།གལ་ཏེ་འདི་ལྟ་བུའི་ཆོ་གས་མི་བགྱིད་ན། བཀླགས་པ་ཙམ་གྱི་མོད་ལ་ཡང་འགྲུབ་པར་འགྱུར་ན། བཟླས་བརྗོད་ཀྱི་ལས་ཀྱི་ཆོ་གས་ལྟ་སྨོས་ཀྱང་ཅི་འཚལ། ཡང་རིག་སྔགས་འཆང་གང་ཞིག་གང་གཱའི་ཀླུང་བྱེ་བ་ཕྲག་བརྒྱད་ཅུ་རྩ་བརྒྱད་ཀྱི་བྱེ་མ་དང་མཉམ་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མཆོད་པར་འཚལ་ལམ། བལྟ་བར་འཚལ་ལམ། དགེ་བའི་རྩ་བ་རྒྱ་ཆེན་པོ་བསྐྱེད་པར་འཚལ་ལམ། སེམས་ཅན་ཐམས་ཅད་དགེ་བའི་རྩ་བ་ལ་རབ་ཏུ་གཞག་པར་འཚལ་བའམ། ཐམས་ཅད་ཀྱི་སྒྲིབ་པ་རྣམ་པར་དག་པར་བགྱི་བར་འཚལ་ན། རིག་སྔགས་འཆང་དེས་དགེ་སློང་ཕའམ། དགེ་སློང་མའམ། དགེ་བསྙེན་ཕའམ། དགེ་བསྙེན་མའམ། རྒྱལ་པོའམ། བཙུན་མོའམ། གཞན་སུ་ཡང་རུང་བས་ཐམས་ཅད་ཆོ་ག་འདི་བཞིན་བགྱིས་ཏེ། དེས་ཅི་འབྱོར་པའི་གསེར་ལས་དོན་ཡོད་པའི་ཞགས་པའི་གཟུགས་བརྙན་བགྱིའོ། །དེ་ནས་ཁ་ཤར་ཕྱོགས་སུ་བསྟན་ཏེ་གཞག་ལ་གུར་གུམ་གྱི་དཀྱིལ་འཁོར་བགྱི་སྟེ། གྲུ་བཞི་ཆ་འབྱེས་པར་ལི་ཁྲིས་ཐིག་གདབ་པར་བགྱིའོ། །དཀྱིལ་འཁོར་དབུས་སུ་པདྨའི་ཕྲེང་བ་བགྱིའོ། །པདྨའི་ཕྲེང་བའི་དབུས་སུ་རིལ་བ་སྤྱི་བླུགས་དང་བགྲང་ཕྲེང་གཞག་པར་བགྱིའོ། །མེ་ཏོག་སྣ་ཚོགས་ཀྱིས་མཛེས་པར་བགྱིའོ། །སྤོས་ཆབ་ཀྱིས་བཀང་བའི་བུམ་པ་མེ་ཏོག་ཅི་འབྱོར་པས་ལེགས་པར་བརྒྱན་པ་བཞི་གཞག་པར་བགྱིའོ། །མཆོད་ཡོན་གྱི་སྣོད་ལྔ་གཞག་པར་བགྱིའོ། །པོག་ཕོར་གྱི་སྣོད་ལྔ་ནས་ཨ་ག་རུའི་བདུག་པས་བདུག་པར་བགྱིའོ། །དྲིས་བསྒོས་པའི་མར་མེ་བཅུ་དྲུག་སྦར་བར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བགྱིའོ། །མེ་ཏོག་དང་། བདུག་པ་དང་། དྲི་དང་། ཕྲེང་བའང་དབུལ་བར་བགྱིའོ། །འཇིག་རྟེན་དབང་ཕྱུག་གི་མདུན་དུ་སྐྱིལ་མོ་ཀྲུང་བཙས་ཏེ་མཆིས་ནས་དོན་ཡོད་ཞགས་པའི་ཕྱག་རྒྱ་བཅིངས་ཏེ། བདག་ཉིད་ལ་དབང་བསྐུར་བར་བགྱིའོ། །ཁྲོ་བོའི་རྒྱལ་པོ་ལན་ཅིག་བཟླས་བརྗོད་བགྱིའོ། །དེ་བཞིན་གཤེགས་པ་ཐམས་ཅད་ལ་དམིགས་པ་ཡིད་ལ་བགྱིས་ནས། ཕྱོགས་བཅུར་ཡིད་ཀྱིས་མཆོད་ཅིང་ཕྱག་བགྱིའོ། །བཟླས་བརྗོད་ཀྱི་ཕྱག་རྒྱ་བཅིངས་ཏེ་བཟླས་བརྗོད་བགྱིའོ།