།སྐད་ཆེན་པོས་དོན་ཡོད་པའི་ཞགས་པའི་སྙིང་པོ་བཟླས་པ་བྱས་ན། དེས་ན་སངས་རྒྱས་ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པས་ལེགས་སོ་ཞེས་བྱ་བའི་སྒྲ་འབྱིན་པར་འགྱུར་ཞིང་རིག་སྔགས་འཆང་དེ་ལ་ཡང་དེ་བཞིན་གཤེགས་པས་བྱིན་གྱིས་རློབ་པར་འགྱུར། དུས་ཀུན་ཏུ་དགོངས་པར་འགྱུར། ཡང་དང་ཡང་དུ་གཟིགས་པའི་ཕྱིར་བྱོན་པར་འགྱུར་རོ། །བདེ་བ་ཅན་ན་བཞུགས་པའི་དེ་བཞིན་གཤེགས་པ་ཚེ་དཔག་མེད་དང་། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་ལ་སོགས་པ་བྱང་ཆུབ་སེམས་དཔའ་ཐམས་ཅད་ཐུགས་རབ་ཏུ་དགྱེས་པར་འགྱུར། རིག་སྔགས་འཆང་ལ་དོན་ཡོད་པ་ཆེན་པོའི་དངོས་གྲུབ་སྩོལ་བར་མཛད་གཟིགས་བཞེད་པར་འགྱུར་རོ། །ཀླུ་ཐམས་ཅད་ལ་བདུགས་པ་ཙམ་གྱིས་དབང་དུ་འགྱུར་ཞིང་ཧ་ཅང་ཆར་ཆེས་ན་གཅོད་པར་བྱེད་ཅིང་ཆར་མི་འབབ་ན་འབེབས་པར་བྱེད་དོ། །རླུང་དང་སེར་བ་དང་སྤྲིན་ཐམས་ཅད་གཅོད་པར་བྱེད་བདུགས་པ་ཙམ་གྱིས་གདོན་ཐམས་ཅད་འཇིག་པར་བྱེད་བགེགས་དང་ལོག་འདྲེན་ཐམས་ཅད་ཕྱོགས་བཅུར་དཔག་ཚད་སྟོང་དུ་འབྲོས་པར་འགྱུར། མ་མོའི་གནས་སུ་བདུགས་ན་རླུང་དང་སེར་བ་དང་སྤྲིན་ཐམས་ཅད་གཅོད་པར་བྱེད་མ་མོའི་ཚོགས་དང་ནག་པོ་ཆེན་པོ་ལ་སོགས་པ་འགུགས་པར་འགྱུར་ཞིང་དབང་དུ་གྱུར་ནས་འདུག་པར་འགྱུར་བྱ་བ་ཐམས་ཅད་བྱེད་པར་འགྱུར་རོ། །གཡུལ་འགྱེད་པའི་ཚེ་བདུགས་ན་དཔུང་གི་ཚོགས་ཡན་ལག་བཞི་པའི་དཔུང་ལས་རྒྱལ་བར་འགྱུར། ཐམས་ཅད་དུ་བདུགས་པ་ཙམ་གྱིས་རྒྱལ་བར་འགྱུར། ཐམས་ཅད་དུ་སྦྱར་བར་བྱས་ན་ཀུན་ཏུ་གྲུབ་པ་ཆེན་པོར་འགྱུར་རོ། །བདུག་པའི་ཆོ་གའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གཅིག་པ། དེ་ནས་རིག་སྔགས་འཆང་རྣམས་ལ་ཕན་པ་དང་བདེ་བའི་ཕྱིར་ཐིག་ལེ་བྱ་བ་དང་། གདོང་བཀྲུ་བ་དང་ལུས་བསྐུ་བ་བྱས་ན་ཡ་ལད་དང་། གོ་ཆ་བགོས་པ་དང་འདྲ་བར་འགྱུར་བ་བཤད་པར་བགྱི་ཡིས་བཅོམ་ལྡན་འདས་གསན་དུ་གསོལ། དོན་ཡོད་པའི་ནོར་བུ་རྒྱ་ཆེན་པོ་རྡོ་རྗེའི་ཞགས་པ་ཞེས་བྱ་བའི་ནོར་བུ་གང་སྦྱོར་བ་བྱས་པ་ཙམ་གྱིས་ཐམས་ཅད་འགྲུབ་པ་བླ་ན་མེད་པ་མཁས་པས་མཛོད་སྤུ་རྣམས་སུ་ཐིག་ལེ་བྱས་ན་ཚོགས་ཀྱི་ནང་དང་སྐྱེ་བོ་མང་པོའི་ནང་དང་ཚོགས་པའི་ནང་དང་དགེ་འདུན་གྱི་ནང་དང་དེ་བཞིན་དུ་རིགས་བྱེད་ཀྱི་ཚོགས་བཞིའི་ནང་དུ་སྐར་མའི་ཚོགས་ཀྱི་ནང་དུ་ཟླ་བ་ཚེས་པ་བཞིན་དུ་མཛེས་ཤིང་འཇིགས་པ་མེད་དོ།