།ཤིང་པ་ལ་ཤའི་མེ་སྦར་ཏེ་ན་ལེ་ཤམ་བརྒྱ་སྟོང་སྦྱིན་སྲེག་བྱས་ན། བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ཉི་མ་འོངས་ནས་མདུན་དུ་འདུག་པར་འགྱུར་རོ། །སྣ་མའི་མེ་ཏོག་དང་། ཀར་ནི་ཀཱ་རའི་མེ་ཏོག་དང་། ཨུཏྤལ་རྣམས་མར་དང་བསྲེས་པ་ལས་སྦྱིན་སྲེག་བརྒྱ་སྟོང་བྱས་ན། ཟླ་བ་དང་། ཉི་མ་འོངས་ནས་མཆོག་སྦྱིན་ཞིང་ལུས་ལ་འོད་ཟེར་བཏང་ནས་ནམ་མཁའ་ལ་འགྲོ་བར་འགྱུར་རོ། །ཨ་ཤྭད་ཐས་ཡམ་སྲེག་ཤིང་བྱས་ལ། ཤུ་ཏི་དང་། ཉེའུ་ཤིང་དང་། ཨརྐ་དང་། ཙནྡན་དང་། ཡུངས་ཀར་དང་། ནས་དང་། མར་བསྲེས་པ་ལས་ཉི་མ་བདུན་གྱི་དུས་མཚམས་གསུམ་དུ་སྦྱིན་སྲེག་ཉི་ཤུ་རྩ་གཅིག་བྱས་ནས་རྒྱལ་པོ་བཙུན་མོའི་འཁོར་དང་བཅས་པ་དབང་དུ་འགྱུར་རོ། །གདོན་དང་། གནོད་སྦྱིན་དང་། སྲིན་པོ་ཐམས་ཅད་ཆད་པས་བཅད་ན་འབྲས་སོ་བ་དང་། ཡུངས་ཀར་དང་། ལན་ཚྭའི་སྦྱིན་སྲེག་བགྱིས་ཏེ། ཐམས་ཅད་ལ་དོན་ཡོད་པའི་ཞགས་པ་བཅིང་བར་བྱ་ཞིང་ཁྲོ་བོའི་ཕྱག་རྒྱ་དང་གསང་སྔགས་ལྷན་ཅིག་རྗེས་སུ་དྲན་པར་བྱའོ། །སྦྱིན་སྲེག་གི་ཆོ་གའོ།། །།དེ་ནས་དོན་ཡོད་པའི་ཞགས་པའི་སྙིང་པོ་ཆོ་གའི་རྒྱལ་པོ་ཆེན་པོ་རས་ཀྱི་སྐུ་གཟུགས་མཐོང་བ་ཙམ་གྱི་མོད་ལ་མནར་མེད་པའི་མཐར་ཐུག་པ་དང་། མཚམས་མེད་པ་ལྔ་བྱེད་པ་བྱང་བར་འགྱུར་བ་བཤད་པར་བྱ་སྟེ། རས་ཁྲུ་དོ་གྲུ་བཞི་ལྷམ་པ་ཁ་ཚར་མཆད་པ་སྐྲ་མེད་པ་ཐག་རན་བཟང་བ། ཤིན་ཏུ་དཀར་བ། ཤིན་ཏུ་སྦྱངས་པ་ལ་རི་མོ་མཁན་མི་སྨྲ་བའི་དཀའ་ཐུབ་ཅན་བསྙེན་གནས་ལ་གནས་པ། གཙང་མས་གོས་གཙང་མ་བགོས་པ། ཟས་དཀར་གསུམ་ཟ་བ། དུས་གསུམ་དུ་ཁྲུས་བྱས་པ། ལྷག་མ་མ་ཡིན་པའི་ཚོན་རྩི་སྣོད་སར་པར་བཞག་སྟེ། པིར་སར་པས་འཕགས་པ་སྤྱན་རས་གཟིགས་དབང་ཕྱུག་བཞེངས་པའམ་བཞུགས་པའམ་སྐྱིལ་མོ་ཀྲུང་དུ་བཞུགས་པ་བྲི་བར་བྱ་སྟེ། རལ་པའི་ཐོར་ཚུགས་ཀྱིས་བརྒྱན་པ། ཨེ་ནེ་ཡའི་པགས་པ་བསྣམས་པ། ཕྱུགས་བདག་གི་ཆ་ལུགས་འཆང་བ། རྒྱན་ཐམས་ཅད་ཀྱིས་བརྒྱན་པ། ཕྱག་བཅུ་དྲུག་པ་ཞལ་ཞི་བ། སྤྱན་ཕྱེ་བ། དབུ་རྒྱན་ལ་རྒྱལ་བ་འོད་དཔག་མེད་བཞུགས་པ། ཞལ་གཡས་པའི་ཐོར་ཚུགས་ལ་ཟླ་ཚེས་ཀྱིས་བརྒྱན་པ། ཕྱག་གཉིས་རྡོ་རྗེའི་ཐལ་མོ་སྦྱར་བ་ལས་གྱེན་དུ་པདྨའི་ཚུལ་དུ་བྱའོ། །ཕྱག་གཉིས་ཐུར་དུ་ཀུན་ཏུ་ཞལ་གྱི་ཕྱག་རྒྱ་བྱའོ།