ་དང་ལྡན་པར་འགྱུར་རོ། །དོན་ཡོད་པའི་དགེ་བའི་རྩ་བ་དང་ལྡན་པར་འགྱུར་རོ། །དོན་ཡོད་པའི་དེ་བཞིན་གཤེགས་པ་ལུང་བསྟན་པ་ཡོངས་སུ་འཛིན་པར་འགྱུར་རོ། །དོན་ཡོད་པའི་དེ་བཞིན་གཤེགས་པའི་བསོད་ནམས་ཀྱི་ཕུང་པོ་ཆེན་པོ་དགེ་བའི་རྩ་བ་བསྐྱེད་པར་འགྱུར་རོ། །དོན་ཡོད་པར་དེ་བཞིན་གཤེགས་པ་མངོན་སུམ་དུ་མཐོང་ཞིང་བྱིན་གྱིས་རློབ་པ་དང་ལྡན་པར་འགྱུར་རོ། །དོན་ཡོད་པར་དེ་བཞིན་གཤེགས་པའི་རིགས་ཀྱི་རྗེས་སུ་ཞུགས་པར་འགྱུར་རོ། །དོན་ཡོད་པར་རྡོ་རྗེའི་རིགས་ལ་མཉམ་པར་རྗེས་སུ་ཞུགས་པར་འགྱུར་རོ། །དོན་ཡོད་པར་པདྨའི་རིགས་ཀྱི་དམ་ཚིག་བྱིན་གྱིས་བརླབས་པར་འགྱུར་རོ། །དོན་ཡོད་པའི་ནོར་བུའི་རིགས་ཀྱི་དམ་ཚིག་རྗེས་སུ་འཛིན་པར་འགྱུར་རོ། །དོན་ཡོད་པར་རྒྱལ་པོའི་རིགས་ཀྱི་དམ་ཚིག་རྗེས་སུ་འཛིན་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་རྣམ་པར་འཕྲུལ་བ་བྱིན་གྱིས་རློབ་པའི་བྱིན་གྱིས་བརླབས་པར་འགྱུར་རོ། །དོན་ཡོད་པར་འཁོར་ལོས་སྒྱུར་བའི་རིགས་དབང་དུ་གྱུར་ནས་རབ་ཏུ་གནས་པར་བྱིན་གྱིས་བརླབས་པར་འགྱུར་རོ། །དོན་ཡོད་པ་རིག་སྔགས་ཀྱི་དབང་གིས་མངོན་པར་དབང་བསྐུར་བར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་མངོན་པར་དབང་བསྐུར་བས་མངོན་པར་དབང་བསྐུར་བར་འགྱུར་རོ།