།གནས་ཐམས་ཅད་དུ་སོང་བ་ན་ཡང་རྟག་ཏུ་རྒྱུན་མི་འཆད་པར་བུ་ལ་བྱམས་པའི་ཚུལ་གྱིས་རྟག་ཏུ་ཕྱི་བཞིན་འབྲང་ཞིང་འགྲོ་བར་འགྱུར་རོ། །རིག་སྔགས་འཆང་གི་རང་གི་ཁྱིམ་ཡང་རྒྱལ་པོའི་ཕོ་བྲང་ལྕང་ལོ་ཅན་ཇི་ལྟ་བ་བཞིན་དུ་རིག་སྔགས་འཆང་གི་གཞལ་མེད་ཁང་མཆོག་ཏུ་འགྱུར་རོ། །རྣམ་ཐོས་ཀྱི་བུའི་གནས་ན་འབྱོར་པ་ཇི་ལྟ་བ་བཞིན་རྒྱས་པར་འགྱུར་རོ། །ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དུས་ཀུན་ཏུ་འོང་བར་འགྱུར་རོ། །གནོད་སྦྱིན་གྱི་སྡེ་དཔོན་ཆེན་པོ་རྡོ་རྗེ་འཆང་ཡང་རིག་སྔགས་འཆང་གི་ཚོགས་ཐམས་ཅད་དང་། གནོད་སྦྱིན་ཆེན་པོ་གསང་བ་པའི་འཁོར་རྣམས་དང་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བ་བྱེད་པར་འགྱུར་རོ། །དེ་བཞིན་དུ་དཔལ་ལྷ་མོ་ཆེན་མོ་འཁོར་དང་བཅས་པ་དང་རྣམ་ཐོས་ཀྱི་བུ་གནོད་སྦྱིན་བྱེ་བས་ཡོངས་སུ་བསྐོར་བས་ཉིན་མཚན་དུ་བསྲུང་བ་དང་། བསྐྱབ་པ་དང་། སྦ་བ་བྱེད་པར་འགྱུར་རོ། །དེ་ནས་དོན་ཡོད་པའི་རྒྱ་མཚོ་ནོར་བུ་ཆེན་པོ་པདྨ་ལ་ལྷའི་དཔལ་དྲི་མ་མེད་པ་ཞེས་བྱ་བ་དོན་ཡོད་པའི་ཞགས་པའི་སྙིང་པོའི་ཆོ་ག་ཞིབ་མོའི་རྒྱལ་པོ་བཀླགས་པས་འགྲུབ་པར་འགྱུར་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིའི་རྡུལ་ཕྲ་མོ་སྙེད་ལས་དགེ་བའི་རྩ་བ་བསྐྱེད་པར་འགྱུར། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་གིས་ལྷའི་ནོར་བུ་རིན་པོ་ཆེ་ཆེན་པོ་དང་ནོར་བུ་རིན་པོ་ཆེ་ཆེན་པོ་སྣ་བདུན་དང་། ལྷའི་གསེར་དང་། གསེར་གྱི་མེ་ཏོག་དང་། དངུལ་གྱི་མེ་ཏོག་མང་པོ་དང་། ལྷའི་གོས་དང་། ལྷའི་རྒྱན་དང་། ལྷའི་དྲི་དང་། མེ་ཏོག་དང་། མེ་ཏོག་ཕྲེང་དང་། བྱུག་པ་རྣམས་རེ་རེ་ཞིང་འཕང་དུ་རིའི་རྒྱལ་པོ་རི་རབ་ཙམ་གྱི་ཕུང་པོ་བྱས་ནས། དེ་དག་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིའི་རྡུལ་ཕྲ་མོ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དེ་བཞིན་གཤེགས་པ་རེ་རེ་ལ་ཚུལ་དེ་ལྟ་བུས་སོ་སོར་དེ་བཞིན་གཤེགས་པ་ཐམས་ཅད་ལ་ཉིན་རེ་ཞིང་། ལོ་གཅིག་གི་བར་དུ་འབུལ་བར་བྱེད་མཆོད་པ་དང་བསྙེན་བཀུར་བྱེད་ཅིང་དེ་བཞིན་གཤེགས་པ་རེ་རེའི་སྤྱན་སྔར་དྲི་ཞིམ་པོ་དང་ལྡན་པའི་ཏིལ་མར་རྒྱ་མཚོ་ཙམ་གྱིས་བཀང་བའི་མར་མེ་བལྟམ་པར་བྱེད་པའི་བསོད་ནམས་ཀྱི་ཕུང་པོ་དང་ལྡན་པར་འགྱུར།