ཞེ་གདུག་པ་མང་བ་དེས་ནི་བཅོམ་ལྡན་འདས་སེམས་ཅན་རང་གི་ཉེས་པ་ལགས་ཀྱི་བཅོམ་ལྡན་འདས་བདག་གིས་ཉེས་པ་ནི་མ་ལགས་སོ། །བཅོམ་ལྡན་འདས་འོན་ཀྱང་བདག་དྲན་པ་ཙམ་གྱིས་སྙིང་པོ་འདི་ཀློག་པ་དང་། ཁ་ཏོན་དུ་བྱེད་པ་དང་། བཟླས་པ་ཙམ་གྱིས་ཡང་དག་པར་དགོངས་པར་བགྱི་མཐོང་བ་སྩལ་བར་བགྱིའོ། །ཡང་དང་ཡང་དུ་བསྐུལ་བར་བགྱིའོ། །བཅོམ་ལྡན་འདས་སེམས་ཅན་དེ་རྣམས་ནི་བདག་ལ་ལྟ་བར་མི་བྱེད་པ་དང་། བསམ་པར་མི་བྱེད་པ་དང་། སེམས་པར་མི་བྱེད་པ་དང་། སྐད་ཅིག་ཡུད་ཙམ་ཐང་ཅིག་ཡིད་ལ་བྱེད་པས་ཀུན་ཏུ་འཛིན་པར་མི་བྱེད་ལགས་ཏེ། གདུག་པའི་བསམ་པ་དང་། གདུག་པའི་སེམས་ཀྱིས་སེམས་ཅན་རང་གི་ཉེས་པས་ཡང་དག་པར་གང་བའི་ལུས་ལགས་སོ། །བཅོམ་ལྡན་འདས་བདག་ནི་སེམས་པ་དང་། དྲན་པ་དང་། རྣམ་པར་ལྟ་བར་བྱེད་པ་ཙམ་གྱི་མོད་ལ་མདུན་ན་ཉེ་བར་འདུག་པར་བགྱི། མཐོང་བ་དང་ཡང་དག་པའི་གཏམ་ཀུན་ཏུ་སྨྲ་བ་དང་། ཡང་དག་པར་འགྲོགས་པར་བགྱིའོ། །སེམས་ཅན་དེ་རྣམས་ནི་རིག་སྔགས་འཆང་ཐ་ན་སེམས་ཀྱི་ཀུན་ཏུ་རྟོག་པ་ཙམ་ཡང་མི་སྐྱེ་སྟེ། ཡིད་ལ་བྱེད་པ་དང་། སེམས་པར་བྱེད་པ་ཡང་མ་ལགས་སོ། །འདི་ལྟ་སྟེ། དགེ་སྦྱོང་གི་ཆ་བྱད་སྐྲ་བཞར་ཞིང་ངུར་སྨྲིག་ཙམ་འཆང་བའི་ཆ་བྱད་ནི་བྲམ་ཟེ་དང་། རྒྱལ་རིགས་ཀྱི་ཆ་བྱད་དང་། ཚོང་པ་དང་དེད་དཔོན་ཆེན་པོའི་ཆ་བྱད་དང་། བྱིས་པ་དང་། བཅོམ་ལྡན་འདས་ཀྱི་ཆ་བྱད་དང་། རྒྱལ་པོ་དང་། བློན་པོ་དང་། འགྲོགས་བཤེས་དང་། གོས་དམར་པོ་ཅན་ལ་མཁན་པོ་དང་། སློབ་དཔོན་དང་མཚུངས་པར་མཁན་པོ་དང་། བུ་དང་། བུ་མོ་དང་། མ་དང་། ཕ་དང་། སྲིང་མོར་ཉེ་བར་ལྟ་བར་བྱེད་དོ། །འོན་ཀྱང་མཁས་པ་ནི་ལྷག་པའི་བསམ་པ་ཡང་དག་པར་རྫོགས་པ་ལ་གནས་པས། གཟུགས་དང་། ཁ་དོག་དང་། རྟགས་དང་། དབྱིབས་དང་། སྐད་དང་། ཡང་དག་པའི་གཏམ་སྨྲ་བ་དང་། ཚིག་འབྲུ་དང་། ཡི་གེ་དང་། དུས་ཚིགས་སུ་འགྲོ་བ་ཡང་དག་པར་མཚོན་པར་བྱ། ཡང་དང་ཡང་དུ་གཏམ་ཀུན་ཏུ་སྨྲ་བ་ལ་རྣམ་པར་སྤྱད་པར་བྱ། དེའི་འོག་ཏུ་ཤེས་པར་བྱའོ། །འཕགས་པའི་སེམས་ཅན་ནོ་ཞེས་བལྟ་བར་བྱ། བདག་ལ་བལྟ་བར་འདོད་པ་དང་། བདག་མཐོང་བར་འདོད་པ་དེར་ཉེ་བར་འགྲོ་བར་བགྱིའོ།