དྲི་ཆུ་སྐྱོ་མ་བགྱིས་ཏེ་ཕྱོགས་བཞི་ཀུན་ཏུ་དབང་བསྐུར་ན་མཚམས་ཆེན་པོ་བཅད་པར་བགྱིས་པར་འགྱུར་རོ། །ནད་ཀྱིས་ཟིན་པ་ཐམས་ཅད་ཀྱི་ནད་ཐམས་ཅད་ཉེ་བར་ཞི་བར་འགྱུར་རོ། །རིམས་ཐམས་ཅད་ལ་ཐིག་ལེ་བགྱིས་ན་རིམས་ཐམས་ཅད་ལས་ཐར་བར་འགྱུར་རོ། །དྲི་ཆབ་དང་ཐལ་བས་ཁྲུས་བགྱིས་ན་ཐམས་ཅད་ཀྱི་སྒྲིབ་པ་དང་། སྡིག་པ་ཐམས་ཅད་རྣམ་པར་དག་པར་འགྱུར་རོ། །བཙོན་ར་ན་མཆིས་པའམ། ཕྱག་སྦལ་ན་མཆིས་པའི་གོས་ལ་བསྐུས་ན་རལ་བར་འགྱུར་རོ། །གདུག་པས་ཟིན་པ་དང་། དུག་གིས་མྱོས་པ་ཐམས་ཅད་ལ་བསྐུས་ན་གདུག་པར་མི་འགྱུར་རོ། །མེ་དགུག་པའི་སྦྱིན་སྲེག་གི་ཆོ་ག་རྫོགས་སོ།། །།དེ་ནས་པདྨ་རྒྱ་ཆེན་པོའི་དཀྱིལ་འཁོར་འདིར་པདྨའི་རིགས་འཕགས་པ་སྤྱན་རས་གཟིགས་དབང་ཕྱུག་གི་དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་ཆོ་ག་ཞིབ་མོའི་རྒྱལ་པོ་ཆེན་པོ་བརྗོད་པར་བགྱི་སྟེ། འདི་ནི་མ་བསྒྲུབས་པར་ལས་བརྒྱ་སྟོང་བགྱིད་པར་འགྱུར་རོ། །ཚེས་གྲངས་རྒྱུ་སྐར་བཟང་པོ་དང་། །ཤིན་ཏུ་བཀྲ་ཤིས་མཆོག་དགེ་ལ། །ལེགས་པར་ཁྲུས་བགྱིས་གོས་གཙང་བགོ། །བྱམས་པའི་སེམས་ལ་མཉམ་པར་བཞག །སེམས་ཅན་ཀུན་ལ་བརྩེ་བ་དང་། །སྙིང་རྗེ་དམ་པས་བརྒྱན་པ་དང་། །དོན་ཡོད་ཞགས་པའི་རིག་སྔགས་ཆེ། །གྲུབ་པ་བླ་མེད་ཆོ་གའི་རྒྱལ། །བཀླགས་པས་ལས་རྣམས་ཐམས་ཅད་དག །འགྲུབ་པར་བགྱིད་དེ་སོམ་ཉི་མེད། །འཇིག་རྟེན་བླ་མའི་སྙིང་པོ་དག །དེ་བཞིན་གང་དག་རྟག་བརྗོད་ན། །ལུས་ཅན་རྟག་ཏུ་མཆོག་སྦྱིན་གྱི། །ཕྱག་ན་པདྨ་རྟག་ཏུ་འགྱུར། །ཅི་ལྟར་གང་གཱའི་བྱེ་སྙེད་ཀྱི། །སངས་རྒྱས་བྱེ་བ་ཕྲག་སྟོང་ལ། །བསོད་ནམས་ཕུང་པོ་ཁྲི་ཕྲག་བསྐྱེད། །དགེ་བའི་རྩ་བ་སོགས་པ་དང་། །སངས་རྒྱས་བྱ་བ་བགྱིད་པར་འགྱུར། །སྨྱུང་བ་བགྱིས་ནས་བཟླས་བརྗོད་གཅིག །མཁས་པའི་མིས་ནི་བརྗོད་བགྱིད་པ། །དགེ་སློང་ཕ་དང་དགེ་སློང་མ། །དགེ་བསྙེན་ཕོ་མོས་དེ་བཞིན་དུ། །བདེ་བ་ཅན་དུ་མྱུར་དུ་མཆི། །སྡུག་བསྔལ་མི་བཟད་མྱོང་འགྱུར་བའི། །ཉོན་མོངས་པ་ལས་ཐར་བར་འགྱུར། །རྟག་ཏུ་སངས་རྒྱས་བྱང་ཆུབ་དག །མཐོང་བར་འགྱུར་ཏེ་སོམ་ཉི་མེད། །དེ་ནས་དོན་ཡོད་པའི་ཞགས་པའི་སྙིང་པོའི་ཆོ་ག་ཅི་ལྟ་བ་བཞིན་དུ་བཟླས་བརྗོད་ཀྱི་ཆོ་ག་བརྗོད་པར་བགྱི་སྟེ།