དཔལ་ལྷ་མོ་ཆེན་མོ་རྟག་ཏུ་རྒྱུན་མི་འཆད་པར་མཆོག་སྦྱིན་པར་འགྱུར། འཕགས་པ་སྤྱན་རས་གཟིགས་དབང་ཕྱུག་དུས་ཀུན་ཏུ་སྐུ་སྟོན་པར་བཞེད་པར་འགྱུར། དེའི་ལུས་ལ་དུག་ཐམས་ཅད་ཀྱིས་མི་ཚུགས་པར་འགྱུར། འཇིགས་པ་ཆེན་པོ་མི་བཟད་པ་བརྒྱད་ལས་ཡོངས་སུ་གྲོལ་བར་འགྱུར། རིམས་ཐམས་ཅད་དང་ནད་ཐམས་ཅད་ཀྱིས་མི་ཚུགས་པར་འགྱུར་རོ། །གདོན་ཐམས་ཅད་ལ་ཚོན་སྣ་ལྔའི་སྲད་བུ་ལ་ལན་ཉི་ཤུ་རྩ་གཅིག་བཟླས་ཏེ། མདུད་པ་ཉི་ཤུ་རྩ་གཅིག་པོར་ལ་གུ་གུལ་གྱིས་བདུགས་ཏེ། མགུལ་དུ་བཏགས་ན་གདོན་ཐམས་ཅད་ལས་ཡོངས་སུ་གྲོལ་བར་འགྱུར་རོ། །གལ་ཏེ་ནག་པོ་ཆེན་པོ་དང་མ་མོའི་ཚོགས་འོངས་ཏེ་རྒྱས་བཏབ་པ་གང་ཡིན་པའང་གདོན་ཐམས་ཅད་ལས་ཡོངས་སུ་ཐར་བར་འགྱུར་རོ། །སྐུད་པ་ནག་པོས་རིམས་ཉིན་གཅིག་པ་ལས་ཡོངས་སུ་གྲོལ་བར་འགྱུར། གཞན་དག་ལ་ནི་ཐམས་ཅད་དུ་སྲད་བུ་དཀར་པོས་བསལ་བར་བྱའོ། །འཐབ་པ་དང་། རྩོད་པ་དང་། ཁྲག་ཁྲུག་ཐམས་ཅད་ལ་གི་ཝང་ལ་ལན་ཉི་ཤུ་རྩ་གཅིག་བཟླས་ཏེ། ཐིག་ལེ་བྱས་ན་ཐམས་ཅད་དུ་ཐོགས་པ་མེད་པར་འགྱུར་རོ། །སྙིང་གར་ཐིག་ལེ་བྱས་ན་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་ཐམས་ཅད་ཀྱིས་མི་མཐོང་བར་འགྱུར་རོ། །ལག་མཐིལ་ལ་ཐིག་ལེ་བྱས་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གང་ལ་རེག་པ་དབང་དུ་འགྱུར་རོ། །སྨིན་མཚམས་སུ་ཐིག་ལེ་བྱས་ན་རྒྱལ་པོ་བཙུན་མོའི་འཁོར་དང་བཅས་པ་དབང་དུ་འགྱུར་རོ། །མགུལ་བར་བྱུགས་ན་རྗེའུ་རིགས་ཐམས་ཅད་དབང་དུ་འགྱུར་རོ། །དཔུང་པ་གཉིས་ལ་བྱུགས་ན་རྒྱལ་རིགས་ཐམས་ཅད་དབང་དུ་འགྱུར་རོ། །དཔྲལ་བའི་སྐྲ་མཚམས་སུ་ཐིག་ལེ་བྱས་ན་བྲམ་ཟེ་ཐམས་ཅད་དབང་དུ་འགྱུར་རོ། །ལྟེ་བའི་གནས་སུ་ཐིག་ལེ་བྱས་ན་དམངས་རིགས་ཐམས་ཅད་དབང་དུ་འགྱུར་རོ། །རྐང་པའི་རྗེ་ངར་ལ་བྱུགས་ན་དཔག་ཚད་བརྒྱར་ངལ་བ་མེད་པར་འགྲོ་ཞིང་སླར་ཡང་འོང་བར་འགྱུར་རོ། །རྐང་མཐིལ་ལ་བསྐུས་ན། ཆུ་ཀླུང་ཆེན་པོའི་ཕ་རོལ་ཏུ་ཕྱིན་པར་འགྱུར་ཞིང་རྒྱ་མཚོའི་བར་དུ་རྒལ་བར་འགྱུར་རོ། །དཔུང་པ་གཉིས་ལ་བྱུགས་ན། གྱད་ཀྱིས་མི་ཐུབ་པར་འགྱུར་རོ། །པུས་མོ་གཉིས་ལ་བྱུགས་ན་མེའི་ཕུང་པོ་འབར་ཞིང་རབ་ཏུ་འབར་བར་ཞུགས་ན་ཙནྡན་དང་པུ་ཤེལ་ཙེ་བཞིན་དུ་བསིལ་བར་འགྱུར་རོ།